Nia 35

Cik ma mako nino me Cabit

1Moses ocoko lwak jo Icrael ducu, ci owaco botgi ni, “Man aye gin ma Rwot ociko ni wutim. 21Wutii tic nino abicel, ento inino me abirone obed ceng maleng me yweyo ma kidyero bot Rwot; ngat ma otiyo iye tic mo kibineke woko. 3Pe wubimoko mac i pacowu ducu inino me Cabit.”

Tyero mot pi Kema Maleng

(Nia 25:1-9)

4Moses dok owaco bot lwak jo Icrael ducu ni, “Man aye gin ma Rwot ocikoni. 5Wujog tyer pa Rwot ki ikinwu; ngat acel acel okel tyer bot Rwot kit ma cwinye mito: jabu, ryal ki mola; 6uci mabulu ki ma lamarlamar ki makwar, ki bongo camanini makiwiyo maber; yer dyegi, 7laa nyogi romi ma kinyongo, laa dyegi; bao yat okutu lalwii; 8moo me mac, angwece me yubu moo wir ki pi odok eceta ma ngwece kur; 9lutino kidi onik ki lutino kidi me wel me amwona ikom jabu, ikom epod ki pi bongo kor.”

Jami me Kema me Rwate

(Nia 39:32-43)

10“Dok jo ducu ma ikinwu makwiri i tic gubin guti jami ducu ma Rwot ociko pirgi: guyub kema 11ki laum wiye, lagole ki gutine, riine, wirne ki tedi tere; 12Canduk me Cik ki tale, kom me kica ki bongo kicika me laume; 13meja ki tale ki jami tice ducu, ki mugati me aketa inyim Lubanga; 14lacib mac ki jami tice ki lapute, ki moo me mace; 15keno tyer me odok eceta ki tale, ki moo wir, ki odok eceta ma ngwece kur, ki bongo cuka laum dogola, me kema; 16keno tyer me gitum awanga, kacel ki keikeine me mola, tale ki jami tice ducu, otako lwok ki tedi tere; 17bongo cuka me angaba me larum dyekal, ki wirne ki tedi tere, ki bongo cuka laum dog gang me dyekal; 18teke me tero kema ki teke me dyekal ki tol lacikgi; 19bongi aruka ma kiyubugi mabeco me tic kwedgi i Kabedo Maleng, ki bongi aruka maleng pi ajwaka Aron, ki bongi aruka pi awobene pi ticgi me bedo ajwaki.”

Dano gukelo tyer

20Ci lwak jo Icrael ducu gua woko ki inyim Moses. 21Ka gucako dwogo, kun ngat acel acel oyube ki gin ma cwinye olyeti pire, ki ma iye opwoyo, ci gukelo tyer bot Rwot me yubu Kema me Rwate, ki pi tice ducu, ki pi bongi aruka maleng. 22Ci gubino, co wa ki mon; jo ducu ma cwinygi mito gukelo jarara, agit me it, agit cing, mola ngut cing, ki kit jabu ducu, kun dano acel acel omiyo tyer me jabu bot Rwot. 23Dano ducu matye ki uci mabulu, nyo ma lamarlamar, nyo makwar, nyo bongo camanini maber, nyo yer dyegi, nyo laa nyogi romi ma kinyongo, nyo laa dyegi, ducu gukelogi. 24Dano acel acel maromo kelo tyer me ryal, nyo mola, gukelo me tyero bot Rwot; ki dano ducu matye ki bao yat okutu lalwii maromo kit tic ducu gukelo bene. 25Mon ducu makwiri i tic gubedo ka wiyo uci ki cinggi. Gucako kelo uci ma guwiyo mabulu, ma lamarlamar, makwar, ki bongo camanini makiwiyo maber. 26Ci mon ducu ma cwinygi olyeti pi kwiri me tic guwiyo yer dyegi me cweyo bongo. 27Lutela ducu bene gukelo lutino kidi onik, ki lutino kidi me wel me amwona ikom jabu, ikom epod ki ikom bongo kor. 28Gin bene gukelo angwece, dok bene gukelo moo me mac ki pi moo wir, ki pi odok eceta ma ngwece kur. 29Jo Icrael ma co ki ma mon ducu mayam cwinygi opwoyo pi kelo gin mo pi tic ma onongo Rwot ociko Moses ni otii, gukelo tyer ma igi opwoyo bot Rwot.

Lutic ma kiyero me yubu Kema me Rwate

(Nia 31:1-11)

30Ci Moses owaco bot jo Icrael ni, “Nen, Rwot otyeko lwongo nying Bejalel wod pa Uri, ma wod pa Kur, ma i kaka pa Juda. 31Dok Lubanga otyeko pongo en ki Cwiny mere, omiye kwiri me tic, ki niang matut, ngec, ki kit tic ducu me diro, 32pi tiyo jami mapatpat, me jabu, ryal ki mola kun tiyo ki diro, 33ki pi ngolo lutino kidi me wel me amwona ikom jabu, pi payo bao, ki pi tiyo kit tic ducu me diro. 34Dok omiyo ki en kacel ki Okoliab wod pa Akicamak, ma ikaka pa Dan cwiny me pwonyo dano. 35En otyeko pongogi ki kwiri me tiyo kwayi tic ducu me diro, ki me tiyo cal manyen ki tic me diro, ki me deyo bongo ki uci mabulu, ma lamarlamar, makwar, ki bongo camanini makiwiyo maber, me cweyo bongo, ki me tiyo kwayi tic ducu, ki me tiyo cal manyen me tic diro mapatpat.”