Nia 40

Guru Kema me Rwate ki kwerone

1Rwot owaco bot Moses ni, 2“Inino dwe acel i dwe mukwongo, cak guru iye kema, en Kema me Rwate. 3Ket iye Canduk lok me Gicike, ci ingab bongo kicika me laum kom Canduk lok me Gicike. 4Ka dong iter iye meja, ican iye jami ducu kore ki kore, ka dok ikel lacib mac ci icib laput malo i wiye. 5Dok iket keno tyer me jabu me wango odok eceta inyim Canduk lok me Gicike, ci ingab bongo cuka laum dogola me Kema me Rwate. 6Ket keno tyer me gitum awanga inyim dogola me Kema me Rwate; 7iket otako lwok ocung ikin Kema me Rwate ki keno tyer, ci iony iye pii. 8Dok ingab bongo cuka me dyekal irum woko ducu, ci ingab bongo cuka me laum dog gang me dyekal. 9Kwany moo wir, i wir ki Kema me Rwate ki lwak jami ducu ma gitye iye, kun ikwero en ki jami ma kiketo iye ducu gubed maleng.

10Dok bene wir keno tyer me gitum awanga ki moo, ki jami tice ducu; kwer keno tyer, ci bidoko maleng makato. 11Wir moo bene ikom otako lwok ki tedi tere ci ikwergi. 12Ka dong ibikelo Aron ki awobene idogola Kema me Rwate, ci ilwok komgi ki pii. 13Ka dong iruk Aron ki bongi aruka maleng, ci i wire ki moo, ikwere wek otii bota tic me ajwaka. 14Ka dok ikel awobene bene, irukgi ki kanyi, 15i wirgi ki moo macalo i wiro won gi ni, wek guciwora i tic me ajwaki. Wirogi ki moo bimiyo gibedo ajwaki pa Lubanga matwal wa ikare pa likwayogi ducu.”

16Moses otimo kitmeno, macalo Rwot ocike kwede ducu. 17Idwe mukwongo, i mwaka me aryone ma guweko ki lobo Ejipt, inino dwe mukwongo aye kiguro iye Kema me Rwate. 18Moses oguro Kema me Rwate; oryeyo tedi tere; ocibo iye guti, ka orwako iye rii bao, oilo wir malo. 19Ka dok oyaro bongo opeto iwi kema, oketo laum kema, opeto i wiye, macalo yam Rwot ociko. 20Ka dok otero lok me caden oketo i Canduk, ka orwako tal ikor Canduk, oketo kom me kica iwi Canduk; 21ka otero Canduk i Kema me Rwate, ci ongabo bongo kicika malo me laume, ci oumu kom Canduk lok me Gicike woko, kit macalo Rwot ociko. 22Ka dok oketo meja i Kema me Rwate, i kema tung kumalo, ki woko inge bongo kicika ma oumu canduki. 23Ci ocano mugati inyim Rwot macalo Rwot ociko. 24Oketo lacib mac i Kema me Rwate tung kupiny me kema kun okeme ki meja, 25ka ocibo laput malo inyim Rwot; macalo Rwot ociko. 26Oketo keno tyer me jabu i Kema me Rwate inyim bongo kicika, 27ci owango odok eceta ma ngwece kur i wiye; macalo Rwot ocike kwede. 28Dok ongabo bongo cuka me laum dogola me Kema me Rwate. 29Ka dok oketo keno tyer me gitum awanga cok ki dogola Kema me Rwate, ka ocako tyero iye gitum awanga, ki tyer me moko kwon; macalo Rwot ociko. 30Oketo otako lwok ikin Kema me Rwate ki keno tyer, oonyo iye pii me lwok; 31en aye kama Moses ki Aron ki awobene gilwoko iye tyen gi, 32ka gicito i Kema me Rwate, dok ka ginyiko cok ki keno tyer, ci gilwoke, macalo Rwot ociko ki Moses.

33Moses oguro dyekal orumu Kema me Rwate ki keno tyer, ci ongabo bongo cuka laum dog gang me dyekal. Kitmeno Moses otyeko tice ducu kakare.

Pol oumu wi Kema me Rwate

(Wel 9:15-23)

341

Lacen pol obino, oumu wi Kema me Rwate woko, ci deyo pa Rwot opongo i Kema. 35Moses onongo pe twero donyo i Kema me Rwate, pien pol oboyo kom Kema me Rwate woko, dok deyo pa Rwot opongo i Kema.

36Ikare me wotgi ducu, ka pol oware woko ki iwi Kema, ci jo Icrael gicako wot anyim; 37ento ka pol pe oware woko, ci pe gimede ki wotgi anyim, gikuru nio inino ma oware woko. 38Ikare me wotgi ducu pol pa Rwot umu wi Kema dyeceng, ki mac bedo iye dyewor, ma kun jo ducu me ot pa Icrael gineno.