Jo Galatia 2

Paulo ki Lukwena mukene

11

Lacen inge mwaka apar wiye angwen dok acito i Jerucalem aye kacel ki Barnaba, dok bene atero Tito me wot kacel kweda. 2Acito kunu pien Lubanga onongo onyuta ni omyero aciti. Ma ao kunu, ci aketo lok me Kwena Maber ma abedo katitone bot Luroki inyimgi i mung bot jo ma ngene, wek tica ma atiyo, nyo madong atyeko tiyone con, pe obed me nono. 3Ento Tito ma onywako wot kweda, kadi bed onongo en Lagrik, pe kibedo kadiye ni myero kilire, 4kadi bed onongo tye jo mogo ma kikelogi ikinwa ma pe gin utmego kikome, magi gin jo ma gubino karoto kit kuc ma watye kwede i Kricito Yecu, ka wek kilokwa wadok opii. 5Ento pe waye lokgi, wek wagwok lok ada me Kwena Maber pirwu. 62 Ki tung bota pe onongo aparo pi jo ma gingene ni gin ludito, pien Lubanga gire pe lenge tung bot ngat mo pi kit ma en tye kwede. Gin jo ma ngenenu pe gumeda gin mo. 7Ento guniang ni Lubanga dong omiya tic me tito lok me Kwena Maber bot Lurok, marom ki kit macalo yam kimiyo ki Petero tic me tito lok me Kwena Maber bot Lujudaya; 8pien ngat ma otiyo kacel ki Petero tic me tito lok me Kwena Maber bot Lujudaya, obedo katic ikoma bene bot Lurok. 9Yakobo ki Kepa ki Jon mayam kingeyogi ni gubedo lutela, ka dong guniang pi kica ma Lubanga omiya ci gugamo an ki Barnaba macalo lutic wadigi, kun gipoko tic ni wan myero wacit bot Lurok ki gin gucit bot Lujudaya. 10Gin gulegowa lok acel keken ni omyero wapo pi lucan, ma man aye onongo gin ma aketo cwinya ni omyero atim.

Paulo ojuku Kepa i Antiokia

11Ikare ma Kepa obino i Antiokia ajuke woko atyer kamaleng pien onongo otimo gin ma pe ber. 12Pien ikare ma jo mogo ma gua ki bot Yakobo peya gubino, onongo Kepa nywako cam kacel ki Lurok; ento ikare ma gubino ci Kepa ojer onyiko woko cen, opoke woko ki botgi pi lworo dul pa jo ma mito ni jo ma oye Kricito myero kong kilirgi. 13Lujudaya mukene gucako lubu kit pa Kepa me goba, kadi ki Barnaba bene ocako ngak woko kun lubu kitgi ma pe nyutu cwiny me ada. 14Ento ikare ma aneno ni guweko ada me lok me Kwena Maber woko ma onongo tamgi tye kawot atata, ci apenyo Petero ki inyimgi ducu ni, “Ka in ma Lajudayani ilubu kit pa Lurok, ma pe ibedo calo Lajudaya, ci itwero diyo Lurok ningning me lubu kit pa Lujudaya?”

Lujudaya ki Lurok ducu kilarogi pi niye

15Wan kikomwa wan Lujudaya nia wa i anywali, pe wan Lurok, jo ma lubalogu. 163 Ento wangeyo ni dano pe kikwano ni kite atir pien tiyo gin ma Cik mito, ento pi ye Yecu Kricito keken. Kadi wa wan Lujudaya bene watyeko ye Yecu Kricito wek kikwanwa ni kitwa atir pi ye Kricito, ento pe pi tiyo gin ma Cik mito; pien pe kibikwano dano moni ni kite atir pien tiyo gin ma Cik mito. 17Ento kombedi, ka watye kayele ni wek kikwanwa ni kitwa atir pi Kricito, kun wan kikomwa bene watye lubalo marom aroma ki Lurok, ci Kricito mono obedo lakwena me tic pi bal? Adadaeni pe kumeno! 18Ka dok agero gedo mayam amuku areto woko pinyi odoco, ci an kara latur Cik. 19Pien pi temo tiyo gin ma Cik mito omiyo yam ato pi Cik, wek abed kwo tung bot Lubanga. Yam kigura ikom yatariya kacel ki Kricito; 20pe dok an ma akwoni, ento Kricito aye ma bedo kwo i iya. Kwo ma kombedi atye kwede ikomani, abedo kwo pi ye Wod pa Lubanga, ma ceng omara ka omine gire pire kene pira. 21An gira pe abolo kica pa Lubanga; pien ka gikwano dano ni kitgi atir pi Cik, ci Kricito yam oto nono labongo tyen lok mo.