Nia 33

Rwot owaco ki jo Icrael me a woko ki ite got Cinai

11

Rwot owaco bot Moses ni, “Wua woko ki kany, in ki lwak ducu mayam ikwanyogi woko ki i lobo Ejipt, pi terogi i lobo mayam akwongo pire bot Abraim, Icaka, ki Yakobo, kun acikogi ni abimiyo bot likwayogi. 2Dok abicwalo lamalaika inyimgi, ci abiryemo jo Kanaan woko, jo Amor, jo Kit, jo Periji, jo Kiv ki jo Jebuc. 3Ibicito i lobo mamiu ma ceko cam; ento an pe abicito kwedwu kunu, wek pe atyekwu woko i yo, pien wun jo ma tokwu tek.”

4Ka lwak guwinyo lok man me geroni, ci gukumu; pe tye dano mo ma oruku ruk me deyo. 5Pien onongo Rwot owaco bot Moses ni, “Wac bot jo Icrael ni, ‘Wun jo ma tokwu tek; kono ka acito kwedwu kunu pi kare manok mo, kono atyekowu woko cut. Kombedi dong wuluny ruk me deyowu woko ki ikomwu, wek ange gin ma abitimo ikomwu.’” 6Man omiyo jo Icrael gulunyu ruk me deyogi woko ki ikomgi, nia ki ite got Koreb cito kwede anyim.

Kema me Rwate

7Ikare meno Moses obedo katero kema, kun guru kema inge gony, kamabor ki gony; ci olwongo ni, Kema me Rwate. Ci ngat ma yenyo tam pa Rwot ikom lok mo cito woko i Kema me Rwate, matye woko inge gony. 8Ikare ducu ma Moses kato cito woko i Kema me Rwate, lwak ducu gia malo, kun ngat acel acel cung inyim dog kemane, kaneno kor Moses nio ka odonyo wa i kema. 9Ka Moses odonyo i kema, ci wir me pol dwogo piny cung i dogola Kema me Rwate, ci Rwot loko ki Moses. 10Ka lwak dano ducu guneno wir me pol ma ocung i dog kema, ci dano ducu gia malo, giworo Lubanga, kun ngat acel acel tye i dog kemane. 11Kitmeno Rwot yam loko ki Moses wang ki wang, macalo dano loko ki lareme. Ka Moses odok igony, Yocwa wod pa Nun, latin awobi ma lakony en, yam dong i kema.

Rwot ociko me bedo ki jone

12Moses owaco bot Rwot ni, “Nen, in onongo iwaca ni, ‘Kwany jo man woko,’ ento pe imiya angeyo ngat ma ibicwalo acito kwede. Ento iwaco ni, ‘Angeyo in ki nyingi, ki in bene iyomo cwinya.’ 13Kombedi ka dong ayomo cwinyi, alegi nyuta kiti, wek angeyi, anong gum ki boti. Dok po bene ni, in iyero rok man me bedo lwaki.” 14Ci Rwot ogamo ni, “An ki koma abiwot kwedi, abimiyo i bibedo ki kuc.” 15Dok Moses owace ni, “Ka in ki komi pe ibicito kweda, ci pe ikwanywa woko ki kany. 16Pien binen ningning ni anongo gum ki boti, an kacel ki lwaki? Pe pi in ma iwoto kwedwa ni aye ma omiyo wanen pat ki jo mukene ducu ma gitye i lobo?”

17Ci Rwot owaco bot Moses ni, “Abitiyo gin man ma iwaco ni kikome; pien iyomo cwinya, dok angeyo in maber.” 18Moses ogamo ni, “Alegi inyuta deyoni.” 192Ci Rwot owaco ni, “Abimiyo bera ducu kato ki inyimi, ka dok abitucu nyinga ni, ‘An a Rwot.’ Abinyutu bera bot ngat ma abinyutu bera bote, dok abitimo kica bot ngat ma abitimo kica bote.” 20Rwot dok owaco ni, “Ento pe ibineno wanga; pien dano pe neno wanga ci bedo kwo.” 21Ci Rwot owaco ni, “Nen, kabedo mo tye kangeta kama ibicung iye ikom got. 22Ka deyona bikato ki kenyo, ci abiketi ikin got ma obar, ci abiumi woko ki cinga nio ka atyeko kato; 23ka dong abikwanyo cinga woko, ci ibineno ngeya; ento pe ibineno wanga.”