Nia 27

Cik ma mako keno tyer

(Nia 38:1-7)

1“Ibiyubu keno tyer ki bao yat okutu lalwii; bore obed futi abiro ki nucu ki lace futi abiro ki nucu. Bore ki lace bibedo ma romrom, ki bore tung malo bibedo futi angwen ki nucu. 2Ibiyubu ten keno ikom twoke angwen ducu; ten keno ducu gibikube kacel kwede, dok ibimwono kome woko ki mola. 3Ibiyubu lajob burune, ki latok mace, ki becen, ki gin lacob ringo, ki wee lawang mac; jami tic meno ducu ibiyubugi ki mola. 4Yub keikeine bene me obwo mola, dok i twok obwo mola angweni iket iye agit angwen me mola. 5Ibiketo ite rii me keno tyer wek obwo obut ikor keno tyer. 6Dok iyub tal me keno tyer, tal me yat okutu lalwii, ci ibimwono komgi woko ki mola. 7Ibirwako tal donyo i agit ducu, wek tal oriine ikeno tyer tungi ki tungi me latinge. 8Ibiyubu keno tyer ma iye twolo, ki bao; yub kit macalo yam kinyuti iwi got.”

Dyekal me Kema me Rwate

(Nia 38:9-20)

9“Ibiyubu dyekal me kema. Itung acuc me dyekal kibingabo iye bongo cuka camanini ma kiwiyo maber, ma bore tungcel romo mita pyere angwen wiye angwen. 10Wir bibedo pyere aryo, ki tedi tergi bene pyere aryo, me mola, ento lagol me wir ki otacgi ducu gubed me ryal. 11Ki tung kumalo bene bore obed kitmeno, kunu bene kibingabo iye cuka ma bore romo mita pyere angwen wiye angwen; wir obed pyere aryo ki tedi tergi pyere aryo me mola, ento lagol me wir ki otacgi ducu gubed me ryal. 12Ki bute ma tung kupotoceng me dyekale bene kibingabo iye bongo cuka ma bore romo yadi pyere aryo wiye aryo; wir obed apar ki tedi tergi bene obed apar. 13Lac dyekal ma tung nyime ma tung kunyango biromo mita pyere aryo wiye aryo. 14Kibingabo bongo cuka inget dog gang tungcel maromo mita abicel ki nucu; wir obed adek ki tedi tergi adek. 15Ki tung mukene bene kibingabo iye bongo cuka maromo mita abicel ki nucu; wirgi obed adek ki tedi tergi adek. 16Doggang me dyekal kibiumu ki bongo cuka ma lace romo mita abongwen ma kitiyo ki uci mabulu ki ma lamarlamar ki makwar, ki bongo camanini makiwiyo maber, ma kideyo maber; bibedo ki wir angwen ki tedi tergi angwen. 17Wir murumu dyekal ducu bibedo iye otac me ryal; lagolgi bibedo me ryal, ki tedi tergi me mola. 18Bor me dyekal biromo mita pyere angwen wiye angwen, ki lace mita pyere aryo wiye aryo, ki bore tung malo futi abiro ki nucu; kibingabo iye bongo cuka camanini ma kiwiyo maber; tedi te wir bibedo me mola. 19Jami tic ducu ma i kema ma konyo kwayi tic ducu, kacel ki teke lagure ducu, ki teke ma orumu dyekal ducu bibedo me mola.”

Gwoko tara

(Lev 24:1-4)

20“Dok ibiciko jo Icrael ducu gukel moo me nyig jeituni ma kiodo, kiliyo maleng, me menyo piny, wek kiket mac laput obed kalyel nino ducu ma pe to. 21Aron ki awobene myero guyub mac olyel inyim Rwot nia otyeno nio odiko, kun giketo i Kema me Rwate, ki woko inge bongo kicika ma inyim Canduk lok me Gicike. Man bibedo cik ma jo Icrael bigwoko matwal, wa ikare pa likwayogi ducu.”