2 Jo Korint 2

1Piman amoko tama pe me dwogo botwu wek pe akeliwu cwercwiny. 2Ka awango cwinywu, ci anga ma biyomo cwinya? Pe en dano ma awango cwinyeni? 3Meno en gin ma omiyo yam acoyo waraga maca botwu, wek ka abino, jo ma myero guyom cwinya pe gumiya cwercwiny, pien onongo ageno wun ducu kun angeyo ni, yomcwinya en aye yomcwinywu bene. 4Yam acoyo botwu waraga kun pig wanga cwer madwong tutwal pi cwercwiny ki kumu ma abedo kwede, pe pi cwero cwinywu, ento wek omii wunge mar madit ma atye kwede ikomwu.

Timo kica ki labalo

5Ka ngat mo okelo cwercwiny, nongo pe ocwero cwinya, ento nongo ocwero cwiny wun ducu. (Awaco kit man pien pe myero awac lok mapek mukato kare.) 6Kit dano macalo meno, pwod ma jo mapol ma ikinwu guketo ikome twero rome. 7En ma omiyo myero dong wutime kica, dok wukwe cwinye, wek cwercwiny madit mukato kare pe dok onure woko. 8Man omiyo abako doga botwu, myero wunyut bote mar ma wutye kwede ikome. 9Man aye lok ma omiyo yam acoyo waraga maca, me temowu, wek anen ka wuwinya i yo ducu. 10Ka wutimo kica ki ngat mo, an bene atime kica. Pien ka atimo kica ki dano pi bal mo, atimo meno pirwu inyim Kricito, 11wek Catan pe olowa ki ryekone, pien wan pe wakwiya tame.

Bale pa cwiny Paulo i Teroa

121

Ma dong ao i Teroa pi tito lok me Kwena Maber ikom Kricito, yam anongo ni Rwot oyaba yo; 13ento cwinya pe opye pien pe anongo omera Tito kunu. Ci aciko jo ma kunu, ka akato acito i Makedonia.

Loc matye i Kricito

14Pwoc obed bot Lubanga ma nino ducu telowa i loc matye i Kricito, dok tiyo kwedwa wek ngec ikom Kricito ongene, macalo gin makur ma ngwece duny ikabedo ducu. 15Pien wan wabedo gin makur ma Kricito owango me atyera bot Lubanga, ma ngwece duny mamit ikin jo matye i yo me lare ki jo matye i yo me rwenyo. 16Dong bot jo matye ka rwenyo, en obedo gin ma ngwece kec makelo to; ento ki bot jo matye ka lare, en obedo gin ma ngwece kur makelo kwo. Anga mono matwero tic man? 17Wan pe wacal ki pol pa dano mukene, ma gitito lok pa Lubanga pi nongo magoba; ento wan watito mere lok pa Lubanga keken, watito i Kricito ma cwinywa leng inyim Lubanga, macalo jo ma Lubanga ooro.