Nia 30

Keno tyer me wango odok eceta

(Nia 37:25-28)

1“Ibiyubu keno tyer me wango odok eceta; ibiyubu ki bao yat okutu lalwii. 2Bore obed futi acel ki nucu, ki lace bene futi acel ki nucu; bore ki lace bibedo marom, bore tung malo obed futi adek; ten keno angwen ducu bene gubed ma gukube kacel kwede. 3Ibimwono kome woko ki jabu ma kiliyo maber, wiye ki bute ducu, ki ten keno angwen ducu; dok ibilulu doge ducu, irumu woko ki jabu. 4Ibiyubu agit me jabu aryo pire; ibiketo agit ki piny ite doge ma iluluni, kun agit acel acel keme ki wadi tungcel, ci ibirwako iye tal me tingone. 5Ibiyubu tal ki bao yat okutu lalwii, ibimwono komgi woko ki jabu. 6Ibiketo keno tyer man inyim bongo kicika ma umu Canduk lok me Gicike, inyim kom me kica ma iwi Canduk lok me Gicike, kama abirwate iye kwedi. 7Ci Aron biwango iye odok eceta ma ngwece kur. Nino ducu ka en yubu mac laput odiko, ci biwangone. 8Dok ka Aron keto mac laput malo otyeno, ci biwangone. Kitmeno kibiwango odok eceta nino ducu inyim Rwot, wa ikare pa likwayowu ducu. 9Pe wubityero iye odok eceta mo ata, kadi gitum awanga, kadi tyer me moko kwon; dok pe wuony iye tyer amata. 10Aron myero otim gin lakwany bal ikom ten keno angwen ducu ma ikome i mwaka acel kicel; en bitimo gin lakwany bal ki ikome ki remo me gitum me lakwany bal i mwaka acel kicel wa ikare pa likwayowu ducu: en aye gin maleng makato bot Rwot.”

Mucoro me Kema me Rwate

11Rwot owaco bot Moses ni 12“Ka icako kwano wel jo Icrael, ci ngat acel acel bimiyo gin lakok kwone kene bot Rwot ka ikwanogi, wek two gemo pe opot ikomgi. 131Dano acel acel ka ikwano wele biculu gin man: nucu cekel me Kabedo Maleng (cekel acel rom ki gera2 pyere aryo); nucu cekel meno bibedo tyer bot Rwot. 14Dano ducu ki acel acel ma dong kikwano wele, cake ikom jo ma ditogi romo mwaka pyere aryo ki makato, bimiyo tyer bot Rwot. 15Lalonyo pe bimiyo madwong, dok lacan bene pe bimiyo matidi ma pe rom ki nucu cekel, ikare me miyo tyer bot Rwot me lakwany bal ki ikomwu. 16Ibigamo lim me lakwany bal ki bot jo Icrael, i biketo pi tic me Kema me Rwate, wek obed me po pi jo Icrael inyim Rwot pi kwanyo bal ki ikomwu.”

Otako lwok

17Rwot owaco bot Moses ni, 183“Dok ibiyubu otako mola, ki tedi tere bene me mola, obed me lwok. Ibicibo cung ikin Kema me Rwate ki keno tyer; ka dong ibionyo iye pii. 19En aye kama Aron ki awobene gibilwoko iye cinggi ki tyen gi. 20Ikare ma gicito i Kema me Rwate, nyo ka gicito cok ki keno tyer katic iye, me wango tyer ma kiwango ki mac bot Rwot, gin kong bilwoke ki pii, wek pe guto. 21Gibilwoko cinggi ki tyen gi wek pe guto; bibedo cik botgi matwal, bote ki bot likwaye, wa ikare pa likwayogi ducu.”

Moo wir

224

Dok Rwot omede owaco bot Moses ni, 23“Kwany angwece mabecone makato: murra maliyo maromo kilo abicel, cinamon ma ngwece kur maromo kilo adek, lum ma ngwece kur maromo kilo adek, 24kaciya kilo abicel, ma kipimo ki kilo me Kabedo Maleng, ki moo jeituni maromo lita angwen. 25Man aye kit ma ibirubu ki moo maleng me wir, ibirubu ikit macalo kirubu ki moo ma ngwece kur;5 wek obed moo wir maleng. 26Ibiwiro ki Kema me Rwate ki Canduk lok me Gicike, 27ki meja ki jami tice ducu, ki lacib mac tara ki jami tice ducu, ki keno me odok eceta, 28ki keno tyer me gitum awanga ki jami tice ducu, ki otako lwok ki tedi tere. 29Ibikwerogi wek gubed jami maleng makato; dok gin mo keken ma bigudu komgi bidoko maleng. 30Dok ibiwiro Aron ki awobene, me kwerogi wek guciwora i tic me ajwaki.

31Dok ibiwaco ki jo Icrael ni, ‘Man aye bibedo moo na maleng me wir, wa ikare pa likwayowu ducu. 32Pe kibiwiro ki kom dano mo ata, pe wubiyubu mukene ma kirubu macalo en; en moo maleng, bibedo maleng botwu bene. 33Dok ngat ma birubu macalo meno, nyo ngat ma biwiro ikom dano mo ata, kibiryeme woko ki ikin lutugi.’”

Odok eceta

34Rwot owaco bot Moses ni, “Kwany angwece magi: citakte, onika, galbanu, ki odok luban ma kiliyo maber, (pekgi ducu obed marom). 35Ci iyub ki odok eceta maleng ma Kiliyo maber, ma kirubu ikit macalo larub gin ma ngwece kur rubu kwede, ci ipwor iye kado. 36Mukene ibiluru ingido matinotino tutwal, ci iket mogo inyim Canduk lok me Gicike ma i Kema me Rwate kama abirwate iye kwedi; bibedo botwu gin maleng makato. 37Pe wubitimo pirwu kenwu odok eceta ma kirubu macalo meno; bibedo gin maleng bot Rwot kitung botwu. 38Ngat ma birubu moo macalo meno me tic kwede, kibiryeme woko ki ikin lutugi.”