Nia 38

Yubu keno tyer me gitum awanga

(Nia 27:1-8)

1Dok oyubu keno tyer me gitum awanga ki bao yat okutu lalwii; bore obedo futi abiro ki nucu, lace bene futi abiro ki nucu, obedo ki twoke angwen marom, bore tung malo oromo futi angwen ki nucu. 2En bene oyubu ten keno angwen ducu; ten keno angwen ducu gubedo ma gukube kacel kwede, dok omwono kome woko ki mola. 3Oyubu jami tic me keno tyer ducu, otako, akwaya latoke, becen, lacob ringo, ki wee latok mac. En oyubu jami tic meno ducu ki mola. 4Dok oyubu keikei pi keno tyer, me obwo mola ma oketo ite riine, ki ikore. 5En oliyo agit angwen pi twoke angwen me keikei mola, me rwako iye tal me tingone. 6Oyubu tal ki bao yat okutu lalwii, ci omwono komgi woko ki mola. 7Orwako tal odonyo i agit matye ibut keno tyerni me latinge; oyubu ma iye twolo ki bao.

Yubu otako lwok

(Nia 30:18)

8En dok oyubu otako mola ki tedi tere bene me mola; oyubu ki madara pa mon ma lutic ma i dogola Kema me Rwate.

Dyekal me Kema me Rwate

(Nia 27:9-19)

9Bejalel ki jo ma konye guyubu dyekal ma orumu Kema me Rwate. Tung kupiny me dyekal kingabo iye bongo cuka camanini makiwiyo maber ma bore tungcel romo mita pyere angwen wiye angwen. 10Wirne onongo giromo pyere aryo, ki tedi tergi me mola gubedo pyere aryo, ento gol me wir ki otacgi ducu gubedo me ryal. 11Ki tung kumalo bene bore oromo mita pyere angwen wiye angwen, ki wirne pyere aryo ki tedi tergi pyere aryo me mola; ento gol me wir ki otacgi ducu gubedo me ryal. 12Ki ibute ma tung kupotoceng bene kingabo iye bongo cuka ma bore romo mita pyere aryo wiye aryo; wirne gubedo apar, ki tedi tergi bene apar; gol me wir ki otacgi ducu gubedo me ryal. 13Nyime tung kunyango onongo romo mita pyere aryo wiye aryo. 14Bongo ma kingabo inget dogola tungcel onongo romo mita abicel ki nucu; wirne gubedo adek, ki tedi tergi adek. 15Ingete tung mukene bene kitmeno; inget dog gang tungi ki tungi kingabo iye bongo cuka maromo yadi abiro ki nucu; wirne gubedo adek ki tedi tergi adek. 16Bongo cuka ducu ma kingabo idog gang me dyekal onongo gubedo bongo camanini makiwiyo maber. 17Tedi te wir ducu onongo gubedo me mola, ento gol me wir ki otacgi gubedo me ryal; kimwono wigi bene ki ryal, ki wir ducu ma idyekal kiketo iye otac ryal. 18Bongo cuka laum dog gang me dyekal kideyo kome maber ki uci mabulu, ma lamarlamar ki makwar, ki bongo camanini makiwiyo maber, kun bore romo yadi apar, ki bore ma dok malo romo futi abiro ki nucu, marom ki bongo cuka me angaba me dyekal. 19Wirne gubedo angwen, ki tedi tergi angwen me mola; lagolgi gubedo me ryal, ki wigi kimwono woko ki ryal, ki otacgi bene gubedo me ryal. 20Teke lagur kema ducu ki teke ma orumu dyekal ducu gubedo me mola.

Kwayi jami ma kitiyo kwedgi pi Kabedo Maleng

21Magi aye jami makitiyo kwedgi me yubu Kema me Rwate, kama kigwoko iye godi apada aryo ma kicoyo iye Cik aparni. Moses aye ociko ni kiyub, ka dong Lulevi ma ladit wi ticgi obedo Itamar wod pa Aron ma ajwakani aye guyubu. 22Bejalel wod pa Uri ma wod pa Kur, ma ikaka pa Juda, oyubu jami ducu ma Rwot ociko ki Moses. 23En onongo tiyo kacel ki Okoliab wod pa Akicamak, ma ikaka pa Dan, dano ma ladiro, ma layub cal tic manyen, ki lader jami ki uci mabulu, ma lamarlamar, ki makwar, ki bongo camanini makiwiyo maber.

24Jabu ducu ma kitiyo kwede pi tic i Kabedo Maleng, ki jabu ducu ma oa ityer, peke onongo romo alip acel, kun kiporo ki lapim me Kabedo Maleng. 251 Ryal ma oa ki bot lwak ma kikwano onongo peke romo kilo alip adek ki miya angwen ki pyere adek, kun kiporo ki lapim me Kabedo Maleng. 262

Dano acel acel okelo beka acel, (en aye nucu cekel me Kabedo Maleng), gin dano mayam kikwano welgi, cake ikom jo ma ditogi romo mwaka pyere aryo dok kwede malo, jo alip miya abicel ki adek, miya abic ki pyere abic. 27Ryal aliya pi tedi te wir me Kabedo Maleng onongo peke tye kilo alip adek ki miya angwen, ki pi tedi te wir me bongo kicika; tedi tere maromo miya acel otero kilo pyere adek wiye angwen ikom tedi acel acel. 28Kilo pyere adek me ryal ma odongi, Bejalel otimo ki gol me wir ducu, omwono wigi ducu, dok oyubu ki otacgi. 29Mola ma kimiyo onongo romo kilo alip aryo miya angwen ki pyere aryo wiya abic. 30Otiyo ki tedi te wir me dogola Kema me Rwate, ki keno tyer me mola, ki keikei me mola, ki jami tic ducu me keno tyer, 31ki tedi te wir ma orumu dyekal, ki tedi te wir me dog gang me dyekal, ki teke me guru kema, ki teke ma orumu dyekal.