Nia 36

1“Bejalel ki Okoliab ki jo ducu ma kwiri i tic, ma Rwot oketo kwiri me tic i igi, ki niang matut, me ngeyo ki me tiyo tic ducu me gedo i Kabedo Maleng, gibiyubu kema kun gilubu ikit ducu mayam Rwot ociko.”

Dano gutyero mot madwong

2Ci Moses olwongo Bejalel ki Okoliab ki jo ducu ma kwiri i tic, ma Rwot onongo oketo kwiri me tic i igi, dano ducu ma guwinyo ki i cwinygi pi bino katic; 3gugamo ki bot Moses mot ducu ma jo Icrael gutyero pi tic ikom Kabedo Maleng. Dano gumede ameda ki kelo tyer ma igi opwoyo i odiko ducu. 4Pi man lukwiri tic ducu ma gitiyo kwayi tic mo ma ikom Kabedo Maleng gubino, kun ngat acel acel oa ki i dog tic ma mege ma en tiyo. 5Ludiro guwaco bot Moses ni, “Dano dong gukelo jami madwong mukato mayam mite pi tic ma Rwot ocikowa ni watii.” 6Kitmeno Moses ocwalo lok bot lwake, ci kitito oromo igony ducu ni, “Pe dok laco mo nyo dako mo okel tyer pi Kabedo Maleng.” Ci kijuku dano pe dok gukelo jami mo, 7pien jami ma gukelo onongo dong oromo tiyo tic ducu, ki makato bene.

Yubu Kema me Rwate

(Nia 26:1-37)

8Jo ducu makwiri i tic mayam gitye ikin lutic guyubu kema ki bongo cuka apar, ma kitiyogi ki bongo camanini makiwiyo maber, ki uci mabulu, ma lamarlamar ki makwar, kun gicweyo iye cal lukerubi ma gitiyogi ki diro. 9Bor bongo cuka acel acel ducu obed maromo mita apar wiye aryo, ki lac igi obed maromo mita aryo.

10Gin guribo bongo cuka abic kacel, ki abic mukene bene kacel kitmeno. 11Ci gukwoyo wang jarara mabulu i dog bongo cuka me dul mukwongo ma ogikone, ka dok gukwoyo wang jarara i dog bongo cuka me dul me aryone ma ogiko, marom ki wadi. 12Gukwoyo wang jarara pyere abic i dog bongo cuka acel, ki wang jarara pyere abic i dog bongo cuka me aryone, kun wang jarara kemo wadi. 13Dok guyubu jarara lagol me jabu pyere abic, ci oribo dog bongo cuka ki jarara lagol; ci kema obedo ma okube kacel liking.

14Dok guyubu bongo cuka me yer dyegi bene me laum wi kema; guyubu cuka apar wiye acel. 15Bor pa cuka acel acel romo mita apar wiye adek ki nucu, lac pa cuka acel acel romo mita aryo; bongo cuka apar wiye aceli ducu girom. 16Guribo cuka abic kacel pat kaken gi, ki cuka abicel bene kacel pat kaken gi. 17Gukwoyo wang jarara pyere abic i dog cuka me dul mukwongo mugikone, dok gukwoyo jarara pyere abic me dul mukene mugikone. 18Guyubu jarara ki lagol me mola pyere abic me ribo dog kema kacel, wek obed ma okube kacel liking. 19Dok gukwoyo laa nyogi romi ma kinyongo, ki laa dyegi, me umu wi kema.

20Dok guyubu guti me bao yat okutu lalwii, ma ocung atir pi kema. 21Bor pa guti obedo futi apar wiye abic, ki lace futi aryo, ikom guti acel acel. 22Guti acel acel obedo ki tyene aryo me kubugi kacel; guyubu guti me kema ducu kitmeno. 23Guyubu guti me kema kit man: guti pyere aryo tung kupiny. 24Ka dok guyubu tedi tere me ryal maromo pyere angwen me kubu iye guti pyere aryoni; tedi tere aryoaryo pi guti acel acel, pi tyene aryo. 25Ka dok pi kema tung me aryone, matung kumalo, guyubu guti pyere aryo, 26ki tedi tere me ryal maromo pyere angwen, tedi tere aryoaryo pi guti acel acel. 27Ki pi nge kema, matung kupotoceng, gin guyubu guti abicel. 28Ka dok guyubu guti aryo me twok kema ma ingeye. 29Kipoko kin gi kitung piny, ento kiribo doggi kitung wigi malo ikom agit mukwongo; guyubu aryo ma kitmeno pi twoke aryo. 30Yam tye guti aboro ki tedi tergi me ryal; tedi tergi obedo apar wiye abicel; ite guti acel acel bedo iye tedi tere aryo.

31Guyubu rii me bao yat okutu lalwii abic pi guti me kema tungcel, 32ki rii bao abic pi guti me kema tungcel, ki rii bao abic pi guti me kema me ngeye tung kupotoceng. 33Ka dok guyubu rii bao ma idyere ma oa ki i agiki tungcel nio wa i agiki tungcel ma ongolo kor guti arii. 34Ci gumwono kom guti woko ki jabu, ka guyubu agit me jabu me rwako bao iye; ki rii bao bene gumwono komgi woko ki jabu.

35Guyubu bongo kicika me uci mabulu, ma lamarlamar, makwar, ki bongo camanini makiwiyo maber; guyubu ma kicweyo iye lukerubi ki tic me diro. 36Guyubu wir angwen me bao yat okutu lalwii, ci gumwono komgi woko ki jabu; lagolgi obedo me jabu, ci guliyo tedi tergi me ryal angwen. 37Dok guyubu bongo cuka me laum dogola me kema ki uci mabulu, ma lamarlamar, makwar, ki bongo camanini makiwiyo maber, ma kideyo maber. 38Dok guyubu wirne abic, ki lagolgi. Gumwono wigi woko, ki otacgi obedo me jabu, ento tedi tergi abic obedo me mola.