2 Jo Korint 9

Jami ma kimiyo pi konyo jo pa Lubanga

1Kombedi pe dong mite ni aco waraga botwu ikom lok me mot ma kimiyo pi konyo jo pa Lubanga. 2Pien angeyo miti ma wutye kwede me miyo kony, omiyo atye ka nyate pirwu mada bot jo Makedonia kun awaco botgi ni, jo me Akaya guyube woko wa con cake i mwaka mukato. Pi cuke ma wubedo ka cuke kwede, omiyo polgi bene guketo cwinygi. 3Dong acwalo utmegiwa botwu enu wek nyatewa pirwu ilok man pe ogik ilok keken, ento myero wubed ma wuyube ikit ma awaco botgini. 4Kace ao kunu ki jo Makedonia mogo, ka kibinongo ni pe wuyube, ci miyo doga two woko, pi gen ma onongo waketo ikomwu; ento wun kono lewic pe bimakowu? 5Meno aye gin ma omiyo atamo me cuko cwiny utmegiwa me kwongo nyima me bino botwu, wek gin aye kong gunen ka wuyubu mot man mayam wucike me miyoneni; wek dong obed ma kiyubu woko macalo mot ma wumiyo giwu ki cwinywu kenwu ma pe kidiyowu iye adiya.

6Lok tye kit man ni, dano ma coyo kodi manok, bikayo bene manok, ngat ma coyo kodi madwong, bikayo bene mabup. 7Dano acel acel myero otim kit macalo cwinye mito, labongo gungcwiny mo nyo dic mo. Pien Lubanga maro ngat mamiyo jamine ki yomcwiny. 8Dok Lubanga twero miyo botwu jami mabeco mapol ata, wek kare ducu wubed ki jami ma romowu maber, ma weko wun bene wutwero miyo kony mabup pi konyo tic ducu mabeco. 91 Macalo yam kicoyo ni,

“Ocoro jamine mapol, omiyo ki lucan,

bere bedo nakanaka.” 102

Ngat mamiyo kodi bot dano ma laco kodi, ki cam me acama, bimiyowu kodi dok binyayone bene, ci dong miyo gin ma oa ikom cwiny maber ma wutye kwede bedo dit tutwal. 11En bimiyo wulony i yo ducu, maromo miyo wubedo ki cwiny maber me miyo mot ikare ducu; ci ka watero mot man bot jo mamito kony ci bimiyogi pwoyo Lubanga. 12Pien tic me kony macalo man ma wutiyo bikelo gin mamite bot jo pa Lubanga; pe meno keken, ento bikelo bene pwoc madit tutwal bot Lubanga. 13Pi gin maber ma ticwu kelo, bimiyo jo mapol gimiyo deyo bot Lubanga, pien nyutu winy maber ma wutye kwede ilok me Kwena Maber ikom Kricito ma watito, ki pi cwiny maber ma wupoko kwede limwu bot jonu ki bot jo mukene ducu. 14Gin bilego Lubanga pirwu bene kun cwinygi paro pirwu, pi kica pa Lubanga madit ma okato kare madong onen ikomwu. 15Kipwo Lubanga pi mote maber ma pe wace.