2 Jo Korint 4

Lonyo ma kikano i atabo lobo

1Pimeno, wan madong kiorowa i tic man pi kica pa Lubanga cwinywa pe dok tye ka dok cen. 2Wan dong wadag kit tic ducu me lewic ma kitiyo i mung; dok bene watyeko kwero tic me bwolo woko ki nyobo lok pa Lubanga, ento pi tito lok ada kamaleng, wabiwot inyim Lubanga kun nongo wa nyute bot dano acel acel ikit matye atir. 3Kace lok me Kwena Maber ma wan wakelo oume woko, nongo oume ki tung bot dano ma gitye ka rwenyo woko arwenya. 4Pien ki tung botgi, lubanga me lobo man dong oumu tamgi woko wek pe gunen dero me lok me Kwena Maber ikom deyo pa Kricito, ma en cal pa Lubanga kikome. 5Wan pe watito lok ikomwa kenwa, ento ikom Yecu Kricito, ma en aye obedo Rwot, ma wan ki komwa wadoko luticwu pi Yecu. 61 Pien Lubanga mayam owaco ni, “Dero myero oryeny kun a ki i colpiny,” en aye ma bene omiyo derone dong oryeny icwinywa. Oweko okelo ki wan dero me ngec me deyo pa Lubanga maryeny iwang Kricito.

7Ento wan ma watye ki lonyo man me cwiny warom ki atabo ma kicweyo ki lobo, me nyutu ni tek madwong me twero obedo gire pa Lubanga, pe oa ki botwa. 8Peko diyowa tungi ki tungi, ento pe bwoyowa; wiwa cung woko, ento genwa pe bale; 9kiunuwa, ento Lubanga pe wekowa ata; kibolowa piny i ngom ligwek, ento pe bene wato. 10Nino ducu watingo to pa Yecu ikomwa, wek kwo pa Yecu bene onen woko kamaleng ikomwani. 11Pien nino ducu wan ma wakwo wamine me to pi Yecu, wek omii kwo pa Yecu onen woko kamaleng ikomwa ma toni. 12Ma omiyo to tye katic ikomwa, ento kwo tye katic ikomwu. 132

Wan watye ki kit cwiny acelu me niye mayam omiyo kicoyo ni, “Aye, en ma omiyo aloko.” Wan bene waye, ma omiyo watye kalok. 14Wangeyo ni, ngat ma ocero Rwotwa Yecu bicerowa bene kacel ki Yecu, ci bikelowa inyime kacel kwedwu. 15Pien meno ducu otime pirwu, wek kica pa Lubanga omede bot jo mapol, wek gin bene gumede ki pwoc madwong makelo deyo bot Lubanga.

Kwo ki niye

16En aye gin ma omiyo cwinywa dok pe tye ka dok cen. Kadi bed kwowa ma woko tye ka bale, ento kwo ma i iwa tye ka roc, doko nyen nino ki nino. 17Pien aun ma kiunuwa kwede pe pek, bedo pi kare manok mo keken, dok bene tye ka yubu botwa deyo mapek ma pe tum, madit matek makato ducu. 18Pien pe waciko wangwa ikom gin manen, ento ikom gin ma pe nen. Gin manen bedo pi kare manok mo keken, ento gin ma pe nen rii pi naka.