Nia 39

Yubu bongi aruka pa ajwaki pa Lubanga

(Nia 28:1-43)

1Kikwoyo bongi aruka ma kiyubu mabeco ki uci mabulu, ma lamarlamar, ki makwar pi tic i Kabedo Maleng. Kikwoyo bongi maleng pi Aron macalo Rwot ociko ki Moses.

2Guyubu epod ki jabu ki uci mabulu, ma lamarlamar ki makwar, ki camanini makiwiyo maber. 3Kipado jabu woko marep ki nyol, kiliro odoko macalo tol me deyo bongo, kacel ki uci mabulu, ma lamarlamar, ki makwar, me deyo ki bongo camanini makiwiyo maber, ki tic me diro. 4Gukwoyo gin wigwok epod, kikubu idoge ryoryo. 5Ceme1 ma ikome ma kicweyo ki diro, me latwene, kikwoyo ki jami lakite acelu, ki kit tic acelu bene, ki jabu, uci mabulu, ma lamarlamar ki makwar, ki bongo camanini makiwiyo maber, macalo Rwot ociko ki Moses.

6Kiyubu lutino kidi onik, kimwonogi ikom jabu ma kingweko ki diro, ma dong kigoro komgi macalo ladiro goro kom kidi, muporo nying awobe pa Icrael. 7Gumwonogi ikom gin wigwok me epod, wek gubed kidi me po pi awobe apar wiye aryo pa Icrael, macalo Rwot ociko ki Moses.

8Gukwoyo bongo kor ki tic me diro, macalo tic ikom epod, ki jabu, uci mabulu, ma lamarlamar, ki makwar, ki bongo camanini makiwiyo maber. 9Obedo ma twoke angwen marom; kibano ibongo kor aryo; ka dong kibano iye aryo, ci bore bedo rom ki lac cing acel, ki lace bene rom ki lac cing acel. 10Gumwono iye lutino kidi me wel ma guryeyo ityeng angwen. Tyeng mukwongo obedo cadiuc, topaj ki kabankel; 11ki tyeng me aryone kiketo iye emeradi capir ki dayaman; 12ityeng me adeke kiketo jacint, agat ki ameticito; 13ki i tyeng me angwene kiketo berul, onik ki jacipa; kimwonogi ki jabu ma kingweko ki diro. 14Lutino kidi gubedo apar wiye aryo, muporo nying awobe pa Icrael; gubedo macalo kidi ma kigoro, kun kidi acel acel kigoro iye nying, muporo kaka apar wiye aryo. 15Dok guyubu nyor me jabu ma kiliyo maber, ma guminogi macalo tol. 16Dok guyubu gin lakwak tere aryo me jabu gungweko ki diro, ki agit me jabu aryo, ci gukwoyo agit aryo ni i dog bongo kor aryo bene. 17Ka dok gurwako tol jabu aryoni odonyo i agit aryo ma gitye i dog bongo korni. 18Gumwono dog tol aryoni ducu ikom gin lakwak tere aryo ma kingweko ki dironi, gutweyo kwede ikom gin wigwok me epod. 19Dok gutimo agit aryo me jabu, ci gukwoyogi itwok bongo kor aryo ducu, idoge ma tung iye macok ki epod. 20Ci guyubu agit me jabu aryo gukubogi igin wigwok epod aryo anyim tung tere, kama okube tung malo iwi ceme me epod ma kicweyo ki dironi. 21Ci gutweyo bongo kor ki agite ikom agit ma i dog epod ki tol mabulu, wek obut opyele ikom ceme me epod ma kicweyo ki dironi, wek bongo kor pe ogonye woko ki ikom epod; macalo Rwot ociko ki Moses.

Kwoyo bongi pi ajwaki mukene

(Nia 28:31-43)

22Dok oyubu jor me epod ma kicweyo kome ducu ki uci mabulu. 23Otucu dog jor obedo twolo macalo dog bongo aruka, ma kidolo doge orumu woko liking wek pe oyeci. 24Idog jor gulungu iye gin muporo okwer pomegranat ma onyak, ma kikwoyo ki uci mabulu, ma lamarlamar, ki makwar, ki bongo camanini makiwiyo maber. 25Dok gutimo olang me jabu ma kiliyo maber, ci kikwoyo olang kingobo ikin okwer pomegranat orumu dog jor woko, ongobo ikin okwer pomegranat ducu; 26olang ki okwer pomegranat orumu dog jor ducu kun gigwenye agwenya, i dog jor me aruka i dog tic; macalo Rwot ociko ki Moses.

27Dok guyubu kanyi ma kicweyo ki bongo camanini maber, ki pali me bongo camanini makiwiyo maber, pi Aron ki awobene, 28ki kitambara me adwala i wic me bongo camanini maber ki otok matino me bongo camanini maber, ki pali me bongo camanini makiwiyo maber, 29ki kitambara me latwe pyer me bongo camanini makiwiyo maber, ki uci mabulu, ma lamarlamar, ki makwar, ma kideyo maber; macalo Rwot ociko ki Moses.

30Dok guyubu akwaya jabu me lalukana maleng ki jabu ma kiliyo maber, kigoro kome ki agora ikom agit ni, “Kidyero pi Rwot.” 31Gutweyo tol mabulu ikome wek kitwe kirid kwede ikom kitambara adwala me wici; macalo Rwot ociko ki Moses.

Tyeko tic

(Nia 35:10-19)

32Yam gutyeko tic ikom kema, en Kema me Rwate, kitmeno. Jo Icrael gutyeko tic ducu macalo Rwot ociko ki Moses. 33Gukelo Kema bot Moses, kema ki jami tice ducu, lagole, gutine, riine, wirne ki tedi tergi; 34laa nyogi romi ma kinyongo, kicika me laume; 35Canduk lok me Gicike, tal latinge, ki kom me kica; 36meja ki jami tice ducu, mugati me aketa inyim Lubanga; 37lacib mac me jabu ma kiliyo maber, ki lwak lapute ma kiketo malo iwiye, ki jami tice ducu, ki moo me mac; 38keno tyer me jabu, moo me wir, odok eceta ma ngwece kur, ki bongo laum dogola me kema; 39keno tyer me mola, ki tal latinge, ki jami tice ducu; otako lwok ki tedi tere; 40bongo cuka me angaba ma rumu dyekal, wirne ki tedi tergi ki bongo laum dog gang me dyekal, ki lwak tol lacikgi ki lwak teke lagurgi; jami me tic kwedgi i Kema, pi Kema me Rwate; 41ki bongi aruka ma kiyubugi mabeco me tic kwedgi i Kabedo maleng, bongi aruka maleng pi ajwaka Aron, ki bongi aruka pi awobene pi ticgi me bedo ajwaki. 42Macalo Rwot ociko ki Moses, jo Icrael gutiyo gutyeko tic ducu kitmeno. 43Moses oneno tic ducu, ci nen, gutiyo tic kikome; macalo Rwot onongo ociko, gutiyo tic ducu kakare. Ci Moses olamo gum ikomgi.