Nia 22

Cik ma mako culu wang jami

1“Ka ngat mo okwalo twon mo nyo romo mo, ce oneko woko nyo ocato woko, ci biculu twoni abic pi twon acel, ki romi angwen pi romo acel. 2-4En biculu wange; ka gire mo pe, ci kibicate woko, wek kicul kwede lim ma en okwalo. Ka lee ma kikwalo kinongo bot lakwalone makwo, kadi bed twon nyo kana nyo romo, ci biculu madodo kiryo.

Ka kinongo lakwo ka turu ot i dyewor, ce kigoye kineke woko, ci pe kibiculu remo pa lato. Ento kace kinonge iye ma ceng dong otuc, ce kineke woko ci kibiculu kwor pi remone.

5Ka ngat mo oweko lee makwo ocamo poto cam nyo poto olok, nyo oweko gucodo tol, ci gucamo poto pa dano mo, ci en biculu wange ki mere mabecone ma i potone nyo i poto oloke.

6Ka mac ocako wang ce ogamo okutu, ci owango ngano ma kiduru nyo ngano mapeya kikayo, nyo owango poto ducu otyeko woko, ci lacwiny mac biculune ducu.

7Ka ngat mo omiyo lee me akana bot lawote, nyo jami me agwoka, ka kikwalo woko ki i ot pa dano meno, ce kinongo lakwo meno, ci biculu madodo kiryo. 8Ka pe kinongo lakwo, ci won ot bicito iot pa Lubanga, pi nyutu ka en kikome aye oketo cinge ikom jami pa lawote, nyo pe.

9Ka lara tye pi gin mo, kadi bed pi twon, pi romo, pi bongo, nyo pi kit gin mo murwenyo ka ngat acel mo otucu ni, ‘Man aye en,’ ci kop ma ikin jo meno kibiketo inyim Lubanga; ngat ma Lubanga ongolo kop oloye biculu lawote lim madodo kiryo.

10Ka ngat mo omiyo kana nyo twon nyo romo nyo lee mo me akana bot lawote, ce oto woko nyo kigoyo nyo kiryemo orwenyo woko, ma ngat mo pe oneno, 11ci lagwok jami bikwonge ki nying Rwot, wek kinen ka pe en kikome aye oketo cinge ikom lee pa lawote; rwode biye kwong meno, ci lawote ca pe biculune. 12Ento ka kikwalo ki bote, ci en biculu rwode. 13Ka nguu aye omwodo, ci en okel gin me moko loke; ci en pe biculu gin ma nguu aye omwodo.

14Ka ngat mo olego lee ki bot lawote, ce kigoyo nyo oto woko, ma rwode peke, ci omyero ocul wange atir. 15Ento ka meno otime ma onongo rwode tye, ci pe biculu wange. Ento kayam onongo kipango apanga, ci biculu ki lim ma kipango kwedeni.”

Cik ma mako dano ki dini

161

“Ka ngat mo obito nyako mo ma peya ongeyo laco, ma pe kitongo keny ikome, ce obutu kwede, ci myero okol lim me keny me nyomone, wek otere obed dakone. 17Ento ka won nyako okwero woko matek pi nyare, ci en biculu wel lim maromo nyomo nyako ma peya ongeyo laco. 182

Pe iwek dako ma latal obed makwo. 193

Ngat mo keken ma obutu ki lee kinek woko. 204

Ngat ma otumu gitum bot lubanga mukene, mapat ki an Rwot, kibingole kop me to. 215

Pe i tim labedo mabedo ikinwu marac, dok pe iune bene, pien yam wun bene wubedo lubedo i lobo Ejipt. 22Pe wutim gin mo marac ikom dato nyo latin kic mo. 23Ka itimogi marac, ce gukok bota, ci abiwinyo kokogi ada, 24ci akemo bimaka matek, ci abinekowu ki pala lucwan, ci monwu bene gibidoko mon to ki lutinowu bene gibidoko lutino kic. 256

Ka imiyo cente me den bot danona mo ma lacan, pe ibed kwede macalo labanyani, dok pe ipeny lim mo madit makato ma ceng imiyo bote ca. 267Ka lawoti mo ma lacan ojengo bongo koyone boti, ci ber idwoke ma ceng peya opoto, 27pien gin ume eno keken, bongo ma umu kome; en dok biume ki gin ango ka pe idwoko? Ka en okok bota, ci abiwinye, pien an lakica. 288

Pe ilok marac ikom Lubanga, nyo pe icen ladit maloyo wi lwak.

29Pe igale ki tyero jami ma ikwanyo ki ipotoni, bwino ki mooni bene.

Ibidyero lutino awobe kayo, imiyogi bota. 30Ibikelo twoni ma megi ki nyogi romi bene kitmeno. Gubed ki megigi nino abiro, ka ibimiyogi bota ikom nino me aborone. 319

Wubibedo jo maleng ma kikwerogi pira: pieno pe wucam ringo ma nguu omwodo i tim; wubol woko ki gwogi.”