2 Jo Korint 13

Cik me agiki

11

Man dong tyen me adek ma abio kwede botwu. Caden maromo aryo nyo adek aye myero gumok lok ducu ma kikelo me alara, macalo yam kicoyo. 2Lok man yam atito botwu con ikare ma atye i wota me aryo, dok anwoyo wacone kombedi madong atye cen, bot jo mayam gubalo, ki bot jo mukene ducu ni meno, ka dok adwogo botwu pe tye ngat mo ma bibwot ki i pwod. 3Pien wumito neno gin ma moko ni Kricito aye matye kalok idoga. Ento ka en tye katic ikinwu en pe bedo goro ento en nyutu tek ma mere ikinwu. 4Yam kigure ikom yatariya pi gorone, ento kombedi en kwo pi tek pa Lubanga. Kadi wan bene wagoro i en, ento i ticwa kwedwu wabibedo kacel kwede pi tek pa Lubanga.

5Kong wungine kekenwu, wek wunen kace wucung matek i niyewu. Wuteme kekenwu. Pe wuniang ni Yecu Kricito tye i iwu? Nikwanyo ka wupoto woko adada! 6Ageno ni wubiniang maber ni wan mere pe wabedo jo ma pe piny oloyogi. 7Ento walego Lubanga pirwu ni pe wutim gin mo marac, pe me nyutu ni wan jo ma Lubanga pwoyo, ento wamito ni wun wutim gin maber, kadi bed wanen calo jo ma piny oloyogi. 8Pien wan pe watwero tiyo gin mo ma pe rwate ki lok ada, ento watwero tiyo gin ma rwate ki gin matye ada keken. 9Cwinywa yom ka wagoro ma nongo wun wutek, dok walego pirwu ni wudok jo muteggi. 10Gin ma omiyo acoyo lok ma pud atye kamabor kwedwu, wek pe abed ger ikomwu ka abino, kun atiyo ki twero mayam Rwot omiya wek akonywu me dongo, ento pe me dwokowu cen.

Mot me agiki

11Me agikine, utmegina, dong acwaliwu mot. Wuyub kitwu wek odok maber, dok bene myero wuwiny kokona pi gin ma alegowu pire. Wubed ki cwiny acel, wubed bene ki kuc, ci Lubanga ma won mar ki kuc bibedo kwedwu. 12Wumote kekenwu ki mot me mar. 13Lwak pa Lubanga ducu gumotowu.

14Kica pa Rwotwa Yecu Kricito, ki mar pa Lubanga, ki ribe ma Cwiny Maleng kelo obed kwedwu ducu.