Nia 28

Bongo me aruka pa ajwaki

(Nia 39:1-31)

1Rwot owaco ki Moses ni, “Kel omeru Aron ki awobene, Nadab ki Abiu, Eleajar ki Itamar cok boti wek guti tic ajwaki bota.

2Ibikwoyo bongi maleng pi omeru Aron, me deyo dok mamwonya. 3Dok ibiwaco bot jo makwiri ducu, ma apongo cwinygi ki kwiri, ni gukwo bongo aruka pi Aron me kwero en pi tic me bedo ajwakana. 4Man aye bongi aruka ma kibikwoyo: kicaa kor, epod, jor, kanyi ma kingweko kome, kitambara adwala me wic ki kitambara latwe pyer; myero kikwogi gubed bongi aruka maleng pi omeru Aron ki awobene pi ticgi me bedo ajwakina.

5Gin bigamo jabu, uci mabulu ki ma lamarlamar ki makwar, ki bongo camanini ma kiwiyo maber. 6Kibikwoyo epod ki jabu ki uci mabulu ki ma lamarlamar ki makwar, ki bongo camanini ma kiwiyo maber, ma kikwoyo ki diro. 7Bibedo ki gin wigwoke aryo ma kikubu idoge ryoryo, wek okube kacel. 8Ceme me latwene ma kicweyo ki diro ma kikwanyo ki ikom bongo acelu kibikwoyone ikom Epod, wek gubed kacel. 9Ibikwanyo lutino kidi onik aryo, ci ibigoro nying awobe pa Icrael ikomgi. 10Nying awobe abicel ikom kidi onik acel, ki nying awobe mudonge abicel ikom kidi onik mukeneni, kun ilubu ki dito me nywalogi. 11Macalo ladiro goro kom kidi, in bene ibigoro nying awobe pa Icrael ikom kidi aryoni. Ibimwonogi ikom jabu ma kingweko kome ki diro ma okwako tere. 12Ci dong ibiketo lutino kidi aryo meno igin wigwok epod, gubed kidi me po pi awobe pa Icrael; Aron bitingo nyinggi iwi gwoke aryo ducu me po pirgi inyim Rwot. 13Yub gin lakwak tere ki jabu ma kingweko kome ki diro; 14dok iyub nyor aryo me jabu ma kiliyo maber ma kiminogi macalo tol; ka imwon tol nyor meno ikom gin lakwak tere.

Bongo kor

(Nia 39:8-21)

15Dok ibikwoyo bongo kor me aruka ka kimito niang gin ma Lubanga mito ki tic me diro; ibiyubu macalo tic ikom epod; ibiyubu ki jabu, ki uci mabulu ki ma lamarlamar ki makwar, ki bongo camanini makiwiyo maber. 16Ibibano iye aryo ma bore ki lace rom ki dye cing acel. 17Ci ibimwono iye lutino kidi me wel ma guryeyo tyeng angwen. Ityeng mukwongo kibiketo iye cadiuc, topaj ki kabankel. 18Tyeng me aryone omyero obed emeradi, capir ki dayaman. 19Tyeng me adeke omyero obed jacint, agat ki ameticito; 20ki tyenge me angwen omyero obed berul, onik ki jacipa; kibimwonogi i jabu ma kingweko ki diro. 21Lutino kidi ducu bibedo apar wiye aryo ma nying awobe pa jo Icrael kigoro ikomgi muporo kakagi apar wiye aryo. 22Yub bene nyor aryo ki jabu ma kiliyo maber ma kiminogi macalo tol, me tweyo bongo kor. 23Ibiyubu agit me jabu aryo, pi bongo kor, ci iket agit aryoni ikom dog bongo kor aryo. 24Dok irwak tol jabu aryoni odony i agit aryo ma gitye ikom bongo kor. 25Ki dog tol aryoni ibimwonogi ikom gin lakwak tere aryo me jabu ma kingweko ki dironi, me tweyo bongo kor igin wigwok epod tung nyime. 26Dok iyub agit me jabu aryo, ci iketgi itwok bongo kor aryo ducu ikom doge ma tung iye macok ki epod. 27Yub agit jabu mukene doki, ci ikubgi igin wigwok epod aryo anyim tung tere, kama okube tung malo iwi ceme me epod ma kicweyo ki diro. 28Kibitweyo bongo kor ki agite ikom agit me epod ki tol mabulu, wek kitwe obut opyele iwi ceme me epod ma kicweyo ki diro, wek bongo kor pe ogonye woko ki ikom epod. 29Wek Aron oting nying awobe pa Icrael ibongo kor me ngolo kop ipal cwinye ikare me donyo i Kabedo Maleng nino ducu, wek obed me po ikomgi inyim Rwot. 30Ibiketo Urim ki Tumim wek gubed i bongo ma ikor Aron ikare ma en donyo inyim Rwot; kitmeno Aron bitingo ngolo kop pa jo Icrael ipal cwinye nino ducu inyim Rwot.

Gin aruka mukene pa ajwaki pa Lubanga

(Nia 39:22-31)

31Dok ibiyubu jor me epod makome ducu obedo bulu. 32Kituc doge obed twolo idyere pi rwako wic; kibicweyo kun kidolo doge macalo dog bongo aruka ma kidolo orumu woko liking, wek pe oyeci. 33Idog bongo ibilungu iye gin muporo okwer pomegranat ma onyak ma kikwoyo ki uci mabulu, ki ma lamarlamar, ki makwar, orum dog jor ducu, kun ingobo kin gi ki olang me jabu; 34olang jabu ki okwer pomegranat orum dog jor ducu kun gigwenye agwenya. 35Aron biruku ka donyo katic, ci dwon olang bikok winye ikare ma en donyo i Kabedo Maleng inyim Rwot, ki ikare ma en kato woko, wek pe oto.

36Ibiyubu akwaya jabu ma kiliyo maber, ci igor ikome ni, gin ma ‘Kidyero bot Rwot.’ 37Ci kibitweyo kun kirido ikom kitambara adwala me wici ki tol mabulu. 38Kibiketo cung itur nyim Aron, ci Aron bitingo alii me bal pi jami maleng ma jo Icrael gityero me bedo motgi maleng; bicung itur nyime jwijwi, wek Rwot ogamgi.

39Ibicweyo kanyi ki bongo camanini maber ma kingweko kome, iyub kitambara me adwala i wic ki bongo camanini maber, ci iyub bene kitambara me latwe pyer ma kideyo maber.

40Pi awobe pa Aron ibikwoyo kanyi ki kitambara latwe pyer, ki tok matino; ibiyubugi obed mamwonya me deyo. 41Ibirukugi ikom omeru Aron kacel ki awobene, ibiwirogi ki moo me ketogi i dog tic, pi kwerogi pi tic maleng, wek guciwora i tic me ajwaki. 42Dok ibikwoyo pali bongo camanini pirgi me umu ludokgi nia i pyergi nio i emgi. 43Aron ki awobene bene birukugi ikare me donyo i Kema me Rwate, nyo ikare ma gin cito cok ki keno tyer pi tic i Kabedo Maleng; wek pe guting alii me bal, miyo gin to woko. Man bibedo cik matwal bot en ki bot likwaye ma bilube.”