Lulevi 4

Gitum me bal

1Rwot owaco bot Moses ni, 2“Wac bot jo Icrael ni, ka dano mo obalo ma pe otimo akaka, ikom gin mayam Rwot ocikoni pe gitim, ce otimo acel mo ikin gi; 3kace ajwaka ma ki wiro ki moo aye obalo, kun okelo bal ikom lwak, myero en otyer bot Rwot wod twon ma kome pe kimwonyo pi bal ma en otimo, obed gitum me bal. 4En bikelo wod twon i dogola Kema me Rwate inyim Rwot, biketo cinge iwi twon ci neko woko inyim Rwot. 5Ajwaka ma ki wiro bikwanyo remo twon manok, ci bitero i Kema me Rwate; 6bilutu lwet cinge iremo ci bikiro remo tyen abiro inyim Rwot, inyim bongo kicika ma umu Kabedo Maleng. 7Ajwaka bireyo remo mukene ikom ten keno angwen me keno tyer me odok ma ngwece kur matye i Kema me Rwate inyim Rwot; remo twon mudonge en bionyo woko ite tedi keno tyer me gitum awanga matye idogola Kema me Rwate. 8En bikwanyo dwolo ducu ki ikom twon me gitum me bal, dwolo ma oumu jam iye, ki dwolo ducu matye ikom jam iye, 9ki olang aryo ducu ki dwolo matye ikomgi matye i pyere, ki okene ki ikom acwiny ma en bikwanyo woko kacel ki olang aryo, 10kit macalo gikwanyo ki ikom twon me gityer me berbedo; ci ajwaka biwangogi woko iwi keno tyer me gitum awanga. 11Ento pyen twon ki ringone ducu, kacel ki wiye ki tyene ki jam iye ki wee iye, 12en bitero woko ki bere wa inge gony ikabedo ma kilonyo kama kionyo iye buru, ci biwango iwi yen ki mac; i kabedo kama kionyo iye buru en aye kibiwango iye.

13Ka lwak jo Icrael ducu gutimo bal ma pe gutimo akaka, ce loke pe ongene inyim lwak, kun gutiyo gin mo acel ikom gin ducu mayam Rwot ociko ni pe kitim, ci gutingo alii; 14ka bal ma gutimoni dong ongene, ci lwak myero otyer wod twon me gitum me bal kun gikelo inyim Kema me Rwate. 15Ludongo pa lwak gibiketo cinggi iwi twon inyim Rwot, ci gibineko twon inyim Rwot. 16Ajwaka ma ki wiro bitero remo twon manok i Kema me Rwate, 17ajwaka bilutu lwet cinge i remo ci kiro tyen abiro inyim Rwot inyim bongo kicika. 18En bireyo remo mukene ikom ten keno angwen me keno tyer matye i Kema me Rwate inyim Rwot; remo mudonge en bionyo woko ite tedi keno tyer me gitum awanga matye idogola Kema me Rwate. 19En bikwanyo dwolone ducu ki ikome ci wango woko iwi keno tyer. 20En bitiyo ki twon man kit ma onongo otiyo ki twon me gitum me bal; ajwaka bitimo gin me lakok dano ki ibal ci Rwot biweko balgi. 21Ci ajwaka bitero twon woko wa inge gony, ci biwango kit macalo en wango ki twon pi bal mere. Man aye gitum me bal pa lwak mucoke.

22Ka laloc mo aye obalo ma pe otimo akaka, kun otiyo gin mo acel ikom gin ducu mayam Rwot Lubangane ociko ni pe kitim, ci otingo alii, 23ka kimiyo en ongeyo bal ma en otimoni, ci en bikelo dyel pi gityere, nyok ma kome pe kimwonyo. 24Biketo cinge iwi dyel, ci neko i kabedo ma kineko iye gitum awanga inyim Rwot; meno aye gitum me bal. 25Ajwaka bigwelo remo me gitum me bal ki lwet cinge, ci reyo ikom ten keno angwen me keno tyer me gitum awanga; remo mudonge en bionyo woko ite tedi keno tyer me gitum awanga. 26En biwango dwolone ducu iwi keno tyer, macalo dwolo me gityer me berbedo. Kitmeno ajwaka bitimo gin lakwany bal ki ikome pi bale, ci Rwot biweko bale. 271

Ka ngat mo acel ma ikin lwak obalo ma pe otimo akaka, kun otiyo gin mo acel ikom gin ducu mayam Rwot ociko ni pe gitim, ci otingo alii, 28ka kimiyo en ongeyo bal ma en otimoni, ci en bikelo dyel pi gityere, bwonge dyel ma kome pe kimwonyo, pi bale ma en otimoni. 29En biketo cinge iwi gitum me bal, ci bineko gitum me bal ikabedo ma kineko iye gitum awanga. 30Ajwaka bigwelo remo ki lwet cinge, ci reyo ikom ten keno angwen me keno tyer; remo mudonge en bionyo woko ite tedi keno tyer. 31En bikwanyo dwolone ducu ikit yo acel ma kikwanyo kwede dwolo ki igityer me berbedo, ajwaka biwango iwi keno tyer obed gin ma ngwece kur ma yomo cwiny Rwot; kitmeno ajwaka bitimo gin me koke ki ikom bale, ci Rwot biweko bale.

32Nyo ka en mito kelo latin romo me gityere pi gitum me bal, ci en bikelo bwonge ma kome pe kimwonyo. 33En biketo cinge iwi gitum me bal, ci neko i kabedo ma kineko iye gitum awangani. 34Ajwaka bigwelo remo me gitum me bal ki lwet cinge, ci bireyone iten keno angwen me keno tyer me gitum awanga; remo mudonge en bionyo woko ite tedi keno tyer. 35En bikwanyo dwolone ducu kit ma kikwanyo dwolo latin romo ki igityer me berbedo, ci ajwaka biwango iwi keno tyer ikom gityer ma kiwango ki mac bot Rwot; kitmeno ajwaka bitimo gin me koke ki ikom bale ma en otimoni, ci Rwot biweko bale.”