Lulevi 8

Kwero Aron ki awobene pi tic maleng

(Nia 29:1-37)

1Rwot owaco bot Moses ni, 2“Ter Aron kacel ki awobene, ki bongi arukagi, ki moo wir, ki twon me gitum me bal, ki nyogi romi aryo, ki aduku me Mugati ma Tobi Pe iye; 3ci icok lwak ducu kacel idogola Kema me Rwate.” 4Moses otiyo kit macalo Rwot ocike; ci lwak gucoke idogola Kema me Rwate.

5Moses owaco bot lwak ni, “Man aye gin ma Rwot ociko ni kiti.” 6Ci Moses okelo Aron ki awobene ci olwokogi ki pii. 7En oruku Aron ki kanyi, otweyo pyere ki kitambara latwe pyer, ka dok oruke ki jor, oketo epod ikome, otweyo pyere ki ceme me epod ma kicweyo ki diro, otweyo, orido kwede ikome. 8Oketo kicaa kor i kore, ka dok oketo Urim ki Tumim i kicaa kor. 9Ka dok odwalo kitambara me adwala iwiye, ka otweyo akwaya jabu ikom kitambara me wic inyime, me bedo lalukana maleng macalo yam Rwot ociko ki Moses.

10Moses okwanyo moo wir ci owiro ki kema ki jami ducu matye iye, olonyogi kitmeno bot Rwot. 11En okiro moo ikom keno tyer tyen abiro, ci owiro keno tyer ki jami tice ducu ki moo, kacel ki otako lwok ki tedi tere, pi kwerogi. 12Dok oonyo moo iwi Aron, ci owire kwede pi kwerone. 13Moses dok okelo awobe pa Aron, ci orukugi ki kanyi, otweyo pyergi ki kitambara latwe pyer, ka otweyo kitambara adwala me wic iwigi, kit macalo Rwot yam ociko Moses.

14Lacen Moses okelo twon me gitum me bal, ci Aron ki awobene guketo cinggi iwi twon me gitum me bal. 15Moses oneko twon, ogwelo remone ci oreyo ikom ten keno angwen me keno tyer ki lwet cinge orumu kome ducu, olonyo kwede keno tyer, okwero pi kwanyo bal ki ikome. 16Dok Moses okwanyo dwolo ducu ma ikom jam iye, ki okene ma ikom acwiny, ki olang aryo ki dwologi ducu, ci owangogi iwi keno tyer. 17Ento ringo twonu ki pyene ki wee iye owango awanga ki mac woko wa inge gony, kit macalo yam Rwot ociko.

18Lacen inge man, en okelo nyok romo me gitum awanga, ci Aron ki awobene oketo cinggi iwiye. 19Moses oneko, ci ocoro remone ikom keno tyer kun rumu kome ducu. 20Ka dong kingido ringo nyok romo woko, Moses owango wiye ki ringo ma kingidoni ki dwolone. 21Jam iye ki tyene ducu kilwoko ki pii, lacen Moses owango ringo nyok romo woko ducu ki bere iwi keno tyer obedo gitum awanga, gin ma ngwece kur ma yomo cwiny Rwot. En gityer ma kiwango ki mac bot Rwot, macalo yam Rwot ociko ki Moses.

22Lacen Moses okelo nyok romo mukene, en nyok romo me keto dano i dog tic, ci Aron ki awobene guketo cinggi iwi nyok romo. 23Moses oneko, ogwelo remone ci oreyo i ogwilo it Aron ma lacuc, ki ikom twon nyig cinge ma lacuc, ki ikom twon nyig tyene ma lacuc. 24Kikelo awobe pa Aron ci Moses oreyo remo i ogwilo itgi ma lacuc, ki ikom twon nyig cinggi ma lacuc, ki ikom twon nyig tyen gi ma lacuc; ka Moses ocoro remo ikom keno tyer kun rumu kome ducu. 25Lacen okwanyo dwolo, ki moo yibe, ki dwolo ducu ma ikom jam iye, ki okene matye ikom acwiny, ki olang aryo ducu kacel ki dwologi, ki em ma lacuc. 26Ka okwanyo capat acel ma tobi pe iye ki i aduku me Mugati ma Tobi Pe iye matye inyim Rwot, ki capat acel me mugati ma kirubu ki moo, ki capat acel marep, oketogi iwi dwolo ki iwi em ma lacuc. 27En oketo magi ducu i dye cing Aron ki i dye cing awobene, ci okwatogi me bedo gityer me akwata inyim Rwot. 28Lacen Moses okwanyogi ki i cinggi, owangogi woko iwi keno tyer kacel ki gitum awanga, obed gityer me keto dano i dog tic, gin ma ngwece kur ma yomo cwiny Rwot. En gityer ma kiwango ki mac bot Rwot. 29Moses okwanyo gok, okwato me bedo gityer akwata inyim Rwot; en aye obedo wang wat pa Moses ma oa ki ikom nyok romo me ketogi i dog tic, kit macalo yam Rwot ociko.

30Moses okwanyo moo wir ki remo manok ma iwi keno tyer, ci okiro ikom Aron ki ikom bongi arukane, ki ikom awobene ki bongi arukagi; kitmeno okwero Aron ki bongi arukane, ki awobene ki bongi arukagi, gudoko maleng.

31Moses owaco bot Aron ki awobene ni, “Wuted ringo idogola Kema me Rwate, wucam ki kunu, kacel ki mugati matye i aduku me gityer me ketowu i dog tic, macalo yam aciko kun awaco ni, ‘Aron ki awobene aye gibicamone.’ 32Ringo ki mugati ma odong myero wuwang awanga ki mac. 33Pe wubikato woko ki idogola Kema me Rwate pi nino abiro, nio ka kare me ketowu i dog tic ocobe kakare, pien ketowu i dog tic bitero nino abiro. 34Gin ma kibedo katiyone tin, yam Rwot ociko ni kitim me lakwany bal ki ikomwu. 35Wun wubibedo idogola Kema me Rwate pi nino abiro, kun wulubu gin ma Rwot ociko, wek pe wuto; pien kicika kitmeno.” 36Aron ki awobene gutiyo gin ducu ma Rwot yam ociko ki i dog Moses.