Lulevi 6

11

Ci Rwot dok owaco bot Moses ni, 2“Dano twero balo kun turu cik pa Rwot, macalo: ka obwolo lawote ikom gin ma con okano bote, nyo gin ma ojengo bote, nyo ka omayo jamine, nyo oburu lawote, 3nyo onongo gin ma orwenyo ci oloko iye lok goba, kun okwongo iye kwong me goba; nyo otimo gin mo acel ikom gin ducu ma dano gitimo ci gibalo kwede. 4Ka ngat mo obalo kumeno ci otingo alii, en bidwoko wang gin ma omayoni, nyo gin ma en otero me bura, nyo gin ma onongo kikano bote, nyo gin ma orwenyo ma en onongo, 5nyo gin moni ma en okwongo iye kwong me goba. Bidwoko ducu ki bere, dok bimedo acel me abic ikome, ci miyo bot won jami inino ma en tyero iye gitume me tingo alii. 6En bikelo gitume me tingo alii bot Rwot, nyok ma kome pe kimwonyo ma okwanyo ki ikin romi, iwel ma kimoko, wek obed gitum me tingo alii; bikelo bot ajwaka. 7Ajwaka bitimo gin lakwany bal ki ikome inyim Rwot, ci Rwot biweko bale ikom gin moni ki ikom gin ducu ma dano twero tiyo mamiyo gitingo alii.”

Cik mukene ikom gityer mapatpat

8Rwot owaco bot Moses ni, 9“Cik Aron ki awobene ni: Man aye cik me gitum awanga, gitum awanga bibedo ikeno tyer dyewor benebene nio wa odiko, kun mac myero otik lyel iye. 10Ajwaka biruku bongo arukane bongo camanini, ci ruku pali camaninine ipyere, ka bijobo buru ma odong ka mac dong owango gitum awanga woko, ci keto inget keno tyer. 11Ka dong en bilunyo bongine woko ruku bongi mukene, ci tero buru woko wa inge gony ikabedo ma kilonyo. 12Mac ma iwi keno tyer bibedo kalyel nakanaka, pe myero oto. Ajwaka biwango iye yen i rupiny odiko ducu, bicano gitum iwiye kikore, dok biwango dwolo bene iwiye me gityer me berbedo. 13Mac bibedo kalyel iwi keno tyer nakanaka, pe myero oto.

14Man aye cik me gityer me moko kwon. Awobe pa Aron gibityerone inyim Rwot, inyim keno me tyer. 15Ajwaka bijobo moko kwon mapwoti pong cing acel ki igityer me moko kwon, kacel ki moone ki odok angwece ma ikom gityer me moko kwon, ci wango iwi keno tyer ma ka wange, wek obed gin ma ngwece kur ma yomo cwiny Rwot. 16Ma odonge Aron ki awobene gibicamo; gibicamo ma tobi pe iye i kabedo mo maleng, idyekal me Kema me Rwate. 17Pe gibitedo capate ki tobi. Atyeko miyo botgi me bedo dul megi me gityer mera ma kiwango ki mac; en gin maleng makato, calo gitum me bal ki gitum me tingo alii. 18Co ducu ma ikin likwayo pa Aron gitwero camo dul man ma kikwanyo ki ikom gityer ma kiwango ki mac bot Rwot; en cik ma bibedo matwal wa ikare pa likwayowu ducu. Ngat ma ogudu bidoko maleng.”

19Rwot owaco bot Moses ni, 20“Man aye gityer ma Aron ki awobene gibityero bot Rwot inino ma ki wire iye ki moo: agwata moko kwon acel me moko mapwote, obed gityer me moko kwon me nino acel acel; kibityero nucune odiko ki nucune otyeno. 21Kibitedo ki moo i otako nyonyo; kibikelo madong kirubu woko maber, ma nongo kingido matinotino calo gityer me moko kwon, kityer obed gin ma ngwece kur ma yomo cwiny Rwot. 22Ajwaka ma oa ki ikin awobe pa Aron ma kibiwiro ki moo me leyo kakare bityero bot Rwot pi cik ma bibedo matwal; kibiwango ducu ki bere. 23Gityer me moko kwon pa ajwaka kibiwango woko ducu ki bere; pe kibicamo.”

24Rwot owaco bot Moses ni 25“Wac bot Aron ki awobene ni, man aye cik me gitum me bal. I kabedo ma kineko iye gitum awangani, en aye kibineko iye gitum me bal inyim Rwot; en gin maleng makato. 26Ajwaka ma otyero pi bal en aye bicamone; bicamo i kabedo mo maleng, idyekal me Kema me Rwate. 27Gin ducu ma ogudu ringone bidoko maleng; ka remone okir ikom ginaruka, ibilwoko gin ma remo okir ikomeni i kabedo mo maleng. 28Agulu lobo ma kitedo iye kibineko woko; ento ka kitedo i wee mola, ci kibirudu kome, kun kilako ki pii. 29Co ducu ma ikin ajwaki gitwero camone; en gin maleng makato. 30Ento gitum me bal pe kibicamone teke remone kitero i Kema me Rwate pi timo gin lakwany bal i Kabedo Maleng; kibiwango woko awanga ki mac.”