Nia 26

Kit me yubu Kema me Rwate

(Nia 36:8-38)

1“Dok ibiyubu kema ki bongo cuka camanini apar makiwiyo maber ki uci mabulu, ki ma lamarlamar, ki makwar; ibicweyo iye cal lukerubi ma kiyubugi ki diro atika. 2Bor bongo cuka acel acel ducu obed maromo mita apar wiye angwen, ki lac igi obed maromo mita aryo bongo cuka ducu gubed marom. 3Kwany cuka abic ci iribgi ka ikwogi kacel i dul mukwongo, ka dok cuka abic ma odong ca bene ikwogi kacel i dul me aryo. 4Kwo lagol jarara mabulu i dog bongo cuka me dul mukwongo, ka dok i kwo lagol jarara i dog bongo cuka me dul me aryone marom ki wadi. 5Kwo lagol jarara pyere abic i dog bongo cuka me dul mukwongo, ka dok i kwo lagol jarara pyere abic i dog bongo cuka me dul me aryo wek gubed ma gukeme ki wadigi. 6Ibiyubu lagol jarara me jabu1 pyere abic me ribo dog bongo cuka ikom lawote pi golo wadi wek kema obed ma okube kacel liking.

7Ibiyubu cuka apar wiye acel me yer dyegi me laum wi kema. 8Bor cuka acel acel ducu obed maromo mita apar wiye adek, ki lac igi obed maromo mita aryo. 9Ibiribo cuka abic kacel kaken gi, ki cuka abicel bene ibiribogi kaken gi. Cuka me abiceli ibibano iye wek obed aryo inyim kema. 10Kwo lagol jarara pyere abic i dog dul me cuka mukwongo, ka dok i kwo lagol jarara pyere abic i dog dul me cuka me aryone.

11Dok ibiyubu lagol me mola me aroya iwang jarara, irib ki kema, wek obed ma okube kacel liking. 12Dul cuka me kema ma odongi, ibingabo inge kema. 13Futi acel ki nucu tungcel ki futi acel ki nucu tungcel bene, en bor me cuka ma odonge, ibipyele ibut kema tungi ki tungi me umune. 14Dok i kwo laa romo ma kinyongo, ki laa dyegi me umu wi kema.

15Ibiyubu guti me bao yat okutu lalwii, ma ocung atir, pi kema. 16Bor guti obed futi apar wiye abic ki lace futi aryo, ikom guti acel acel. 17Wek tyene aryo ikom guti acel acel, me kubugi kacel; ibiyubu guti me kema ducu kitmeno. 18Ibiyubu guti me kema, guti pyere aryo itung acuc. 19Dok ibiyubu tedi tergi me ryal maromo pyere angwen pi guti pyere aryoni, tedi tere aryo pi guti acel pi tyene aryo, ki tedi tere aryo pi guti mukene pi tyene aryo. 20Pi kema tung me aryone, ma tung kumalo, obed guti pyere aryo, 21ki tedi tergi me ryal maromo pyere angwen, tedi tere aryo pi guti acel, ki tedi tere aryo pi guti mukene. 22Pi nge kema ma tung kupotoceng bene iyub guti abicel. 23Yub guti aryo me twok kema ma ingeye; 24kibipoko kin gi kitung piny ento kiribo doggi kitung wigi malo ikom agit wi kema mukwongo; gin aryo ducu gibibedo kitmeno, ci twoke bibedo aryo. 25Guti bibedo aboro, ki tedi tergi me ryal apar wiye abicel, tedi tere aryo pi guti bao acel, ki bao acel pi tedi tere aryo mukene ca.

26Dok ibiyubu rii me bao yat okutu lalwii abic pi guti me kema tungcel, 27ki rii bao abic pi guti me kema tung mukene, ki rii bao abic pi guti me kema me ngeye tung kupotoceng. 28Rii bao ma idyere, ma ngolo kor guti ari, bia ki i agiki tungcel nio i agiki tung mukene. 29Ibimwono kom guti woko ki jabu, dok ibidolo agit me rwako iye rii bao, ibimwono rii bao bene ki jabu. 30Gur kema ikit mayam kinyuti iwi got.

31Dok ibiyubu kema ki bongo cuka camanini apar makiwiyo maber ki uci mabulu, ki ma lamarlamar, ki makwar; ibicweyo iye cal lukerubi ma kiyubugi ki diro atika. 32Ibingabo ikom wir angwen me bao yat okutu lalwii ma kimwono komgi woko ki jabu, matye iye lagol me jabu, ma ocung ikom tedi tergi me ryal angwen. 33Ngab bongo kicika ki jarara lagole i dan kema. Ket Canduk lok me Gicike inge bongo kicika, ci bongo kicika bipoko kin Kabedo Maleng ki Kabedo maleng Makato ducu. 34Ka dong iket kom me kica iwi Canduk lok me Gicike i Kabedo Maleng makato ducu. 35Ket meja ki woko inge bongo kicika, ki lacib mac iket tung acuc me kema, ma okemo meja; ibiketo meja tung kumalo.

36Dok i kwo bongo cuka Laum dogola me kema ki uci mabulu, ki ma lamarlamar, ki makwar, ki bongo camanini makiwiyo maber, ma kikwoyo deyo ikome maber. 37Yub pagi abic me lyero cuka laum dogola ki bao yat okutu lalwii, ci imwon komgi woko ki jabu; lagolgi bibedo me jabu, dok ibiliyo tedi tergi me mola abic.”