Lulevi 7

1“Man aye cik me gitum me tingo alii. En gin maleng makato. 2Ikabedo ma gineko iye gitum awangani en aye gibineko iye gitum me tingo alii, ci gibicoro remone ikom keno tyer rumu twoke ducu. 3Kibityero dwolone ducu, moo yibe, dwolo ma oumu jam iye, 4olang aryo ducu ki dwolo ma ikomgi matye ipyere, ki okene matye ikom acwiny ma en bikwanyo woko kacel ki olang aryo. 5Ajwaka biwangogi iwi keno tyer obed gin ma kiwango ki mac bot Rwot; en aye gitum me tingo alii. 6Co ducu ma ikin ajwaki gitwero camone; gibicamo i kabedo mo maleng; en gin maleng makato. 7Gitum me tingo alii rom ki gitum me bal, cikgi tye acel; ajwaka ma otimo kwede gin lakwany bal, en aye biterone. 8Dok ajwaka ma otyero gitum awanga pa ngat mo bitero pyen me gitum meno ma en otyeroni. 9Gityer me moko kwon ducu ma kitedo i keno, ki mukene ma kitedo ki cupuriya nyo i otako nyonyo, bibedo pa ajwaka ma otyeroni. 10Gityer me moko kwon ducu, ma kirubu ki moo, nyo ma nonone, bibedo pa awobe pa Aron ducu; ngat man bitero marom ki lawote.

11Man aye cik me gityer me berbedo ma ngat mo bityero bot Rwot. 12Ka en tyero pi miyo pwoc, ci bityero, kacel ki gityer me pwoc, capat ma tobi pe iye ma kirubu ki moo, capat marep ma tobi pe iye ma kireyo moo ikomgi, ki capat ma tobi pe iye me moko kwon mapwote ma kirubu maber ki moo. 13En bityero bene capat me mugati ma kirubu iye tobi kacel ki gitume me gityer me berbedo. 14Ikom magi en bityero capat acel ki ikom gityer acel acel obed gityer bot Rwot; meno bibedo pa ajwaka ma ocoro remo me gityer me berbedo. 15Ringo me gitume me gityer me berbedo pi miyo pwoc kibicamo inino ma en otyero iye; en pe biweko mo dong nio odiko. 16Ento ka gityere obedo gityer me cobo kwong, nyo gityer mo ma iye opwoyo, kibicamo inino ma en otyero iye, dok mudonge kitwero camo orwone. 17Ento ringo mo me gitum mere ma odong inino me adeke myero kiwang awanga ki mac. 18Ka kicamo ringo mo me gitum mere me gityer me berbedo inino me adeke, Lubanga pe bigamo ngat ma otyeroni, dok pe kibikwano ni en otyero gin mo, bibedo gin me kwer, ngat ma ocamo, bal bidok iwiye.

19Ringo ma ogudu kom gin mo ma kikwero pe kibicamo; kibiwangone awanga ki mac. Jo ducu ma gulonye gitwero camo ringo, 20ento ka ngat mo ocamo ringo me gityer me berbedo pa Rwot ma onongo en odoko keni, dano meno pe kibikwano ikin jo Icrael. 21Ka ngat mo ogudu kom gin mo ma kikwero, kadi bed gin me kwer ma ikom dano, nyo lee ma kikwero, nyo kit gin moni me kwer ma keni, ka dok camo kwede ringo me gityer me berbedo pa Rwot, dano meno pe kibikwano ikin jo Icrael.”

22Rwot owaco bot Moses ni, 23“Wac bot jo Icrael ni, pe myero wucam kit dwolo ducu, kadi me twon, kadi me romo nyo me dyel. 24Dwolo geng lee ma oto kene, ki dwolo lee ma nguu omwodo gitwero tic kwede i yo mukene ducu, ento pe gibicamo kadi ki acel. 25Dano ducu ma ocamo dwolo lee mo ma kityero kwede gityer ma kiwango ki mac bot Rwot, pe kibikwano ikin jo Icrael. 261Dok pe wubicamo remo gin mo ducu, kadi bed me winyo nyo me lee, kama wubedo iye ducu. 27Dano ma ocamo remo gin mo, pe kibikwano ikin jo Icrael.”

28Rwot owaco bot Moses ni, 29“Wac bot jo Icrael ni, ngat ma otyero gitume me gityer me berbedo myero okel gityer mere ma okwanyo me amiya bot Rwot. Ki ikom gityer mere me berbedo, 30en bikelo gire ki cinge gityer ma kiwango ki mac bot Rwot; en bikelo dwolo ki gok, wek kikwat gok obed gityer me akwata inyim Rwot. 31Ajwaka biwango dwolo iwi keno tyer, ento gok bibedo pa Aron ki awobene. 32Em ma lacuc wubimiyo bot ajwaka obed gityer mere ma oa ki ikom gitum me gityer me berbedo; 33ngat ma ikin awobe pa Aron ma otyero remo me gityer me berbedo, ki dwolone, bitero em ma lacuc obed wang wate. 34Pien gok ma kikwato, ki em ma kityero, atyeko kwanyogi woko ki bot jo Icrael ki ikom gityergi me berbedo, amiyogi bot ajwaka Aron ki bot awobene, ma myero jo Icrael gumi botgi pi kare ducu ma bibino anyim. 35Man aye wang wat pa Aron ki pa awobene ma a ki ikom gityer ma kiwango ki mac bot Rwot, mayam kikwero obed megi inino mayam kikelogi wek guti bot Rwot macalo ajwaki. 36Rwot yam ociko ni jo Icrael gubed kamiyo botgi ikare mayam ki wirogi ki moo; man bibedo wang watgi matwal nio wa ikare pa likwayogi ducu.

37Man aye cik me gitum awanga, me gityer me moko kwon, me gitum me bal, me gitum me tingo alii, me keto ajwaka i dog tic, ki me gitum me gityer me berbedo, 38mayam Rwot ociko ki Moses iwi got Cinai inino mayam ociko iye jo Icrael ni gukel gityer megi bot Rwot, i tim Cinai.”