Lulevi 11

Lee ma kicamo ki ma kikwero

(Nwo 14:3-21)

1Rwot owaco bot Moses ki Aron ni, 2“Wuwac bot jo Icrael ni, man aye gin makwo ma wutwero camo ki ikin lee ducu matye iwi lobo. 3Lee ducu ma obong tyen gi akara, ma kin tyen gi opoke, ma nyamo omen, ma ikin lee ducu wutwero camone. 4Ento lee ma nyamo omen nyo ma obong tyen gi akara ma pe wubicamo gin ene: Kinaga kadi en nyamo omen, ento obong tyene pe akara; pimeno bedo keni botwu, wubikwerone. 5Ki oduka nyamo omen, ento obong tyene pe akara; pimeno bedo keni botwu, wubikwerone. 6Ki apwoyo bene kadi en nyamo omen, ento obong tyene pe akara; pimeno bedo keni botwu, wubikwerone. 7Ki opego, kadi obong tyene akara, kin tyene opoke, ento pe nyamo omen; pimeno bedo keni botwu, wubikwero. 8Pe wucam ringogi, pe wugud wa komgi ma oto bene; gin bedo keni botwu, wubikwerogi.

9Magi aye wutwero camogi ki ikin gin ducu ma bedo i pii. Gin ducu ma bedo i pii matye ki kinga ngegi ki pok komgi, ma i nam ki ma i kulu ducu, wutwero camogi. 10Ento gin ducu matye i nam ki i kulu ducu ma pe ki kinga ngegi ki pok komgi ikin gin ma core limuk i pii ki ikin gin makwo ma bedo i pii, bedo gin me kwer botwu. 11Gibibedo me kwer botwu; pe wubicamo ringogi, dok komgi ma otone bene bedo me kwer botwu. 12Gin ducu ma i pii ma pe ki kinga ngegi ki pok komgi bedo me kwer botwu.

13Magi aye gin ma bibedo me kwer botwu ki ikin winyo; pe wubicamogi, gin gibedo me kwer: ocur, acut, koga, 14okwata, ocecu ki kit kwayigi ducu; 15agak ki kit kwayigi ducu; 16udu, tepe, wewet, olwit ki kit kwayigi ducu; 17tula, alwinya, adyeladyel, 18lagweno kulu, kikung, ki ocur madito, 19acebe, ogoro ki kit kwayigi ducu; ki putput, ki olik.

20Kwidi ducu matye ki bwomgi, ma giwoto ki tyen gi angwen bedo me kwer botwu. 21Ento ikin kwidi matye ki bwomgi, ma giwoto ki tyen gi angwen, wutwero camo gin matye ki tyen gi mabocone ma gipye kwede iwi lobo. 22Wutwero camo magi ikin gi: bonyo ki kit kwayigi ducu; lacene ki kit kwayigi ducu, labar ki kit kwayigi ducu; ki otwongo ki kit kwayigi ducu. 23Ento kwidi mukene ducu ma gitye ki bwomgi, ma gitye ki tyen gi angwen, gibedo me kwer botwu.

24Magi gin ma bimiyo wudoko keni; ngat ma ogudu kom ma otone bibedo keni nio wa otyeno. 25Ngat ma otingo dul komgi mo ma otoni bilwoko bongine ci bibedo keni nio wa otyeno. 26Lee ducu ma obong tyene akara, ento kin tyene pe opoke, nyo ma pe nyamo omen, bedo keni botwu; ngat ma ogudu komgi bibedo keni. 27Ki lee ducu ma woto ki opany tyen gi, ikin lee ducu ma giwoto ki tyen gi angwen, bedo keni botwu. Ngat ma ogudu kom ma otone bibedo keni nio wa otyeno. 28Dok ngat ma otingo kom ma otone bilwoko bongine ci bibedo keni nio wa otyeno; gin bedo keni botwu, wubikwerogi.

29Man aye gin ma bedo keni botwu ki ikin gin ma nya ma core limuk iwi lobo: oculi, oyo adeng, lagwe lakaka ki kit kwayigi ducu, 30laromo ot, ngec, lagwe kweyo, ki langogo. 31Magi aye gin ma keni botwu ki ikin gin ducu ma gicore limuk; ngat ma ogudu komgi ka guto bibedo keni nio wa otyeno. 32Ka mo ikin magi madong otone opoto ikom jami moni, jaminu bibedo keni, kadi wee, nyo bongo aruka, nyo laa, nyo kicaa, jami mo keken ma kitiyo kwede pi kit tic moni; myero kiket i pii, ci bibedo keni nio wa otyeno, ka dong bibedo ma olony. 33Dok ka mo ikin gi opoto i agulu, nyo atabo nyo kit gin mo macalo meno ma kicweyo ki lobo, gin ducu matye iye bibedo keni, agulu nyo atabo wubineko woko. 34Gin acama mo ma kicamo ce ki onyo iye pii ma i agulu meno, bibedo keni; ki gin amata ma kimato ki i agulu nyo atabo meno bibedo keni. 35Jami ducu ma dul komgi mo ma otoni opoto ikome bibedo keni, kadi keno nyo tuk keno kibimuku woko; gin gudoko keni, ci gibibedo keni botwu. 36Kadi bed kumeno, ento ka kom gin magi mutoni opoto iwang it nyo got ma kipayo me jolo pii bibedo ma olony; ento gin ducu ma bigudo kom gin ma otoni bibedo keni. 37Ka dul komgi ma otoni opoto ikom kodi mo me acoya, ma kibicoyo, kodinu bibedo ma olony; 38ento ka onongo kionyo pii ikom kodinu, ce dul kom gin mo ma otoni opoto ikome, ci bedo keni botwu.

39Ka lee mo ma kicamo oto woko, ngat ma ogudu geng meno bibedo keni nio wa otyeno. 40Ngat ma ocamo geng meno bilwoko bongine ci bibedo keni nio wa otyeno. Dok ngat ma otingo geng meno bilwoko bongine, ci bibedo keni nio wa otyeno.

41Gin ducu ma nya ma core limuk iwi lobo gin aye gin me kwer; pe wubicamogi. 42Gin ducu ma woto kun ywane ki iye, ki gin ducu ma woto ki tyen gi angwen, nyo matye ki lwak tyen gi mapol, gin ducu ma nya ma core limuk iwi lobo pe wubicamogi, pien gin aye gin me kwer. 43Pe wuloke wudok gin me kwer pi gin moni ma nya ma core limuk; dok pe wubale wudok keni pirgi. 441Pien An a Rwot Lubangawu; pimeno wulonye kekenwu wubed maleng, pien an aleng. Pe wubale wudok keni pi gin mo ma core limuk ma lak iwi lobo. 45Pien an aye a Rwot ma akwanyowu woko ki i lobo Ejipt, wek abed Lubangawu; ma omiyo wubed jo maleng, pien an aleng.

46Man aye cik ma otiko lee ki winyo ki gin makwo ducu ma kwang i pii, ki gin ducu ma core limuk iwi lobo, 47wek dano gupok kin gin ma keni ki gin ma olony, ki kin gin makwo ma kitwero camo ki gin makwo ma pe kitwero camo.”