2 Jo Korint 8

Miyo mot pa Lukricitayo

11

Utmegiwa, wamito ni wunge pi cwiny me kica ma oa ki bot Lubanga ma onen bot lwak dano ma guye Kricito ducu ma gitye i Makedonia. 2Gin guciro peko ducu ma gulimo; ento yomcwinygi obedo dit mada en ma omiyo gumiyo mic madit ma okato kare. 3Pien gin yam gumiyo mic ma giromo miyone, ki makatone bene, kit ma an ki koma aneno kwede, pe kidiyogi iye adiya. 4Gin gulegowa ma gibako dog gi ni watim ber, waye gin giribe kwedwa i konyo jo pa Lubanga. 5Yam gutiyo tic mukato genwa woko, pien gukwongo mine ken gi bot Lubanga, ka dong pi mit pa Lubanga gucako mine ken gi botwa bene. 6Ka dong wacuku cwiny Tito ni, kit macalo yam dong en ocako tic man me kica ikinwu, myero bene dong ocob woko. 7Dong macalo wun wutiyo tic maber i yo ducu: ikom niye, iloko lok, ingec, iketo cwinywu ki i mar ma wutye kwede ikomwa, ber wumede bene i tic man me kica.

8Gin ma alokoni pe obedo cik ma an aye amiyo, ento anyutu botwu kit ma jo mukene giketo cwinygi, wek anen mar ma wutye kwede ka obedo mar me ada. 9Pien wungeyo cwiny me kica ma Rwotwa Yecu Kricito obedo kwede; kadi bed nene en lalonyo, ento pirwu oloke odoko lacan, wek icane ni wun wudok lulonyo. 10Man tama ma amiyo ilok man: twero bedo ber ka wutyeko gin mayam wucako i mwaka mukatoni woko. Yam wun aye wubedo jo mukwongo, pe i tic keken, ento i yeyo me tiyo tic bene. 11Kombedi amito wumede wuwot anyim ki ticwu ca, wucob woko. Wubed ki miti me tyekone marom aroma ki maca mayam wukwongo kwede, kun wukwanyo gin mamite ki ikom gin matye botwu. 12Lubanga gamo mot ma dano tye kwede, teke en obedo ki miti me miyone, ma pe paro gin ma pe etye kwede. 13Pe awaco ni jo mukene gubed maber, wun aye can odiwu, ento ni dano ducu gubed maromrom. 14Kit macalo kombedi wutye ki jami mabupi, wukonygi icangi, wek ka wang mo gin gubedo ki jami mabup, gin bene gubikonywu ki gin murem botwu, ci dong miyo wubedo maromrom. 152 Macalo yam kicoyo ni,

“Ngat ma ocoko mabup, pe obedo ki mapol ma okato kare,

ngat ma ocoko manok mo, pe obedo ki manok ma okato kare.”

Tito ki luwote

16Wapwoyo Lubanga pien oketo i Tito miti madwong marom ki mewa me konyowu. 17En pe ojolo legawa keken, ento cwinye tye iye matek, ma omiyo en gire bino botwu pi mitine kene. 18Waore kacel ki ominwa ca ma ngene tutwal bot jo ducu ma guye Kricito pi kit ma en tito kwede lok me Kwena Maber. 19Pe meno keken, ento lwak dano ducu ma guye Kricito yam guyere me wot kacel kwedwa i tic man me kica ma watye katiyone pi miyo deyo bot Rwot, ki pi mitiwa me miyo kony bot dano. 20Watemo gwoke matek wek ngat mo pe onong bal mo ikit ma watye katic kwede ki mot man mabup ma kiketo i cingwani. 213 Tamwa tye me timo gin maber, pe inyim Lubanga keken, ento kadi wa inyim dano bene. 22Dong waorogi kacel ki ominwa mukene ma wabedo ka temo kite pi kare malac, ci wanongo ni en obedo dano ma keto cwinye ikom tic mapol, ento i kareni dong tye kaketo cwinye matek tutwal makato mayam con, pi gen madit ma en tye kwede ikomwu. 23Tito lawota dok latic wadiwa pirwu, ki utmegiwa mukenegu, gin lukwena pa jo ducu ma guye Kricito, gin bene aye jo makelo deyo bot Kricito. 24Pimeno, wunyut mar ma wutye kwede woko kamaleng bot dano ducu ma guye Kricito, wek gunen ni nyatewa ma wanyate kwede pirwu onongo tye atir.