Nia 24

Kimoko gicike

1Rwot dok owaco bot Moses ni, “Bin malo bota kany, in ki Aron, Nadab ki Abiu, ki ludongo pa jo Icrael pyere abiro; ci wuwora ma nongo pud wutye kamabor. 2In keni aye ibinyiko cok bota. Jo mukene ducu pe gibinyiko cok, dok lwak bene pe gibibino kwedi malo.”

3Ci Moses ocito otito ki lwak lok ducu ma Rwot owaco, ki cike ducu. Lwak ducu gugamo ki dwon acel kun giwaco ni, “Wabitiyo lok ducu ma Rwot owaco.” 4Moses ocoyo lok ducu ma Rwot owaco. Ci orwone oa malo odiko con, ocano keno tyer ite got, ki wir apar wiye aryo, muporo wel kaka pa jo Icrael apar wiye aryo. 5Ci ocwalo awobe pa jo Icrael, ci gutyero gitum awanga dok gutumu twoni me gityer me lakwecwiny bot Rwot. 6Lacen Moses okwanyo nucu remo, oonyo iwee, ki nucu remo ocoro ikom keno tyer. 7Ka dok okwanyo buk me gicike, okwano bot lwak, ci guwinyo. Lwak gugamo ni, “Wabitiyo gin ducu ma Rwot owaco, dok wabiworo doge bene.” 81Ka Moses dok otingo remo, ocoro ikom lwak, kun waco ni, “Nen remo me gicike ma Rwot oketo kwedwu, malubu lok magi ducu.”

9Ka Moses ki Aron, Nadab ki Abiu, ki ludongo pa jo Icrael pyere abironi gucito malo, 10ci guneno Lubanga pa Icrael. I katyene onongo tye gin mo maryeny calo kidi capir ma kipeto, manen mabulu calo polo kikome. 11Ento Lubanga pe oneko ludongo pa Icrael; kadi bed gunene, ci gucamo dok gumato pii bene.

Moses iwi got Cinai

12Rwot owaco bot Moses ni, “Bin bota malo iwi got, ci ikura kunu, abimini kidi ma apada, kacel ki cik ki gin acika ma acoyo me pwonyo lwak.” 13Ci Moses oa malo, kacel ki Yocwa ma lakonye, ka ocito iwi got pa Lubanga. 14Ci owaco ki ludongo ni, “Wubed wukurwa kany, nio ka dok wadwogo botwu, Nen, Aron ki Kur gudong botwu; ka ngat mo tye ki lok mo, oter botgi.”

15Ka Moses oito malo iwi got, ci pol oumu got woko. 16Deyo pa Rwot obedo ikom got Cinai, ci pol oumu kema pi nino abicel. Ikom nino me abirone, Rwot olwongo Moses ki i dye pol. 17Ikare meno deyo pa Rwot onen bot jo Icrael macalo mac arum iwi got. 182Moses ocito malo iwi got ci odonyo i dye pol, ci obedo iwi got kunu pi nino pyere angwen, dyeceng ki dyewor.