2 Jo Korint 10

Pido pa Paulo pi tice ma kilwonge iye

1An Paulo akok botwu kun abako doga pi mwolo ki pi kica pa Kricito. An ma kiwaco ni amwol dok awor bene ka atye kacel kwedwu, ento abedo ger ka atye cen kamabor. 2Alegowu ni ka abino botwu, pe wumiya abed ki kit gero ki tekcwiny ma ageno ni atwero bedo kwede ikom jo mogo ma gitamo ni wan walubu kit me lobo man. 3I adane wan wabedo i lobo, ento pe watye ka lwenyo lweny ikit me lobo. 4Pien jami lweny ma watiyo kwedgi me lwenywa pe obedo jami lweny me lobo man, ento gubedo jami lweny me tek pa Lubanga, ma turu cel gogo pa lumerokwa woko. 5Waturu kwede tam ma pe atir, ki kit wake ducu ma tinge malo me pyem, ma gengo dano miyo pe gingeyo Lubanga, kun wamako tam acel acel macalo opii, waketo ite loc pa Kricito. 6Dok bene wayube me miyo pwod ikom lujemo ducu ma gipe ki winy, kace nongo wun dong wutyeko mine kenwu me bedo luwiny.

7Amitoni Wunen gin matye ikinwu. Kace dano mo tye ki gen ni en dano pa Kricito, kong myero otam bene ni, macalo en dano pa Kricito, wan bene watye kitmeno. 8Pien kadi bed anyate matek tutwal pi twero ma Rwot omiyo botwa, lewic pe bimaka. Pien en omiyo twero meno botwa me konyowu, pi dongowu, ento pe me dwokowu cen. 9Pe amitoni anen botwu macalo ngat matye kaburuwu ki waraga ma acoyogu. 10Pien dano gitye ka waco ni waragana pek dok gwa, ento ka ao botwu nongo anen goro, dok wa loka ma aloko botwu bene konye peke. 11Jo macalo meno myero guniang ni, pe tye apokapoka mo ilok ma wacoyo i waragawa ka watye cen kamabor, ki gin ma wabitimo ka watye kacel kwedwu.

12Pe watinge me kete kenwa i rwom acel ki dano mogo ma ikin jo ma gimaro kore ken gi, nyo me pore kenwa kwedgi. Kit ma gitye ka pime kwede ikin gi keken gi, dok bene gipore ken gi ki gin me poregi ma ginongo ikin gi ken gi, kit jo macalo meno gin luming. 13Ento wan giwa pe wabinyate makato kare; wabigik mewa ki tic mayam Lubanga opoko botwa, ma wun bene wutye iye. 14Wan pe wamedo wangcowa. Wan watiyo idwol ma kipoko botwa keken ikare ma wabino botwu, pien wan aye mayam wakwongo bino botwu me tito lok me Kwena Maber ikom Kricito. 15Pe wanyate ma okato kare ikom tic ma jo mukene aye guyele iye; ento watye ki gen ni ka niyewu dong omede, ticwa bene bimede matek ikinwu, kun lubu kama yam kityeko poko botwa. 16Man bimiyo watito lok me Kwena Maber i lobo mukene ma gitye tung kupotoceng, kun pe wanyate pi tic ma jo mukene gutiyo i katic pa ngat mukene. 17Ento yam kicoyo ni,1 “Ngat ma nyate myero onyate pi Rwot.” 18Pien pe ngat ma pake kekene en aye ma Lubanga pwoyo, ento dano ma Rwot dworo.