2 Jo Korint 3

Lutic me gicike manyen

1Wan dong wacako pake kenwa? Nyo ni wan bene wamito waraga ma pwoyo kitwa botwu, kit macalo jo mogo gitye kwede, nyo waraga ki botwu ma wun wucoyo ma pwoyo kitwa? 2Wun ki komwu aye dong wubedo waraga ma pwoyowa, ma kicoyo icwinywa, ma dano ducu gitwero ngeyo dok gikwano. 31 Dong wutyeko nyutu kamaleng ni wun wubedo waraga ma oa ki bot Kricito, ma wan wakelo. Pe kicoyo ki inki ento kicoyo ki Cwiny pa Lubanga makwo, pe bene kicoyo ikom got, ento kicoyo i cwiny dano.

4Aloko kitmeno labongo akalakala mo, pien wacung matek ikom Lubanga pi Kricito. 5Wan ki komwa pe waromo timo gin mo kenwa; tekwa ducu oa ki bot Lubanga. 62 En bene ma omiyo waromo bedo lutic me gicikene manyen ma pe obino pi cik, ento pi Cwiny Maleng. Pien cik ma kicoyo acoya kelo to, ento Cwiny Maleng kelo kwo. 73

Cik mayam kigoro ki nukuta ikom got apaya ma tice me kelo to, onongo obino ki deyo, omiyo neno wang Moses oloyo jo Icrael pi nyim Moses muryeny ocaro wanggi woko, ento meno obedo ka ryeny woko motmot ki itur nyim Moses, 8ci dong tic pa Cwiny pa Lubanga deyone pe dong kato maca matek tutwal? 9Pien ka tic mamiyo kop loyo dano tye ki deyo, ci tic mamiyo kikwano dano ni kitgi atir deyone pe dong kato maca woko? 10Kombedi dong gin mayam tye ki deyo dong odoko gin ma peke ki deyo kadi ki acel mo, pi deyo mukene ca madong kate matek tutwali. 11Pien ka gin mayam orii pi kare manok mo obino ki deyo, ci gin ma rii matwal omyero dong obed ki deyo madit makato ducu.

12Pien wan watye ki kodi gen man, en ma omiyo waloko ki tekcwiny. 134 Pe dok wacal ki Moses mayam oumu wange ki bongo, wek jo Icrael pe gunen kit maryeny me deyo ca ma ocaro wanggi ni tye ka rwenyo woko kwede itur nyime. 14Ento onongo tamgi yam oume woko; pien nio wa tin tamgi pud oume ikite acelu ka kikwano botgi gicike macon, pien laum ca twero kwanye ka dano tye i Kricito keken. 15Kadi wa i kareni ka kikwano botgi cik pa Moses, laum ca pud oumu tamgi woko. 165 Ento ka dano mo oloke odok bot Rwot Yecu, laum meno Lubanga kwanyo woko matwal. 17Rwot ma waloko pire kanyi en Cwiny Maleng; kama Cwiny pa Rwot tye iye, kunu dano bedo agonya. 18Ki wan ducu madong gikwanyo laum woko ki i wangwa watye macalo kiyo mamiyo deyo pa Rwot nen macalo ryeny ceng, ma omiyo watye ka loke me doko calo en, kun deyone mede ameda ikomwa; meno aye tic pa Rwot, ma en Cwiny Maleng.