Nia 29

Kwero Aron ki awobene me bedo ajwaki pa Lubanga

(Lev 8:1-36)

1“Man aye gin ma ibitimo ikomgi ka ikwerogi, wek guciwora i tic macalo ajwaki. Kwany wod twon acel ki nyogi romi aryo ma mwonyo pe ikomgi, 2ki Mugati ma Tobi Pe iye, ki capat ma tobi pe iye ma kirubu ki moo, ki capat marep ma kireyo moo ikomgi. Ibiyubugi ki moko ngano ma pwote. 3Ibiketogi i aduku acel, ci ibikelogi ki aduku meno, ka ibikelo bene wod twon ki nyogi romi aryo. 4Ibikelo Aron ki awobene inyim dogola Kema me Rwate, ci ibilwoko komgi woko ki pii. 5Ibikwanyo bongi aruka, ci ibiruku Aron ki kanyi, ki cati, ki jor me epod, ki bongo kor, ci ibitweyo pyere ki ceme me epod ma kicweyo ki diro. 6Ibidwalo kitambara adwala i wiye, ka iketo lalukana maleng cung iwi kitambara adwala. 7Ka ibikwanyo moo me wir, i wire kwede.

8Ka dok ibikelo awobene, irukugi ki kanyi; 9ci ibitweyo pyergi ki kitambara latwe pyer, ka itwe tok matino i wigi; ci tic me ajwaki bibedo meggi pi cik ma bibedo matwal. Ibiketo Aron ki awobene i dog ticgi kitmeno.

10Dok ibikelo twon inyim Kema me Rwate, ci Aron ki awobene gibiketo cinggi i wiye. 11Ibineko wod twon meno inyim Rwot, ki i dogola Kema me Rwate. 12Ibigwelo remo twon, ci ibireyo remone ikom ten keno angwen me keno tyer ki lwet cingi; ki remo mudonge ibionyo ite tedi keno tyer. 13Ibikwanyo dwolo ducu ma oumu jam iye, ki mukene ma ikom acwiny, ki olang aryo ki dwolo matye ikomgi, ci i wanggi woko iwi keno tyer. 14Ento ringo wod twon meno ki pyene ki wee iye, ibiwango awanga ki mac wa inge gony; en aye gitum me bal.

15Ka man otum ci ibikwanyo nyok romo acel ibimiyo bot Aron ki awobene ci gibiketo cinggi i wiye, 16ci ibineko nyok romo, ibijolo remone, ci icoro remone ikom keno tyer irumu kwede kome ducu.

17Dok ibingido ringo nyok romo matinotino ci ilwoko jam iye, ki tyene ducu, ci iketogi ikom ringo ma kingidoni, kacel ki wiye. 181Ibiwango ringo nyok romo woko ducu ki bere iwi keno tyer; en aye gitum awanga bot Rwot; ma en aye gin ma ngwece kur me layom cwiny, gityer ma kiwango ki mac bot Rwot.

19Ka lacen dok ibikwanyo nyok romo mukene; ci Aron ki awobene gibiketo cinggi i wiye, 20ci ibineko nyok romo, ibigwelo remone ci ibireyo i ogwilo it Aron ma lacuc, ki i ogwilo it awobene ma lacuc, ki ikom twon nyig tyen gi ma lacuc, ci ibicoro remo mudonge ikom keno tyer irumu kwede kome ducu. 21Ka ibikwanyo remo manok ma iwi keno tyer, ki moo wir, ci ibikiro ikom Aron ki ikom bongi arukane, ki ikom awobene ki ikom bongi arukagi, ci gin ducu bibedo maleng.

22Dok bene ibikwanyo dwolo nyok romo, ki moo yibe, ki dwolo ma oumu jam iye, ki mukene ma ikom acwiny, ki olang aryo kacel ki dwolo matye ikomgi, ki em tung lacuc, (pien obedo nyok romo me keto dano i dog tic). 23Ibikwanyo mugati acel ki capat acel ma kirubu ki moo, ki capat marep acel ma i aduku me Mugati ma Tobi Pe iye matye inyim Rwot. 24Ibiketogi ducu i dye cing Aron ki i dye cing awobene bene, wek gukwatgi me bedo gityer me akwata inyim Rwot. 25Ka dok ibikwanyo woko ki i cinggi, ci ibiwangogi woko iwi keno tyer, wek kimed ikom gitum awanga, obed gin ma ngwece kur ma yomo cwiny Rwot; en aye tyer ma kiwango ki mac bot Rwot.

26Dok ibikwanyo gok nyok romo me keto Aron i dog tice, ci ibikwato me bedo tyer me akwata inyim Rwot; en aye bibedo wang wat ma tung boti. 27Dok ibikwero gok me tyer me akwata, ki em me wang wat pa ajwaki, ma gikwato, ma gityero nia ki ikom nyok romo me keto dano i dog tic, pien en aye pa Aron ki pa awobene. 28Man bibedo wang wat pa Aron ki pa awobene ma myero jo Icrael gumii botgi kare ducu, pien en aye wang wat pa ajwaki ma jo Icrael myero gutyer nia ki igitumgi me tyer lakwecwiny, en aye gityergi bot Rwot.

29Bongi aruka pa Aron maleng ducu bibedo pa likwaye ma bilube; gin biruku ikomgi ka kiwirogi ki moo, me ketogi i dog tic. 30Latin awobi ma bileyo kakare i tic me bedo ajwaka birukugi tyeko kwede nino abiro, ikare ma en cito i Kema me Rwate katic i Kabedo Maleng.

31Ibitero ringo nyok romo me ketogi i dog tic, ci ibitedo i Kabedo Maleng. 32Ci Aron ki awobene gibicamo ringo nyok romo meno ki mugati matye i aduku, idogola Kema me Rwate. 33Gin bicamo jami meno ma kitiyo kwede me lakwany bal pi ketogi i dog tic ki kwerogi pi tic maleng, ento jo mukene pe gibicamone, pien gin jami maleng. 34Ka ringo mo me ketogi i dog tic, nyo mugati mo, odong nio odiko, ci kibiwango mudongi awanga ki mac; pe dok gibicamo, pien leng.

35Ibitimo bot Aron ki awobene kitmeno, kit macalo aciki kwede ducu; ibitiyo tic me ketogi i dog ticgi pi nino abiro. 36Ka dok ibityero twon acel pi gitum me bal nino ducu me lakwany bal. Dok ibitumu gitum me bal pi keno tyer, ka itimo gin lakwany bal ki ikome, dok ibiwire ki moo pi kwerone. 37Ibiyubu gin lakwany bal ki ikom keno tyer, ibikwere pi nino abiro, miyo keno tyer doko maleng makato ducu; dok gin ducu ma bigudu keno tyer bidoko maleng.”

Tyer me nino ducu

(Wel 28:1-8)

38“Magi aye gin ma ibityero iwi keno tyer: nyogi romi aryo ma ditogi romo mwaka acel acel en aye ibityerogi nino ducu. 39Ibityero nyok romo acel odiko ki nyok romo acel ibityero otyeno. 40Ibityero nyok romo mukwongoni kacel ki moko kwon mapwote maromo agwata moko kwon acel ma kirubu ki moo nyig jeituni ma kiodo aoda maromo cupa aryo ki nucu, ki bwino maromo cupa aryo ki nucu, me bedo tyer me amata. 41Dok ibityero nyok romo me aryoni otyeno, kacel ki tyer me moko kwon ki tyer amatane, macalo me odiko, pi bedo gin ma ngwece kur ma yomo cwiny, tyer ma kiwango ki mac bot Rwot. 42Man bibedo gitum awanga me nino ducu ma wubityero wa ikare pa likwayowu ducu, idogola Kema me Rwate inyim Rwot, kama abirwate iye kwedwu, pi lok kwedwu kunu. 43Abirwate ki jo Icrael kunu, ci deyona bilonyogi gibedo maleng. 44Abikwero Kema me Rwate ki keno tyer; ka dok abikwero Aron ki awobene pi ticgi bota me bedo ajwaki. 45Abibedo ikin jo Icrael, dok abibedo Lubangagi. 46Gin bingeyo ni An a Rwot Lubangagi, mayam akwanyogi woko ki i lobo Ejipt wek abed ikin gi; An a Rwot Lubangagi.”