Nia 25

Mot pi Kema me Rwate

(Nia 35:4-9)

1Rwot owaco bot Moses ni, 2“Wac bot jo Icrael ni gujoga tyer, ki gugam tyer pa dano acel acel ma okelo kit ma winyo i cwinye. 3Man aye kit tyer ma wubigamo ki botgi: jabu, ryal, mola; 4uci mabulu, ki ma lamarlamar, ki makwar, ki bongo camanini maber; laa dyegi; 5laa nyogi romi ma kinyongo, bao yat okutu lalwii; 6moo me mac tara, angwece me yubu moo wir ki pi odok eceta ma ngwece kur; 7lutino kidi onik ki lutino kidi me wel me amwona ikom jabu pi epod ki kicaa me kor. 8Ber dano oyuba Kabedo Maleng wek abed ikin gi. 9Wutii gin ducu kun wulubu kit cal ma abinyuti, ma dok ikom yubu kema ki jami ducu ma kibiketo iye.”

Canduk lok me Gicike

(Nia 37:1-9)

10“Gin bipayo Canduk ki bao yat okutu lalwii; bore obed futi1 angwen, ki lace futi aryo, ki bore tung malo futi aryo. 11Mwon kome woko ki jabu ma kiliyo maber, mwon iye ki ngeye bene. Lul doge ducu irum woko ki jabu. 12Yub agit me jabu angwen pire, iketgi ikom tyene angwen: ket agit aryo tungcel ki aryo mukene tungcel. 13Yub tal yat okutu lalwii, imwon komgi woko ki jabu. 14Rwak tal i agit ducu matye ibut Canduk me tingone. 15Tal gibibedo i agit ma ikom canduki matwal, pe kibiwotogi woko. 16Kidi ma apada ma kicoyo iye lok me caden ma amini ibiketogi i Canduk. 172Dok ibiyubu kom me kica ki jabu ma kiliyo maber; bore obed futi angwen, ki lace futi aryo. 18Yub cal lukerubi aryo ki jabu kun itetogi ki nyol, ikom agiki kom me kica aryo ducu. 19Yub cal lakerubi acel i agikine tungcel; ki acel i agikine tungcel; ibiyubu cal lukerubi kun gikube ki kom me kica i agikine aryo ducu. 20Lukerubi gibiyaro bwomgi malo me umu kom me kica ki bwomgi, kun wanggi kemo lawote; wang Lukerubi binen kun kemo kom me kica. 21Ibicibo kom me kica cung iwi Canduk, ci ibiketo lok me caden ma abimiyo botini i Canduk. 22An abirwate kwedi kunu, ci abilok kwedi ki malo iwi kom me kica, ki ikin lukerubi ma gitye malo iwi Canduk lok me Gicike, kun abilok kwedi ikom cik ducu ma abimiyi pi jo Icrael.”

Meja me cano mugati ma kiketo inyim Rwot

(Nia 37:10-16)

23“Yub meja ki bao yat okutu lalwii; bore obed futi adek, ki lace futi acel ki nucu, ki bore tung malo futi aryo. 24Mwon kome woko ki jabu ma kiliyo maber, dok ilul doge ducu, irum woko ki jabu. 25Ket riine ma lace rom ki dye cing, ci ilul dog rii ki jabu orum woko. 26Dok i tim agit me jabu angwen pire, ci imwon agit itwoke angwen ducu macok ki angwen ducu. 27Agit kibiketo ikom rii, ci ibirwako iye tal me lating meja. 28Yub tal aryo ki bao yat okutu lalwii ci ilii kome ki jabu, kibitingo meja ki tal meno. 29Dok iyub cwan, ki atabo me odok eceta, ki cupane ki weene me liyo tyer amata ibitimogi ki jabu ma kiliyo maber 303Ibicano mugati me aketa inyima iwi meja jwijwi.”

Lacib mac me jabu

(Nia 37:17-24)

31“Dok ibiyubu lacib mac ki jabu ma kiliyo maber. Tedi lacib mac ki bolle kibiteto ki nyol. Wen kikopone ki laket moone ducu obed i cal ature, dok gibikube kwede kacel. 32Jange bibedo abicel ma gujany, gurye gukaco ngete ryoryo, jang lacib mac adek ma gurye ibute tungcel, ki jang lacib mac adek ma gurye itung mukeneni. 33Ikom jange tungcel bibedo iye kikopo adek ma kiyubu macalo tur yaa, kun acel acel tye ki wene ki ature, ki ikom jange tung mukene bene bibedo iye kikopo adek ma kiyubu macalo tur yaa, kun acel acel tye ki wene ki ature jange abicel ducu ma gurye gukaco lacib mac. 34Ka dok ikom lacib mac kikomeni bibedo iye kikopo angwen ma kiyubu iye ature macalo tur yaa me deyogi. 35Kiwek ature acel acel obed piny ite jange abicel ma gurye ryoryo ikom lacib mac. 36Wen gi, janggi, ki lacib mac, kiyub ki ikom jabu acelu ma kiliyo maber ma kiteto ki nyol. 37Ci dong ibiyubu laput abiro, ma kicibo malo i wiye, ibicwinyogi wek gumeny kabedo ma inyime. 38Lakar mac ki canine bibedo me jabu ma kiliyo maber. 39Kiyub lacib mac kacel ki jami tic magi ducu ki jabu ma kiliyo maber ma peke romo kilo pyere adek wiye abic. 404Nen maber ni iyubugi ikit cal ma kinyuti ki iwi got.”