Jo Galatia 1

Mot

1Waraga man oa ki bot an Paulo ma lakwena. Pe dano mogo aye ma ceng guora, or ma mera me bedo lakwena pe yam owok ki bot dano mo, ento oa ki bot Yecu Kricito ki bot Lubanga Won ma ceng ocere woko ki ikin jo ma oto. 2Utmegiwa ducu ma gitye kacel kweda kany bene gumoto wun jo ducu ma wuye Kricito ma wubedo i Galatia: 3Lubanga Wonwa ki Rwotwa Yecu Kricito omiwu kica kacel ki kuc, 4en Kricito mayam omine kene pi balwa wek en olarwa woko ki igin marac me kare man, kun lubu gin ma Lubanga Wonwa mito. 5Deyo obed bot Lubanga nakanaka. Amen.

Lok me Kwena Maber mo mukene peke

6An auru kit ma wuloke kwede oyot, kun wubwoto ngat ma ceng olwongowu i kica pa Kricito, dok wuloke woko wutye kalubu lok me kwena mo mukene. 7Lok me Kwena Maber mo mukene gire peke, ento tye jo mogo ma balo cwinywu woko, kun gimito gilok lok me Kwena Maber pa Kricito odok gin mapat. 8Ento kadi bed wan nyo lamalaika mo ma oa ki i polo, ce otitiwu lok me kwena mapat ki lok ma nene watito botwuni, omyero kicen woko. 9Kit macalo nene watito botwu, pud dok atito ki wun aye ni, kace tye ngat mo ma dok tye katitiwu lok me kwena ma poke woko ki mayam dong wuyeni, omyero kicen woko.

10Wutamo ni atye kayenyo cwak pa dano mono, nyo pa Lubanga? Gwok nyo atye kateme me yomo cwiny dano ba? Kace nene abedo kayomo cwiny dano, onongo myero pe abed latic pa Kricito.

Kit ma Paulo odoko kwede lakwena

11Utmegina, amito wunge lok man ni, lok me Kwena Maber ma ceng atito botwuni pe obedo gin pa dano. 12Pe yam agamo lok man me Kwena Maber ki bot dano mo, dok bene pe kipwonya kwede apwonya, ento anongo ki bot Yecu Kricito ma ceng onyute botani. 131 Wutyeko dong winyo lok ikom kwona macon ikare ma onongo pud alubu dini pa Lujudaya, kit ma abedo kalibo kwede jo ma oye Lubanga, kun atimo bwami ikomgi, dok ateme mada me nekogi woko liweng. 142 I dini pa Lujudaya an aye ma onongo aloyo jo mapol ma gin yalwaka ma gin jo me roka, kun aketo cwinya adada me lubu kit me tekwaro pa kwarowa. 153 Ento Lubanga yam oyera wa con, ci oketa woko pat ma onongo pud peya kinywala, ka dok olwonga gire pi kicane. 16Cwinye obedo yom me nyuta Wode, wek acit atit pire bot Lurok. Ikare ma lok man otime, pe aa acito bot dano mo ni omiya tam, 17dok bene pe aa acito i Jerucalem bot jo mukwongo bedo lukwena kweda, ento acito gira cen wa i Arabia, ka aa ki kunu dok adwogo cen i Damaciko. 184

Inge mwaka adek acito i Jerucalem kalimo Kepa, ci abedo kunu pi nino apar wiye abic. 19Ento ikin lukwena aneno Yakobo omin Rwot keken. 20Me ada kadi wa inyim Lubanga, lok ducu ma acoyo botwu i waraga man goba pe iye. 21Ka dok acito i lobo Ciria ki Cilicia, 22kun onongo lwak dano mapol ma guye Kricito ma gitye ikabedo ducu i Judaya peya gingeya dok peya guneno koma. 23Onongo guwinyo lok ikoma keken ma kititigi ni, “Ngat mayam obedo kayelowani, kombedi tye katito lok ikom niye man mayam kong otemo tyekone wokoni.” 24Omiyo gupako Lubanga pira.