Lulevi 1

Gitum awanga matye olu

1Rwot olwongo Moses ci oloko kwede ki i Kema me Rwate kun waco ni, 2“Lok bot jo Icrael kun iwaco botgi ni, ka dano mo ikinwu kelo tyer mo bot Rwot, ci bikelo gityere me lee makwo ma okwanyo ki ikin dyangine nyo ki ikin romi ki dyegine.

3Kace dano mo okwanyo gityere me gitum awanga ki ikin dyangi, ci en bityero twon ma kome pe kimwonyo; en bityero i dogola Kema me Rwate, wek Rwot ogame. 4En biketo cinge iwi gitum awanga, ci Lubanga bigamone pire me lakok dano ki i bal ki ikome. 5Ci en bineko twon meno inyim Rwot ci awobe pa Aron ma gin aye ajwaki pa Lubanga gibityero remo; gibicoro remo ikom keno tyer matye i dogola Kema me Rwate kun rumu twok keno ducu. 6En biyango gitum awanga, bingido woko matinotino, 7ka awobe pa ajwaka Aron gibimoko mac iwi keno tyer, kun gicano yen imac kikore. 8Ci awobe pa Aron ma gin aye ajwaki gibicano ringo ma kingidoni kikore kacel ki wic ki dwolo, iwi yen matye imac ma iwi keno tyer. 9Ento jam iye ki tyene ducu kibilwokogi ki pii. Ajwaka biwango woko ducu ki bere i keno tyer wek obed gitum awanga, gityer ma kiwango ki mac, en gin ma ngwece kur ma yomo cwiny Rwot.

10Kace okwanyo gityere me gitum awanga ki ikin romi nyo dyegi, en bityero nyok ma kome pe kimwonyo. 11En bineko inyim Rwot, tung kumalo me keno tyer; awobe pa Aron ma gin aye ajwaki gibicoro remo ikom keno tyer rumu twoke ducu. 12En bingido woko matinotino, kacel ki wic ki dwolone, ci ajwaka bicanogi kikore iwi keno tyer. 13Ento jam iye ki tyene ducu kibilwokogi ki pii. Ajwaka bityero ducu ki bere kun wango i keno tyer; en aye gitum awanga, gityer ma kiwango ki mac, en gin ma ngwece kur ma yomo cwiny Rwot.

14Kace gityere bot Rwot obedo winyo me gitum awanga, ci en bikelo amam nyo lutino akuri me gityere. 15Ajwaka bikelone i keno tyer ci dwoyo ngute, ka wango woko iwi keno tyer. Ci bionyo remone inget keno tyer. 16En bikwanyo lacukune ki yece ci onyogi inget keno tyer tung kunyango kama kionyo iye buru; 17biyecone ki bwome, ento pe bipoko iye. Ajwaka biwango i keno tyer, iwi yen matye i mac; en aye gitum awanga, gityer ma kiwango ki mac, gin ma ngwece kur ma yomo cwiny Rwot.”