Nia 32

Wod twon me jabu

(Nwo 9:6-29)

11

Ka lwak guneno ni Moses dong orii, mapeya odwogo piny ki iwi got, ci gugure ken gi bot Aron, kun giwace ni, “A malo, i tim ki wan lubanga, ma bitelo wiwa; pien Moses man, ma en aye dano mayam okwanyowa woko ki i lobo Ejipt, pe dong wangeyo gin ma otime ikome.” 2Ci Aron owaco botgi ni, “Wukwany agit me jabu ma gitye i it monwu ki awobewu ki anyirawu, wukelgi bota.” 3Kitmeno lwak ducu gukwanyo agit me jabu ki i itgi woko, gukelo bot Aron. 42Ci en ogamo jabu ki i cinggi, ci oteto ki nyol, oliyo, ci oyubu cal wod twon ma kiliyo aliya.

Ci lwak guwaco ni, “Man aye lubanga pa jo Icrael, mayam okwanyowa woko ki i lobo Ejipt!” 5Ka Aron oneno kit man, ci ocako cano keno tyer inyime; ka ocako tucune kamaleng kun waco ni, “Diki bibedo kwero nino madit bot Rwot.” 63Ci gua malo odiko con, gutyero gitum awanga mapol, ka gukelo tyergi me lakwecwiny; ci lwak gubedo piny gucamo ka gumato, ci gua malo katuku me kwelekwele.

7Rwot owaco bot Moses ni, “Lor piny; pien joni mayam ikwanyogi ki i lobo Ejipt gubale woko. 8Guweko kit mayam acikogi kwede woko oyotoyot, gutimo pirgi ken gi cal wod twon ma kiliyo aliya, gucako worone ka gimiye gitum, dok gin waco ni, ‘Man aye lubanga pa, wan jo Icrael, mayam okwanyowa woko ki i lobo Ejipt!’” 9Ci Rwot owaco bot Moses ni, “Atyeko neno jo man, ci nen, gin jo ma tokgi tek, 10ma omiyo kombedi dong iweka gira, pien akemo omaka matek ikomgi, amito atyekgi woko; ento abimiyo in idoko rok madit.” 114

Ento Moses obako doge bot Rwot Lubangane kun waco ni, “Ai Rwot, pingo akemo omaki matek ikom lwaki, mayam in ikwanyogi woko ki i lobo Ejipt ki tek madwong ki badi mateki? 12Pingo iweko jo Ejipt giwaco ni, ‘Oterogi marac akaka me tyekogi ikin godi kuca, ki pi tyekogi woko ki i wilobo?’ Lok akemoni mageri woko, dong ingut ikom gin marac ma imito timo ikom lwaki. 135Po ikom Abraim, Icaka ki Icrael lutici, mayam in ki komi aye, ikwonge ki nyingi kekeni botgi. Yam iwaco botgi ni, ‘Abimiyo wunya mapol macalo lakalatwe me polo; ki lobo man ducu, mayam aciko pireni, abimiyo bot likwayowu, ma gibileyone matwal.’” 14Ci Rwot ongut ikom gin marac mayam en otamo ni ebitimo ikom lwake.

15Moses oloke, olor piny ki iwi got kun tye ki kidi ma apada aryo me lok me caden i cinge; kidi magi onongo kicoyo tung ryoryo ducu, kicoyo tung iye ki tung ngegi ducu. 16Kidi meno ma apada Lubanga aye oyubu, ki coc bene Lubanga aye ocoyo, ma gigoro ikom kidi meno ma apada. 17Ka Yocwa owinyo dwon lwak ma gin wo, ci owaco bot Moses ni, “Awinyo wo me lweny tye igony!” 18Ento Moses ogamo ni, “Meno pe wo me loyo lweny, dok pe koko pa jo ma giloyogi, ento an awinyo dwon me wer aye.” 19Ka en obino cok ki gony, ma oneno twon ki myel, ci akemo omako Moses matek; obolo kidi aryo ma apada matye i cinge ni piny, otyerogi woko ite got. 20Ci okwanyo cal wod twon ma gitimo ni owango woko i mac, orego woko mayom, oonyo i pii, omiyo jo Icrael gumato.

21Moses openyo Aron ni, “Lwak man gutimi ningning, ma omiyo ikelo bal madit ikomgi ni?” 22Ci Aron ogamo ni, “Pe iwek akemo omaki matek, ladita; in ingeyo ni lwak man cwinygi okemo gin marac. 23Pien gin aye guwaco bota ni, ‘Yub ki wan lubanga, ma bitelo wiwa; pien Moses man, ma en aye dano mayam okwanyowa woko ki i lobo Ejipt, pe dong wangeyo gin ma otime ikome.’ 24Ci awaco botgi ni, ‘Dano acel acel matye ki jabu ogony woko,’ ci gin omiya, aonyo i mac, ci cal wod twon man oa ki iye.”

25Ka Moses oneno ni lwak wigi oteng woko, (pien Aron aye omiyo wigi oteng, kun oweko lewic omakogi ikin lukworgi), 26ci Moses ocung i dog gang me gony, owaco ni, “Anga matye tung bot Rwot? Obin bota.” Ci awobe pa Levi ducu gucoke kacel bote. 27Ci owaco botgi ni, “Rwot Lubanga pa jo Icrael owaco kuman ni ‘Dano acel acel oket pala lucwane ilakngete, wek ocit kwede i dye gony kun wire kwede dok i dog gang tungcel ki tungcel, wurum igony, kun ngat man neko omine, lareme, ki dano mabedo cok kwede.’”

28Awobe pa Levi gutiyo kit macalo Moses ocikogi; ci gin oneko lwak dano inino meno maromo co alip adek. 29Moses owaco ki Lulevi ni, “Tin dong wudyere kenwu i dog tic pa Rwot, pi neko awobewu ki omegiwu, pi man Rwot omiwu gum inino ma tini.”

30Orwone Moses owaco bot lwak ni, “Wun wutimo bal madit; kombedi abicito malo bot Rwot, gwok nyo Rwot bitimo kica ikomwu pi bal ma wutimo.” 31Kitmeno Moses odok bot Rwot, owaco ni, “Maa do, lwak man gutimo bal, madit; gutimo lubanga me jabu pirgi ken gi. 326Ento koni, ka ibitimogi kica ikom balgi, ci timgi; nyo ka pe, ci alegi ni, ijwa nyinga woko ki i buk ma meri ma icoyo.” 33Ento Rwot owaco ki Moses ni, “Ngat ma obalo inyima en aye abijwayo nyinge woko ki i buka. 34Ento dong icit kombedi, wek itel wi lwak, itergi ikabedo mayam aloki pire ni; nen, lamalaikana bitelo nyimi. Ento ikare ma abilimogi, en aye abiketo can ikomgi pi bal man.”

35Ci Rwot ocwalo gemo opoto ikom lwak, pi cal wod twon ma gin omiyo Aron oyubu.