Lulevi 10

Bal pa Nadab ki Abiu

1Nadab ki Abiu, awobe pa Aron, ngat acel acel okwanyo atabo weene me wango odok ma ngwece kur, guketo iye mac, ka guketo iye odok ma ngwece kur, ci gutyero mac mapat ma Rwot pe ociko ni kiwang inyime. 2Ci mac oa ki inyim Rwot, owangogi, ci guto woko ki inyim Rwot. 3Ka Moses owaco bot Aron ni, “Man aye gin ma Rwot owaco ni, ‘Abinyute kekena ikin jo ma gitye cok kweda ni aleng, dok gibiketo deyo ikoma inyim lwak ducu.’” Ento Aron oling gire mot.

4Ka Moses olwongo Micael ki Elijapan, awobe pa Ujiel omin won Aron, ci owaco botgi ni, “Wunyik cok, wek wuting omegiwu ki inyim Kabedo Maleng, wutergi woko inge gony.” 5Ci gunyiko cok, gutingo komgi ki kanyigi, guterogi woko inge gony, kit macalo Moses owaco.

6Ci Moses owaco bot Aron ki bot Eleajar ki Itamar ma gin awobene ni. “Pe wukwer jwero yer wiwu, dok pe wuyec ginarukawu, wek pe wuto, dok wek kiniga pe opot ikom lwak ducu. Ento utmegiwu, jo ducu me ot pa jo Icrael, gitwero kok pi to ma mac pa Rwot okelo. 7Pe wukat woko ki idogola Kema me Rwate, wek pe wuto, pien moo wir pa Rwot tye ikomwu.” Ci gutiyo kit ma Moses owaco botgi.

Cik ma mako tic pa ajwaki ki wang watgi

8Rwot oloko ki Aron kun waco ni, 9“Pe imat kongo bwino nyo gin ma mero dano, in kacel ki awobeni, ka wucito i Kema me Rwate, wek pe wuto; meno bibedo cik matwal nio wa ikare pa likwayowu ducu. 10Myero wupok kin jami maleng ki jami ma pe leng, ki kin gin ma keni ki gin ma pe keni. 11Dok wubipwonyo jo Icrael ki cik ducu ma Rwot ocikogi kwede ki i dog Moses.” 121

Ci Moses owaco bot Aron, ki bot Eleajar ki Itamar, awobene mayam gudong ni, “Wukwany gityer me moko kwon ma odong ki ikom gityer ma kiwango ki mac bot Rwot, ci wucam ma tobi pe iye, inget keno tyer, pien en gin maleng makato. 13Myero wucam ki i kabedo mo maleng, pien en aye wang watti ki wang wat pa awobeni ma a ki ikom gityer ma kiwango ki mac bot Rwot; pien yam kicika kitmeno. 142Ento gok ma kikwato ki em ma kityero wubicamo i kabedo mo ma kilonyo maleng, in ki awobeni ki anyirani kacel, pien kimiyogi gubed wang watti ki wang wat pa awobeni, ma a ki ikom gityer me berbedo pa jo Icrael. 15Gin bikelo em ki gok ma ki ilo malo me akwatani kacel ki gityer ma kiwango ki mac ma en aye dwolo, wek kikwat inyim Rwot me gityer akwata. Magi bibedo meri ki pa lutinoni matwal, kit macalo yam Rwot ociko.”

16Ka Moses openyo pi dyel me gitum me bal, ci onongo ni dong kiwango woko. Akemo omake ikom Eleajar ki Itamar, awobe pa Aron ma gudongi, ci owaco ni, 173“Pingo pe wucamo gitum me bal ki i Kabedo Maleng? Pien meno obedo gin maleng atika ma Lubanga omiyo ki wun wek wuting bal pa lwak, wek odok lakwany bal pirgi inyim Rwot. 18Kit macalo remo me gityer meno pe gukelo i tyelo i Kabedo Maleng, onongo omyero bene wucam gityer meno ki kunu, kit mayam aciko.” 19Aron ogamo dog Moses ni, “Nen, tin gutyero gitum me bal ki gitum awangagi inyim Rwot, ci gin macalo man dong opoto ikoma. Ka kono abedo kacamo gitum me bal tin, kono obedo myero iwang Rwot?” 20Ka Moses owinyo lok meno, ci cwinye okwe.