Lulevi 3

Gityer me berbedo

(Lev 7:11-18)

1“Ka dano mo tyero gitum me gityer me berbedo, ka tyero lee ma okwanyo ki ikin twoni dyang nyo ma roya, en bityero inyim Rwot ma kome pe kimwonyo. 2En biketo cinge iwi gityere, ci bineko i dogola Kema me Rwate; awobe pa Aron ma gin aye ajwaki gibicoro remo ikom keno tyer kun rumu twoke ducu. 3En bityero gityer ma kiwango ki mac bot Rwot ma okwanyo ki ikom gitum meno me gityer me berbedo, en aye dwolo ma oumu jam iye, ki dwolo ducu matye ikom jam iye, 4ki olang aryo ducu ki dwolo matye ikomgi matye i pyere, ki okene ki ikom acwiny, ma en bikwanyo woko kacel ki olang aryo. 5Awobe pa Aron biwango iwi keno tyer iwi gitum awanga matye iwi yen ma imac; en aye gityer ma kiwango ki mac, gin ma ngwece kur ma yomo cwiny Rwot.

6Kace lee ma okelo bot Rwot me gityer berbedo obedo lee ma okwanyo ki ikin romi, ma nyok nyo ma bwong, en bityero ma kome pe kimwonyo. 7Ka en omiyo latin romo me gityere, en bityero inyim Rwot, 8ci biketo cinge iwi gityere, ka dong neko woko inyim Kema me Rwate; ci awobe pa Aron gibicoro remone ikom keno tyer kun rumu twoke ducu. 9Lacen en bityero gityer ma kiwango ki mac bot Rwot ma okwanyo ki ikom gitum meno me gityer me berbedo, en aye dwolone, ki moo yibe olu, kun kingolo cok ki i oguru cogo ngeye, ki dwolo ma oumu jam iye, 10ki olang aryo ducu, ki dwolo matye ikomgi matye i pyere, ki okene ma ikom acwiny ma en bikwanyo woko kacel ki olang aryo. 11Ci ajwaka biwango woko iwi keno tyer, obed cam ma kityero ki mac bot Rwot.

12Kace gityere obedo dyel, en bityero inyim Rwot, 13biketo cinge iwiye, ka dong neko woko inyim Kema me Rwate; ci awobe pa Aron gibicoro remone ikom keno tyer rumu twoke ducu. 14Lacen en bityero jami magi ma okwanyo ki ikome gubed gityer ma kiwango ki mac bot Rwot, en aye dwolo ma oumu jam iye, ki dwolo ducu ma ikom jam iye, 15ki olang aryo ducu, ki dwolo ma ikomgi matye i pyere, ki okene ma ikom acwiny ma en bikwanyo woko kacel ki olang aryo. 16Ajwaka biwangogi iwi keno tyer obed cam ma gityero ki mac, ma ngwece kur. Dwolo ducu bedo pa Rwot. 17Bibedo cik matwal nio wa ikare pa likwayowu ducu, wa i kabedo ma wubedo iye ducu ni, pe wucam dwolo nyo remo.”