Nia 31

Lubanga olwongo Bejalel ki Okoliab

(Nia 35:30—36:1)

1Rwot owaco bot Moses ni, 2“Nen, atyeko lwongo nying Bejalel wod pa Uri, ma wod pa Kur, ma i kaka pa Juda. 3Dong atyeko pongo en ki Cwiny pa Lubanga, ki kwiri me tic, ki niang matut, ki ngec, ki kit tic ducu me diro, 4pi tiyo cal manyen ki diro mapatpat, me tic ki jabu, ki ryal, ki mola; 5ki pi ngolo lutino kidi me wel me amwona ikom jabu, ki pi payo bao, ki pi tiyo kit tic ducu me diro. 6Dok nen, atyeko keto Okoliab bene kacel ki en, ma wod pa Akicamak, ma i kaka pa Dan; dok atyeko miyo kwiri me tic bot jo ducu makwiri, wek guti gin ducu ma aciko botini: 7Kema me Rwate, ki Canduk lok me Gicike, ki kom me kica ma iwiye, ki jami ma i kema ducu, 8meja ki jami tice, lacib mac me jabu ma kiliyo maber ki jami tice ducu, keno tyer me odok eceta, 9keno tyer me gitum awanga ki jami tice ducu, otako lwok ki tedi tere, 10bongi aruka ma kiyubu mabeco, bongi aruka maleng pa ajwaka Aron, ki bongi aruka pa awobene pi ticgi me bedo ajwaki, 11moo wir ki odok eceta ma ngwece kur pi Kabedo Maleng. Gibitiyo kit macalo dong aciki kwede ducu.”

Cik ma mako Cabit

12Rwot owaco bot Moses ni, 13“Wac bot jo Icrael ni, ‘Wubigwoko ceng Cabit, pien en aye lanyut matye ikin an ki wun wa ikare pa likwayowu ducu, wek wunge ni An a Rwot, ma alonyowu wubedo maleng. 14Wugwok Cabit, pien nino meno leng botwu; ka ngat mo opyede ikome, myero kineke woko. Ka ngat ma otiyo iye tic mo, dano meno wange birwenyo woko ki ikin lutugi, 151Wubitiyo ticwu pi nino abicel, ento nino me abiro en aye Cabit me yweyo mot, nino maleng bot Rwot; ngat ma otiyo tic mo i Cabit kibineko woko. 16Pimeno myero jo Icrael gugwok Cabit wa ikare pa likwayogi ducu, macalo gicike mabedo matwal. 172En aye lanyut matwal ikin an ki jo Icrael ni, Rwot yam otiyo polo ki lobo nino abicel, oywe mot inino me abiro.’”

18Ka Lubanga dong otyeko lok ki Moses iwi got Cinai, ci omiye kidi ma apada aryo me lok me caden, kidi ma apada aryo ma Lubanga ocoyo ki cinge.