2 Jo Korint 11

Paulo ki lukwena ma lugoba

1Kono onongo wutwero diyo cwinywu manok mo ikoma i mingonani. Kong wudii cwinywu ba! 2Nyeko omaka pirwu ki lakodi nyeko ma Lubanga tye kwede bene ni; pien wucal ki nyako ma ayubu me nyome ki laco acel, kun ageno ni abitere bot cware, en aye Kricito, kun en nyako maleng ma pud peya ongeyo laco mo. 31 Ento atye ki lworo ni, kit macalo twol yam obwolo Kawa ki ryekone, wun bene dano bibalo tamwu woko, mamiyo pe dong wubimaro Kricito ki cwinywu ducu ki mar maleng. 4Pien ka ngat mo obino botwu, katito botwu pi Yecu mukene mapat ki maca ma watito pire botwuni, nyo omiyowu cwiny mapat ki mayam wutye kwede, nyo otito lok me kwena mo mapat ki mayam wujoloni, meno bidiyo cwinywu me ye loke woko. 5Ki i tama, aneno ni lukwena madongo ma gukato kare ca pe gikata kadi ki acel. 6Gwok nyo pe aryek ilok, ento aryek ingec mada. Meno yam dong wanyutu botwu kamaleng, i yo ducu ki ikare ducu.

7Wutamoni yam atimo bal ce ka mwole kena wek aket dit ikomwu, kun atito botwu lok me Kwena Maber ma oa ki bot Lubanga labongo gamo cul mo? 8Kitwero waco ni yam ayako lwak pa Kricito kamukene pirwu, pien ceng agamo lim ki botgi pi tica botwu. 92 Dok bene ikare ma onongo atye botwu, ka can jami mo omaka, pe ayelo ngat mo ikinwu, pien utmego ma gua ki i Makedonia gukelo kony ducu mamite pira. Onongo abedo ma agwoke, dok bene abigwoke, wek pe amii ki wun peko mo. 10Dong awaco botwu ni, macalo ada pa Kricito tye icwinya, pe gibigengo nyatena ilok man i lobo Akaya ducu. 11Pingo? Pien ni pe amarowu? Lubanga ngeyo ni amarowu.

12Gin ma atiyo abimede kitiyone, wek pe amii jo ca gunong kare ma gimito wek gumi onen ni gin girom aroma kwedwa i tic ma ginyate iyenu. 13Pien jonu pe gin lukwena kikome, gin lutic ma gibwolo dano, ma giloke woko ginen calo lukwena pa Kricito. 14Ngat mo myero pe obed ki ur ilok man, pien kadi Catan kikome bene loke nen macalo lamalaika ma menyo piny. 15Man pe dong gin ma pire dit tutwal kace lutic pa Catan giloke ginen calo lutic ma tiyo gin ma atir; agikigi bibedo rom ki gin ma gutiyo.

Can ma opoto ikom Paulo pi bedo Lakwena

16Anwoyo dok odoco ni, ngat mo pe opar ni an laming; ento kadi bed wutamo kitmeno, ci dong wujola macalo dano maming, wek omiya bene anyate manoknok. 17Gin ma atye kawacone botwuni pe gin ma Rwot aye omiya ni awac botwu; aloko calo dano maming ki gen man ma atye kwede me nyate. 18Macalo jo mapol ginyate pi gin me lobo ikit me dano, an bene abinyate. 19Pien wun wukanyo jo ma luming ki yomcwiny, pien wun jo maryek mada! 20Wukanyo cwinywu kadi ka ngat mo lokowu me doko opiine, nyo camo limwu, nyo buyuwu, nyo lakwote, nyo kadi dongo lemwu. 21Lewic omaka omiyo aye ni wan yam pe wabedo tek i yo meno!

Ento gin mo keken ma dano okete me nyate pire, an bene akete woko me nyate kitmeno, ma onongo pud aloko macalo laming. 22Gin mono gubedo jo Ibru? An bene. Gin jo Icrael? An bene. Gin mono likwayo Abraim? An bene. 233 Gin lutic pa Kricito? An gira aloko calo dano ma lapoya, awaco ni, akatogi woko. Atiyo tic aloyogi, ari i buc akatogi, kigoya ma wel odoone pe kwane, abwot ki i lak to tyen mapol. 244 Lujudaya gugoya ki odo anino pyere adek wiye abongwen tyen abic. 255 Kigoya ki odo tyen adek, kicela bene ki got kicel, mel otur woko kweda tyen adek; abutu ari i nam matut dyeceng ki dyewor benebene tyen acel. 266 Ari i wot mapol ma can bene opoto ikoma, can ma oa ki i lwak kulu mupong ki pii, can ma oa bot luyak, can ma oa bot lutuwa, can ma lurok guketo ikoma, can manen i gang, can manen i tim, can ma poto i nam, ki can ma a ki bot utmego ma gin lugoba. 27Acane tutwal i tic matek; tyen mapol pe anino dyewor. Ari kec ki orwo pii; tyen mapol abedo labongo cam mo ma roma, dok abedo i piny mangic labongo ginaruka. 28Medo ikom gin jami mukenegu ducu, tye gin acel makelo peko bota kare ki kare, en aye par ma atye kwede pi jo ma oye Kricito ikabedo mapatpat ducu. 29Tye ngat mo ma goro ma kun an pe agoro? Tye ngat mo ma kimiyo opoto i bal ma cwinya pe owang pire?

30Kace onongo myero anyate, abinyate pi gin ma nyutu gorona. 31Lubanga Won Rwotwa Yecu Kricito, ma kipako nakanaka, en ngeyo ni pe aloko goba. 327 Ikare ma onongo atye i Damaciko, laloc mo me dul lobo matye ite loc pa rwot Areta obedo ka kiyo gang meno ni wek emaka, 33ento kicwala woko ki aduku madit kun kimiyo akato ki iwang dirica ma ikom cel, ci omiyo abwot woko ki i cinge.