Nia 34

Moses otyengo kidi ma apada mukene

(Nwo 10:1-5)

1Rwot owaco bot Moses ni, “Tyeng kidi ma apada aryo macalo mukwongo ca, ci abicoyo ikomgi lok ma nene acoyo ikom kidi mukwongoni, mayam ityero wokoni. 2Bed ma iyube odiko, ci ibin malo odiko iwi got Cinai, icung inyima iwi got. 3Pe ngat mo obin kwedi malo, pe ngat mo onen iwi got ducu; romi ki dyangi pe gucam inyim got.” 4Ci Moses otyengo kidi aryo ma apada macalo mukwongo ca; ci oa malo odiko con, oito iwi got Cinai, kit macalo Rwot ocike, otero kidi ma apada ma omako i cinge. 5Ci Rwot olor piny i pol, ocung kacel kwede kunu, ci otucu nyinge ni, Rwot. 61Rwot okato ki inyime kun tuce ni, “An a Rwot Lubanga ma lakica dok amaro dano, kiniga pe maka oyot, dok mara ma pe loke dwong, dok an lagen mada. 7Agwoko mar mera ma pe loke pi jo alip ki alip, kun aweko rocgi, tim aranyigi ki balgi. Ento pe akwanyo kop ikom lubalo, dok amiyo pwod ikom likwayogi ki ikom likwayo pa likwayogi nio i yalwak me adek ki me angwen.” 8Moses orune oyot, okulu wiye piny i ngom, oworo Lubanga. 9Ci owaco ni, “Koni dong ka ayomo cwinyi ai Rwot, alegi in Rwot iwot kwedwa, kadi bed wan jo ma ngutwa tek; itimwa kica pi rocwa ki balwa, imii wabed lwaki.”

Kinwoyo timo Gicike

(Nia 23:14-19; Nwo 7:1-5; 16:1-17)

10Rwot dok owaco ni, “Nen aketo gicike ki jo Icrael. Abitiyo gin me aura mapol inyim lwaki ducu, mayam peya otiine i lobo ducu nyo i rok mo; ci jo ducu ma wubedo ikin gi bineno tic pa Rwot, ma abitiyo kwedwu gin makelo atiba ikom dano.

11Gwok lok ma aciki iye tin. Nen, abiryemo jo Amor woko ki inyimi, ki jo Kanaan, jo Kit, jo Periji, jo Kiv ki jo Jebuc. 12Pe iket gicike mo ki jo ma bedo i lobo meno, wek pe odok calo owic me cikowu. 132Ento wumuk keno jogigi woko, wuret wir jogigi piny, wutong yadi ma kipito kama giworo iye jok ma dako ma kilwongo ni Acera. 14Pe myero wuwor lubanga mukene, pien an Rwot, ma nyinge Lanyeko, an Lubanga ma lanyeko. 15Gwok iket gicike mo ki jo mabedo i lobo meno; pien ka giworo lubangagi ki tim kwelekwele, nyo gityero gitum bot lubangagi, ce ngat mo olwongi, miyo ibicamo gin ma en otumu. 16Dok ka inyomo anyiragi ki awobeni, ce anyiragi woro lubangagi, ci miyo awobeni bene biloke kaworo lubangagi. 173

Pe iyub cal lubanga mo me nyonyo aliya me aworani. 184

Ibikwero nino madito me Mugati ma Tobi pe iye. Ibicamo Mugati ma Tobi pe iye pi nino abiro macalo yam acikowu, ikare ma kiciko, i dwe me Abib; pien yam ia woko ki i lobo Ejipt i dwe me Abib. 195

Lutino kayo ducu: kayoni ma co ducu, me twoni, me dyegi ki me romi ducu mera. 206Latin kayo pa kana ibikoko ki latin nyok romo, nyo ka pe ikoko, ci itur ngute woko. Lutino kayo ducu ma gin lutino awobeni ibikokogi.

Dano mo pe obin inyima ki cinge nono. 217

Ibitic nino abicel, ento inino me abiro ibiywe iye; wa ikare me pur ki ikare me kac bene ibiywe. 228Ibibedo ki nino madit me kwero Karama me Kac, en aye wi mwaka me kayo ngano mukwongo cek; ki Karama me Bolo me coko nyig yat i tum mwaka. 23Joni ma co ducu gibibino inyim Rwot Lubanga, kaworo Lubanga pa Icrael tyen adek i mwaka acel. 24Pien abiryemo lurok woko ki inyimwu, ci abimiyo wang lobowu bedo malac; ngat mo bene pe bibedo ki miti ikom lobowu ikare ma wubibino kakwero karama adek magi ducu inyim Lubangawu tyen adek i mwaka acel acel. 259

Pe ityer remo me gitum kacel ki tobi; pe iwek dwolo mo me kwero Karama me Kato obed nio wa odiko. 2610

Cam ducu mukwongo cek i potoni me wi mwaka myero ikel i Ot pa Rwot Lubangani.

Pe ited ringo latin romo nyo dyel ki cak pa mine.”

27Rwot owaco bot Moses ni, “Co lok magi; pien dong acike kwedwu, in ki jo Icrael, ki gicike malubu lok magi ducu.” 28Moses obedo kunu kacel ki Rwot nino pyere angwen, dyeceng ki dyewor, kun pe camo dok pe mato pii bene. Ci ocoyo lok me gicike ikom kidi ma apada, gin aye cik aparni.

Moses olor piny ki iwi got Cinai

2911

Ka lacen Moses olor piny ki iwi got Cinai, ma omako kidi ma apada aryo me lok me caden i cinge. Ikare ma en lor piny ki iwi got, onongo Moses pe ngeyo ni tur nyime tye karyeny, pien onongo obedo kalok ki Lubanga. 30Ka Aron ki jo Icrael ducu guneno Moses, ci nen, tur nyime obedo karyeny; ci gulworo cito cok bote. 31Ento Moses olwongogi, ci Aron ki lutel wi lwak ducu gucako dok bote, ci Moses oloko kwedgi. 32Ka lacen jo Icrael ducu gucito cok bote, ci ocako miyogi cik ducu ma Rwot otite iwi got Cinai. 33Ka dong Moses otyeko lok kwedgi, ci oumu tur nyime ki bongo. 34Ento ikare ducu ma Moses cito inyim Rwot kalok kwede, kwanyo bongo woko ki itur nyime, nio wa kadwogone; ka okati woko ci tito ki jo Icrael lok ma kicike kwede. 35Ka jo Icrael guneno tur nyim Moses, ci guneno ni del tur nyim Moses ryeny; ci Moses dok umu tur nyime woko ki bongo, nio ka kare dok oromo ki en me cito kalok ki Lubanga.