Lulevi 2

Gityer me moko kwon

1“Ka ngat mo okelo gityer me moko kwon me atyera bot Rwot, gityer mere bibedo moko kwon mapwote. En bionyo iye moo, ci keto iye odok angwece, 2ka en bikelo bot awobe pa Aron ma gin aye ajwaki. Ajwaka bijobo moko kwon mapwoti pong cing acel, kacel ki moo ki odok angwece mere ducu; ci ajwaka biwango man iwi keno tyer; en gityer ma kiwango ki mac, gin ma ngwece kur ma yomo cwiny Rwot. 3Moko ma odong ki ikom gityer me moko kwon bibedo pa Aron ki awobene; en aye gin maleng makato me gityer ma kiwango ki mac bot Rwot.

4Ka ityero gityer me moko kwon ma kitedo i keno, bibedo capat ma tobi pe iye me moko kwon mapwote ma kirubu ki moo, nyo capat marep ma tobi pe iye ma kireyo moo ikomgi. 5Kace gityer meri obedo gityer me moko kwon ma kitedo i otako nyonyo, bibedo moko kwon mapwote ma tobi pe iye, ma kirubu ki moo; 6ka ocek, ibingido iye matinotino ci ionyo iye moo; en aye gityer me moko kwon. 7Kace gityer meri obedo gityer me moko kwon ma kitedo i cupuriya, ci ibitedo ki moo ki moko kwon mapwote. 8Gityer me moko kwon ma kitimo ki jami magi ibikelo bot Rwot; ka dong kityero bot ajwaka, ci en bikelo iwi keno tyer. 9Ki ikom gityer me moko kwon, ajwaka bikwanyo bute mo manok me nyutuni gityer ducu obedo pa Rwot. Ci ajwaka biwango iwi keno tyer wek obed gityer ma kiwango ki mac, gin ma ngwece kur ma yomo cwiny Rwot. 10Gin ma odong ki ikom gityer me moko kwon bibedo pa Aron ki awobene; en aye gin maleng makato me gityer ma kiwango ki mac bot Rwot.

11Gityer me moko kwon ma kikelo bot Rwot pe wuted ki tobi; pien pe wubiwango tobi nyo moo kic me bedo gityer ma kiwango ki mac bot Rwot. 12Wutwero kelogi bot Rwot me gityer me wi mwaka, ento pe wubityerogi iwi keno tyer me bedo gin ma ngwece kur ma yomo cwiny Rwot. 13Ibiketo kado i gityer me moko kwon meri ducu; pe ibiweko kado me gicike pa Lubangani bedo pe i gityer me moko kwon meri; myero ityer kado kacel ki gityer meri ducu.

14Ka ityero gityer me moko kwon me kac mukwongo me wi mwaka bot Rwot, ibityero wit ngano manyen ma kicoto, kicelo ki mac. 15Ibiketo moo ki odok angwece ikome; en aye gityer me moko kwon. 16Ajwaka biwango wit ngano mogo ma kicoto, kacel ki moo ki odok angwece mere ducu. Man binyutu ni gityer ducu obedo pa Rwot. En biwangone iwi keno tye, wek obed gityer ma kiwango ki mac bot Rwot.”