2 Jo Korint 7

1Wun ma amaro, cike meno yam kiciko pirwa. Pimeno, myero walonye woko kekenwa i gin mo ducu ma cido komwa nyo cwinywa, kun walworo Lubanga, wek wadoku jo maleng atikatika.

Yomcwiny pa Paulo pi ngut pa jo Korint

2Wuyab cwinywu botwa; pe watimo ngat mo marac, pe wabalo ikom ngat mo, pe bene wabuyo ngat mo pi mito lim. 3Pe awaco man ni wek kop olowu, pien yam awaco botwu kong ni wun pirwu lit botwa mada, wek wato dok wakwo kacel kwedwu. 4Atye ki gen mada ikomwu; awake bene matek pirwu. Cwinya okwe maber, dok apong ki yomcwiny icanwa ducu. 51

Cake ikare ma wao i Makedonia pe wabedo ki yweyo mo. Can onongo orumuwa woko i yo ducu, lweny ikin dano ki lworo ma onongo tye icwinywa. 6Ento Lubanga ma kweyo cwiny jo ma can obwoyogi, okweyo cwinywa pi bino pa Tito. 7Pe pi binone keken, ento bene pi kit ma wun wukweyo kwede cwinye. En otito botwa kit ma wucuku kwede cwinye, dok bene otito pi cwercwiny ma wutye kwede, ki kit ma kee nena nekowu kwede, ci omedo yomcwinya ameda.

8Kadi bed waragana ca yam ocwero cwinywu, an pe dong angut pi coyone, kadi bed yam angut pien aneno ni waraga ca ocwero cwinywu pi kare mo. 9Kombedi an cwinya yom, pe teloke ni pien awango cwinywu, ento pien wangcwinywu omiyo wungut. Wangcwinywu meno onongo oa ki bot Lubanga, wek pe wunong can mo ki botwa. 10Pien wangcwiny ma Lubanga miyo kelo ngut ma tero dano i lare, ma koko ange mo peke iye; ento wangcwiny me lobo kelo to. 11Kong wunen kit ma Lubanga otiyo kwede ki wangcwinywu! Dong wunen kit ma wuketo kwede cwinywu, kit madong wuketo kwede tek me nyutu ni wupe ki bal, kit akemowu, kit lworo, ki kit ma wuculu kwede kwor! Wun dong wutyeko nyute woko kenwu i yo ducu ni pe wutye ki bal mo ilok meno. 12Ma omiyo kadi bed acoyo botwu waraga, pe acoyo pi ngat ma otimo gin marac, kadi pi ngat ma gitimo gin marac ikome, ento acoyo wek omii kit ma wuparo kwede pira onen woko kamaleng botwu inyim Lubanga. 13Man en aye gin ma omiyo cwinya okwe.

Medo ikom kweyo cwinywa, yam wabedo ki yomcwiny mada pi yomcwiny pa Tito, pien wun ducu wukonyo me kweyo cwinye. 14Kadi bed yam awake inyime pirwu, lewic pe omaka; ento kit macalo yam lok ducu ma wabedo katito botwu obedo lok me ada, kitmeno wakewa bene inyim Tito obedo me ada. 15Kace en po ikom kit macalo wun ducu wuwinye kwede, ki kit ma wujole kwede ki lworo ki myelkom, ci mar mede ameda i iye ikomwu. 16An cwinya yom, pien atye ki gen madit ikomwu i yo ducu.