Lulevi 9

Aron otyero gitum mapatpat

1Inino me aborone Moses olwongo Aron ki awobene ki ludongo pa jo Icrael, 2ci owaco bot Aron ni, “Kwany wod twon, pi gitum me bal, ki nyok romo pi gitum awanga, ma pe komgi kimwonyo ducu, wek ityergi inyim Rwot. 3Dok iwac bot jo Icrael ni, ‘Wukwany nyok dyel pi gitum me bal, wod twon ki latin romo ma ditogi tye mwaka acel acel ma pe komgi kimwonyo, pi gitum awanga. 4Ka dok wukwany twon ki nyok romo pi gityer me berbedo, me atuma inyim Rwot, ki gityer me moko kwon ma kirubu ki moo; pien Rwot binen botwu tin.’” 5Ci gukelo gin ma Moses ociko inyim Kema me Rwate; ci lwak ducu gunyiko cok, gucung inyim Rwot. 6Moses owaco ni, “Man aye gin ma Rwot ociko ni wutii, ci deyo pa Rwot binen botwu.” 71Moses dok owaco bot Aron ni, “Nyik cok ki keno tyer, wek ityer gitum me bali ki gitum awangani, ci i tim gin lakwany bal ki ikomi ki ikom lwak bene. Dok ikel gityer pa lwak wek i tim gin lakwany bal ki ikomgi macalo yam Rwot ociko.”

8Aron ocako nyiko cok ki keno tyer ci oneko wod twon me gitum me bal ma onongo tye pire kikome. 9Ka awobe pa Aron gumiyo remo bote, en olutu lwet cinge i remo ci oreyo kom ten keno angwen me keno tyer, ka oonyo remo ite tedi keno tyer. 10Ento dwolo ki olang aryo ki okene matye ikom acwiny ma okwanyo ki ikom gitum me bal en owango woko iwi keno tyer, kit macalo yam Rwot ociko ki Moses. 11Ringone ki pyene en owango awanga ki mac woko inge gony.

12Ka oneko lee me gitum awanga, ci awobe pa Aron gumiyo remo bote, ci en ocoro ikom keno tyer kun rumu kome ducu. 13Ka dok gumiyo gitum awanga bote ikit ma kingido kwede, kacel ki wic ci en owangogi iwi keno tyer. 14En olwoko jam iye ki tyene ducu, ci owangogi iwi keno tyer kacel ki gitum awanga.

15Ka man otum, ci en otyero gityer pa lwak. Okwanyo dyel me gitum me bal ma onongo tye pi lwak, ci oneko, otyero pi bal, macalo gitum me bal mukwongo. 16Ka dok omiyo gitum awanga, otyero kun lubu cik. 17Ka otyero gityer me moko kwon, ci ojobo pong cinge, owango iwi keno tyer, omedo ikom gitum awanga me odiko. 182

Ci dok en oneko twon ki nyok romo bene, en gitum me gityer me berbedo ma onongo tye pi lwak. Awobe pa Aron gumiyo remo bote, ci en ocoro ikom keno tyer kun rumu kome ducu. 19Ka dok gumiye dwolo me twon ki me nyok romo, ki moo yibe, dwolo ma oumu jam iye, olang aryo, ki okene ki ma ikom acwiny. 20Guketo dwolo iwi gok, ci owango dwolo iwi keno tyer, 21ento gok ki em ma lacuc Aron okwato me bedo gityer akwata inyim Rwot, macalo Moses ociko. 223

Ka dong Aron oilo cinge malo tung bot lwak, ci olego gum ikomgi, ci olor piny nia ki katyero gitum me bal ki gitum awanga ki gityer me berbedo ducu. 23Lacen Moses ki Aron gudonyo i Kema me Rwate; ka gukati woko, ci gulego gum ikom lwak, ci deyo pa Rwot onen bot lwak ducu. 24Ka mac oa ki inyim Rwot obino owango gitum awanga ki dwolo ma iwi keno tyer, otyeko woko ducu. Ma lwak ducu guneno, gudange ki woo, gupoto piny aryeba ic.