2 Jo Korint 12

Gin ma Rwot onyutu bot Paulo

1Omyero anyate; kadi bed pe anongo iye gin mo, abilok ikom gin ma aneno iwang lek ki gin ma Rwot onyutu bota. 2Angeyo dano mo ikin jo pa Kricito mayam kitingo kitero woko malo wa i polo me adeke, kombedi dong okato mwaka apar wiye angwen kulu. (Ka kono Lubanga otingo kome, kono nyo omiye oleko aleka, an gira pe angeyo, ento Lubanga ngeyo.) 3Angeyo ni dano meno yam kitinge malo kitere wa i Paradic. (Kace Lubanga otingo kome, gwok nyo omiye oleko aleka, pe angeyo, ento Lubanga ngeyo.) 4Yam owinyo lok mogo ma pe myero oloke kamaleng, ma pe kiye ni dano mo otuci. 5Kit lok pa dano macalo meno aye bimiyo anyate, ento pira kena pe abinyate, ento kono pi gorona aye keken. 6Kadi bed onongo nen calo amito nyate, pe abibedo laming pien nongo aloko lok ada. Ento pe abinyate, wek dano mo pe obed ki par ikoma makato gin ma en oneno ikoma, nyo lok ma en owinyo awinya ki bota. 7Me gwoka wek pe alyere kena ma okato kare pi lwak jami mapol mayam Lubanga onyutu bota, yam kiketo arem ikoma ma obedo calo laor pa Catan, wek pe akete malo kekena ma okato kare. 8Yam alego Rwot piman tyen adek ni jami macalo meno oa woko ki ikoma. 9Cutcut en ogamo ni, “Kicana tye ma romi, pien tekona bedo tek tutwal kama goro tye iye.” En meno gin ma omiyo anyate ki yomcwiny madit tutwal pi gorona, wek tek pa Kricito obed ikoma. 10Pi Kricito omiyo cwinya yom pi goro mapatpat ma atye kwede, ki pi yet, ki pi can, ki pi peko mogo ma giuna kwede, ki peko ma diya matek; pien kama agoro iye, kenyo en aye kama atek iye.

Par pa Paulo ikom Kanica me Korint

11Onongo abedo laming! Wun aye ma wucora iye, pien onongo myero wun aye wudwora. Lukwena madito mukato kare ca pe gikata kadi ki acel, kadi bed an pe a gin mo. 12Gin ducu ma nyutu ni an lakwena kikome yam otime ikinwu ki diyo cwiny madit, lanyut mogo, tango ki tic me aura madito. 13Ngo mayam oremowu makato lwak muye Kricito ikabedo mukene ducu? Gwok nyo man keken ni an yam pe abedo ka nuruwu ki peko? Wutima ber, kace onongo abalo pi koyowu woko kitmeno!

14Man dong tyen me adek ma ayube me bino kwede botwu, ento dong pe abimiyo peko nuruwu. Pien an pe amito jamiwu, ento amito wun ki komwu. Lutino aye pe kano jami me mono pi lunyodogi, ento lunyodo aye ma kano jami me mono pi lutinogi. 15Abibedo ki yomcwiny madit me miyo jami ducu ma atye kwede, kadi wa tek koma ducu, pi konyo kwo me tipuwu. Wubimara manoknok ni, pien amarowu matek? 16Wek wuter ni an ki koma pe onuruwu ki peko. Ento ngat mo biwaconi an ladwala, ci abwolowu ki lok goba. 17Tye ngat mo ikin jo ma nene acwalogi botwuni, ma obuyo gin mo ki botwu pira? 18Onongo alego Tito ni myero ociti, ka dok aoro ominwa mukene me wot kacel kwede. Tito obuyowu? Yam pe watiyo tic ki kit cwiny acel? Onongo pe wabedo katic i yo acelu?

19Wun wutamo ni watye ka pido pirwa kenwa kare man ducu inyimwu? Pe kumeno; wan watye kalok inyim Lubanga, macalo jo pa Kricito. Dok bene, wun ma amaro, aloko me konyowu wek wudong wudok jo muteggi. 20Pien alworo ni ka ao kunu, gwok nyo abinongo wupat ki kit ma amito wubed kwede, dok wun bene gwok nyo wubinongo apat ki kit ma wumito abed kwede. Gwok nyo abinongo wutye ki daa, nyeko, kiniga malyet, laro dito, yet, lok kwot, lok me bwolo ki anyobanyoba. 21Alworo bene ni ka adwogo botwu i anyim, Lubangana bimiyo lewic maka woko inyimwu; ci bimiyo akok pi jo mapol ikin dano mayam gutimo bal, ka dong gukwero ngut woko ikom timgi me caro, me abor ki me kwele.