Nia 23

Ngolo kop atir dok ma opore

11

“Pe irwe lok ma iwinyo awinya ata; pe iribe ki dano marac kakelo lok goba me keto can ikom dano. 2Pe ilub lwak ma gitiyo gin marac. Ka ilok me pido, pe iloke ilub kor lwak pi balo ngolo kop atir. 32 Ka kitye kapido ikom lacan, pe idwor kore ipidone. 43

Ka irwate ki twon nyo kana, ma orwenyo, neni idwoko bot rwode kadi obedo pa lamoneni. 5Ka ineno kana pa ngat madagi obutu woko piny pi yec mubwoye, pe iwek ata, kony rwode wek kanane oa malo. Pe ikat akata. 64

Pe ibal ngolo kop atir pa danoni ma lacan wek lok oloye. 7Pe idot adot goba ikom ngat mo, dok pe inek ngat mo ma peke ki bal, pien pe abiweko labalo cito ma pe angolo kop ikome. 8Pe igam lim lawil loyo kop, pien lim lawil loyo kop miyo jo maneno piny wanggi ume woko, ci balo ngolo kop atir pa dano ma loke tye atir. 95

Pe iun larok ma bedo ikinwu, pien wun bene wungeyo cwiny lubedo, pien wun bene wubedo lubedo i Ejipt.”

Mwaka me abiro ki nino me Cabit

106

“Pi mwaka abicel ibicoyo kodi i potoni dok ibicoko cam ma cek iye. 11Ento i mwaka me abirone ibiweko ywe mot miyo okange kong roc, wek arupinye pi lucan ma ikinwu gunong ginacama; ki ma obote lee tim bicamone. Ibitimo kitmeno ki poto oloki ki poto jeitunini bene. 127

Ti tici nino abicel, ento ikom nino me abirone ibiywe, wek twon ki kanani gunong yweyo, dok wek latin pa angecani ki labedo boti guom kero komgi iye. 13Wulub gin ducu ma awaco botwu, dok pe wuleg bot lubanga mukene; lok ma kit eno pe kiwiny ka a ki idogwu.”

Karama madito adek

(Nia 34:18-26; Nwo 16:1-17)

14“Ibikwero karama madito adek me woro an i mwaka acel acel. 15Idwe me Abib, ma en aye dwe mayam ia iye ki i Ejipt, 8ibikwero nino madito me Mugati ma Tobi pe iye, macalo yam aciko. Pe ibicamo mugati mo ma tobi tye iye pi nino abiro. Dong dano mo pe obin kawora ki cinge nono. 169Ibikwero nino madito me Karama me Kac, pi cam mukwongo cek malubu tic me cingi, ikom cam ma icoyo i poto; ki nino me Karama me Bolo iagiki me mwaka, ka dong ityeko coko olok, nyig Jeituni ma ocek ipotoni. 17Co ma boti ducu gibibino inyim Rwot Lubanga tyen adek i mwaka acel ikarama magi.

18Pe ityer mugati ma tobi tye iye kacel ki lee me gitum; pe iwek dwolo mo me kwero nino madito bota obed nio wa odiko. 1910

Cam ducu mukwongo cek i potoni me wi mwaka myero ikel i Ot pa Rwot Lubangani.

Pe ited ringo latin dyel ki cak pa mine.”

Cike ki pwony pa Lubanga bot jo Icrael

20“Nen, abicwalo lamalaika inyimwu pi gwokowu i yoo, ki me kelowu ikabedo mayam ayubu pirwu. 21Wugwoke wek wuwiny doge, pe wujem ikome pien kica pe bimake ikomwu, pien twerona tye i cinge.

22Ento ka wuwinyo doge ki cwinywu ducu, kun wutiyo kit ma en owaco botwu i yo ducu, ci abibedo lamerok pa lumerokwu ki lamone pa lumonewu.

23Ka lamalaikana bitelo nyimwu terowu bot jo Amor, jo Kit, jo Periji, jo Kanaan, jo Kiv ki jo Jebuc, ci abijwerogi woko. 24Pe wuryebe inyim lubangagi pe wuworgi, pe wulub kit ticgi ento wubimuku calgi woko ducu, dok wubingido wir me got pa jogigi woko. 25Wubiworo Rwot Lubangawu, ci abimiyo gum ikom wun ki ikom piiwu; dok abikwanyo two woko ki ikinwu. 26I lobowu ducu monwu igi pe bipoto, dok dano ma lalur bibedo peke; abicobo nino me kwowu ducu kakare. 27Abicwalo lworo madwong ikom merok matye inyimwu, abibango rok ducu ma wubiromo kwedgi; abimiyo lumerokwu giringo giloko ngegi botwu. 28Abimiyo lworo madwong mako jo Kiv, jo Kanaan ki jo Kit, wek gungwec woko ki inyimwu. 29Pe abiryemogi woko ki inyimwu i mwaka acel, miyo lobo bidong nono, ci lee tim bimede mapol, yelowu. 30Abiryemogi woko ki inyimwu motmot, nio ka wunya, wucamo lobo. 31Abiketo wang lobowu obed nia ki i Nam Makwar nio i nam Mediterranean, ki nia ki i tim nio wa i kulu Euprate. Dok abimiyo wegi lobo meno i cingwu, wun bene wubiryemogi woko ki inyimwu. 32Pe wuket gicike mo kwedgi, kadi bot lubangagi. 33Gin pe obed i lobowu, miyo wubitimo bal ikoma; pien ka wubiworo lubangagi, ci bidoko owic botwu.”