Nia 37

Yubu Canduk lok me Gicike

(Nia 25:10-22)

1Bejalel opayo Canduk ki bao yat okutu lalwii; bore obedo futi angwen, lace futi aryo, ki bore tung malo futi aryo. 2Omwono iye ki ngeye woko ki jabu ma kiliyo maber, ka olulu doge ducu, orumu woko ki jabu. 3Ci oliyo agit me jabu angwen pi twoke angwen ducu, agit aryo pi tungcel ki agit aryo mukene pi tungcel. 4Ka dok oyubu tal me yat okutu lalwii, omwono komgi woko ki jabu, 5ka orwako tal i agit matye ibut canduki wek obed me tingo canduk. 6Dok oyubu kom me kica ki jabu ma giliyo maber; bore obedo futi angwen, ki lace futi aryo. 7Ka oyubu lukerubi aryo me jabu ma otetogi ki nyol. Oyubugi i agiki kom me kica ryoryo ducu. 8Lakerubi acel i agikine tungcel, ki lakerubi acel i agikine tungcel. Oyubu lukerubi kun gikube ki kom me kica i agikine aryo ducu. 9Lukerubi guyaro bwomgi malo i wiye, guumu wi kom me kica ki bwomgi, kun wanggi keme ki wadi; wang lukerubi nen ma okemo kom me kica.

Yubu meja mugati ma kityero bot Rwot

(Nia 25:23-30)

10En dok oyubu meja ki bao yat okutu lalwii; bore obedo futi adek ki lace futi acel ki nucu, ki bore tung malo futi aryo. 11Omwono kome woko ki jabu ma kiliyo maber, ci olulu doge ducu orumu woko ki jabu. 12Oketo riine tungi ki tungi ducu, ma lace rom ki dye cing, ci olulu doge ducu orumu woko ki jabu. 13Oliyo agit angwen me jabu pire, ci omwono agit itwoke angwen ducu ikom tyene angwen. 14Agit kiketo ikom rii, pi rwako iye tal lating meja. 15Oyubu tal ki bao yat okutu lalwii me tingo meja, omwono komgi woko ki jabu. 16Oyubu jami me jabu ma kiliyo maber me aketa iwi meja, canine ki atabone me odok eceta, ki weere, ki cupane me liyo tyer amata.

Yubu lacib mac

(Nia 25:31-40)

17En dok oyubu lacib mac ki jabu ma kiliyo maber. Tedi lacib mac ki bole oteto ki nyol; kikopone, ma en aye wene ki ature ducu, obedo ma gukube kacel kwede. 18Jange onongo tye abicel ma gujany gurye gukaco ngete ryoryo; jang lacib mac adek ma gurye ibute tungcel, ki jang lacib mac adek ma gurye itung mukeneni. 19Ikom jange tungcel onongo tye iye kikopo adek ma kiyubu macalo tur yaa, kun acel acel tye ki wene ki ature. Ikom jange tung mukene bene onongo tye iye kikopo adek ma kiyubu macalo tur yaa, kun acel acel tye ki wene ki ature. Jange abicel ducu ma gurye gukaco lacib mac onongo bene tye kitmeno. 20Ka dok ikom lacib mac kikomeni onongo tye iye kikopo angwen ma kiyubu iye ature macalo tur yaa me deyogi, 21ki wene ma okube ikom lacib mac piny ite jange abicel ma gurye ryoryo ikom lacib mac. 22Wen gi ki janggi obedo ma gukube kacel, kun kome ducu obedo me jabu ma kiliyo maber ma kiteto ki nyol. 23Oyubu mac lapute abiro, magace, canine ki jabu ma kiliyo maber. 24Oyubu lacib mac ki jami tice ducu ki jabu ma kiliyo maber ma peke oromo kilo pyere adek wiye abic.

Yubu keno tyer me wango odok eceta

(Nia 30:1-5)

25En oyubu keno tyer me wango odok eceta ki bao yat okutu lalwii; bore obedo futi acel ki nucu, ki lace bene futi acel ki nucu; obedo ma twoke angwen marom, bore tung malo oromo futi adek; obedo ki ten keno angwen ma gukube ikome. 26Omwono kome woko ducu ki jabu ma kiliyo maber, wiye ki bute ki ten keno ducu; olulu doge ducu orumu woko ki jabu. 27Oyubu agit me jabu aryo oketogi ite doge ma kiluluni, kun agit acel okeme ki wadi tungcel, me rwako iye tal me tingone. 28Oyubu tal ki bao yat okutu lalwii, omwono komgi woko ki jabu.

Yubu moo wir ki odok eceta

291

En bene oyubu moo maleng me wir, ki odok eceta ma ngwece kur ma kiliyo maber, ma kirubu kit macalo ladiro rubu gin ma ngwe kur rubuni.