Lulevi 5

1“Ka kilwongo dano mo i ot kot me miyo caden ikom gin ma en oneno nyo ikom gin ma oniang loke, ce pe otucu, ci bal bidok iwiye.

2Ka dano mo ogudu kom gin ma kikwero, kadi bed kom lee tim ma oto, nyo kom lee ma paco ma oto, nyo kom gin ma lak alaka ma oto, kun pe ongeyo, en bene bidoko keni, nongo otingo alii. 3Ka dano mo ogudu gin me kwer ma a ki ikom dano matwero miyo dano doko keni, kun pe ongeyo, ka dong oniang iye, nongo otingo alii. 4Nyo ka dano mo okwongo kwong labongo tamo tere kadi bed pi timo gin mo marac nyo maber nongo otingo alii. 5Ka ngat mo otingo alii, ma otimo bal acel mo ikin magi, ci myero otuc bal ma en otimoni, 6ci okel gitume me tingo alii bot Rwot pi bal ma en otimoni, bwong romo nyo bwong dyel, obed gitum me bal; ci ajwaka bitimo gin lakwany bal ki ikome pi bale.

7Ento ka nongo latin romo oloye, ci en bikelo amam aryo nyo lutino akuri aryo bot Rwot me gitume me tingo alii pi bal ma otimoni; acel obed pi gitum me bal, acel pi gitum awanga. 8En bikelogi bot ajwaka, ci ajwaka bikwongo tyero acel me gitum me bal. Bidwoyo ngute turu woko, ento pe biputo wiye, 9ci bikiro remo manok me gitum me bal ibut keno me tyer, remo mudonge en bibiyo cwer ite tedi keno tyer; en aye gitum me bal. 10Lacen ajwaka bityero me aryone me gitum awanga kit ma kiciko; kitmeno ajwaka bitimo gin lakwany bal ki ikome pi bal ma en otimoni, ci Rwot biweko bale.

11Ento ka nongo amam aryo nyo lutino akuri aryo oloye, ci bikelo agwata moko kwon acel me moko mapwote me gityer mere pi bal ma otimo, obed gitum me bal. Pe bionyo iye moo pe bene biketo iye odok angwece, pien obedo gitum me bal. 12En bikelo bot ajwaka, ci ajwaka bijobo pong cing acel obed gin me po ikome, biwangone iwi keno tyer, iwi gityer ma kiwango ki mac bot Rwot; en aye gitum me bal. 13Kitmeno ajwaka bitimo gin lakwany bal ki ikome pi bal ma otimo pi lok mo acel ikom magi, ci Rwot biweko bale. Mudonge bibedo pa ajwaka, macalo kitimo ikom gityer me moko kwon.”

Gitum me tingo alii

14Rwot owaco bot Moses ni, 15“Ka dano mo oturu cik pa Lubanga kun otimo bal ma pe otimo akaka ikom mot mo maleng ma myero en omii bot Rwot, en bikelo gitume me tingo alii bot Rwot, nyok ma kome pe kimwonyo ma okwanyo ki ikin romi iwel ma ingolo i cekel me ryal kun ilubu wel ma kimoko, obed gitum me tingo alii. 16Dok en biculu wang gin ma en obalo iye ikom mot maleng, kun medo iye acel me abic, ci miyo bot ajwaka. Ajwaka bitimo gin lakwany bal ki ikome ki nyok romo me gitum me tingo alii, ci Rwot biweko bale.

17Ka dano mo obalo kun otiyo gin mo acel ikom gin ducu mayam Rwot ociko ni pe kitim, kadi bed pe ongeyo, nongo otingo alii, ci bal bidok iwiye. 18En bikelo bot ajwaka nyok ma kome pe kimwonyo ma okwanyo ki ikin romi, i wel ma kimoko, obed gitum me tingo alii. Ajwaka bitimo gin lakwany bal ki ikome pi bal ma opoto iye ma pe me akaka, ci Rwot biweko bale. 19En aye gitum me tingo alii, nongo en otingo alii inyim Rwot.”