2 Jo Korint 6

1I ticwa kacel ki Lubanga bene walegowu ni, kit madong wunongo kwede kica pa Lubangani, pe dok wuwek obale nono. 21 Pien Lubanga waco ni,

“Yam awinyi ikare me timo dano maber,

yam akonyi ikare me laro dano.”

Wunen, man aye kare ma kitimo iye ber bot dano. Tin aye nino me lare. 3Wan pe wamito waket ariya mo i yo pa ngat mo, wek dano pe guwac ni ticwa rac; 4ento wan macalo lutic pa Lubanga ikare ducu wanyutu berwa kenwa i yo ducu: kun waciro can, ki peko, ki ayelayela ma odiyowa matek tutwal. 52 Kipwodowa, kitweyowa i buc, dano guroko lwak me lweny ikomwa, watiyo tic matek, ma nino ki cam bene remowa. 6Wanyutu ni wan lutic pa Lubanga pi kitwa maleng, pi ngec ma watye kwede, pi diyo cwinywa ki pi kicawa. Pi Cwiny Maleng, ki pi mar ma watye kwede ma goba peke iye, 7pi tito lok me ada, ki pi tek pa Lubanga. Dong wamako jami lweny me kit ma atir i cingwa ryoryo, tung acuc ki tung acam. 8Kiketo deyo ikomwa, dok bene kiketo lewic ikomwa, kiyetowa dok bene kipakowa. Kiterowa macalo lugoba, ento kun wan jo me ada. 9Kiterowa macalo jo ma pe gingene, ento ki ngeyowa tutwal. Kilokowa wadoko calo jo ma oto, kun wan mere jo makwo. Kadi kitimwa gujiguji, pe kinekowa; 10kadi kimiyo wakumu, cwinywa nongo pud bedo yom nino ducu; wanen macalo lucan, ento wan aye ma wamiyo jo mapol gudoko lulonyo; wanen calo pe watye ki gin mo, ento kun kono watye ki jami ducu.

11Wun jo Korint, wan dong waloko kwedwu kamaleng, dok bene dong wanyutu mar ma icwinywa botwu. 12Wan pe cwinywa oa woko ikomwu, ento wun aye cwinywu oari woko ki ikomwa. 13An aloko kwedwu macalo wun lutinona; kit ma watimowu kwede, wun bene wutim kitmeno; wuket cwinywu ikomwa me marowa.

Ot pa Lubanga makwo

14Pe wuribe kun wubedo kacel ki jo ma pe guye Yecu, pien kitwu patpat. Dong kit ma atir ki tim maracu gitwero bedo lurem ningning? Dero ki colpiny gitwero ribe gibedo kacel ningning? 15Dong tam pa Kricito ki pa Catan twero rwate? Gin ango ma dano ma oye Yecu twero nywako gin ki ngat ma pe oye? 163 Ot pa Lubanga kono twero ribe ningning ki cal jogi? Pien wan aye wabedo Ot pa Lubanga makwo; macalo en Lubanga dong owaco ni,

“An abibedo i igi, kun awoto ikin gi,

abibedo Lubangagi,

gin bene gibibedo jona. 174

Pimeno dong wua woko ki ikin gi.

Wupoke woko kwedgi,

pe wugud gin mo ma kome kikeni,

ci abijolowu. 185

Abibedo Wonwu,

wun bene wubibedo awobena ki anyirana;

man lok pa Rwot Won Twer Ducu.”