2 Jo Korint 5

1Pien wangeyo ni ka komwa me lobo man obale woko, ma wabedo iye macalo wabedo ikemani wan watye ki gedo mukene ma Lubanga bimiyo botwa, ot ma pe kigero ki cing, ot matye ma bibedo matwal i polo. 2Piman wan ma wacur acura i bolo man kun wamito matek ni kirukwa ki kom ma a ki i polo, 3pien ka dong watyeko rukune, ci pe kibinongo ni dok watye munero. 4Pien ka pud watye i kema man, wacur acura pi peko ma odiyowa; pe ni wamito lunyu komwa me loboni woko, ento wamito ni waruk kom manyen iwi man, wek gin ma kwo omwony gin ma to woko. 5Ngat ma oyubuwa pi lok man kikome aye Lubanga, dok bene omiyowa Cwinye calo gin ma Lubanga omiyo ma moko ni en bicobo gin ma en ociko.

6En ma omiyo nino ducu wadiyo cwinywa maber, kun bene wangeyo ni, ka watye i paco me komwa eni, wabedo bor ki Rwot, 7pien kwowa cung ikom niye, pe i neno piny ma waneno. 8Wan wadiyo cwinywa maber, kun watamo ni twara wawot ma wabwoto komwa woko, wek wabed paco bot Rwot. 9Dong kadi watye i paco kany nyo kunu, waketo cwinywa me bedo jo ma giyomo cwiny Rwot. 101 Pien wan ducu myero wacung inyim Kricito wek ongol kop ikomwa, wek dano acel acel onong gin ma otiko en, ma lubu kit mayam otiyo ikare ma pud tye ikom, ka ber nyo ka rac.

Roco wat ki Lubanga i Kricito

11Dong macalo wangeyo ni Rwot myero kilwor, watemo ywayo tam pa dano, ma kitwa nen woko kamaleng bot Lubanga; ageno bene ni kitwa otyeko nen botwu ki ngec matye icwinywu ma nyutiwu bal. 12Pe dok wapake kenwa, ento watye kamiyo botwu gin ma myero wuwake kwede pirwa, wek wubed ki yo me gamo dog jo ma giwake pi gin manen ki woko, pe pi kit ma dano tye kwede i cwinye. 13Ka dong wadoko jo ma lupoya, wapo giwa pi Lubanga; ento ka wiwa tye katic maber, meno bikonyowu. 14Pien mar pa Kricito loyo kwowa, pien dong waniang maber kit man ni, ngat acel oto pi jo ducu, ma omiyo jo ducu dong guto. 15En yam oto pi dano ducu, wek jo makwo pe gumede ki bedo kwo pirgi ken gi, ento gubed ki kwo pi ngat mayam oto ka ocer pirgi ca.

16En ma omiyo cake kombedi, wan pe wangeyo dano mo ikit me lobo man; kadi bed yam wangeyo Kricito ikit me lobo, pe dok wangeye kitmeno. 17En ma omiyo ka ngat mo tye i Kricito, en dong bedo gin ma kicweyo manyen; gin macon nongo dong orwenyo woko, gin manyen dong oleyo kakare. 18Meno ducu obedo tic ma Lubanga otiyo, mayam odwokowa kwede bote, pi Kricito, dok bene omiyowa tic me dwoko dano bote. 19Man teloke ni, i Kricito, Lubanga onongo yam tye ka dwoko dano ma i lobo bote, kun pe okwano balgi ikomgi, dok bene omiyowa lok me kwena ikom kit ma en dong odwokogi kwede bote. 20En ma omiyo wadoko lukwena, luwang Kricito; Lubanga legowu ki dwonwa, wan bene wabako dogwa botwu ma ka Kricito ni, Wuwek Lubanga odwokwu bote. 21Ngat mayam pe ongeyo bal, Lubanga oloke odoko bal pirwa, wek i en wadok jo ma nywako kit pa Lubanga matye atir.