Nia 21

Cik me tic ki opii

(Nwo 15:12-18)

1Rwot owaco bot Moses ni, “Magi aye cik ma ibiketo inyim lwak. 21Ka i wilo opii ma en Laibru, en bitic boti pi mwaka abicel, i mwaka me abirone ibigonye woko labongo lim mo me kok, ci bicito gire. 3Kayam en obino ma peya onongo onyomo, ci en bicito en kene; ka obino ma onyomo, ci bicito ki dakone. 4Ka rwode aye onyome dako ce onywale awobe ki anyira, dako ki lutinone gibidong bot rwode, ci en bicito gire kene. 5Ento ka opii meno oloko atir ni, ‘An amaro rwoda, ki dakona ki lutinona; pe abicito,’ 6ci rwode bitere i ot pa Lubanga, ci bitere wa inget kika, nyo ikom okar me dogola; ka rwode bitucu ite ki nyonyo ma bit; ci dong en bitic bote matwal.

7Ka dano mo ocato nyare woko, macalo angeca, ci angeca meno pe kibigonyo macalo opii ma laco. 8Ka laco ma owilo nyako meno onongo mito ni en obed dakone, ce lacen nyakonu pe oyomo cwinye, ci rwode omyero owek won nyako meno aye okoke. Ento laco meno pe bibedo ki twero me cate bot dano mo ma larok, pien meno bituru gicike mayam omoko bot won nyako meno 9Kayam oyere pi wode, ci en myero ogwoke macalo gwoko nyare. 10Kace binyomo dakone mukene gire, ci omyero omede ki miye cam marom wa ki bongo bene kit me nino ducu, kun bene mede ki bedo kwede macalo dakone i yo ducu ma pe weke woko ata. 11Ka pe ocobo gin magi adeki ducu, dako meno kibigonyo labongo lim mo me kok, labongo culu lim mo keken.

Cik ma mako bwami

122

Ka ngat mo ogoyo dano, ce oto, kibineke woko. 133Ento kayam cinge orwate arwata ikome ce oto, ci abiyero kabedo mo ma en biringo laro iye. 14Ento ka dano mo ocako lweny ikom ngat mo me akaka me nekone woko ki ryeko, ce oringo kalaro kwone ikom keno tyera, ci wubikwanye, wuneke woko.

15Ka ngat mo ogoyo wone nyo mine kibineke woko. 164

Ka ngat mo okwalo dano, kadi ka ocato bot ngat mo nyo kinongo bote, kibineke woko. 175

Ka ngat mo oceno wone nyo mine kibineke woko.

18Ka jo mogo gubedo ka da, ce ngat acel ocelo lawote ki got nyo odongo ki cinge ci pe oto, ento obedo ka two labutu, 19lacen ka dano meno ocuke oa malo kun woto komo ki odo, kop pe biloyo ngat ma ogoye ni, ento biculu pi balo kare me tice, dok bimiyo en cang maber.

20Ka ngat mo ogoyo opiine nyo angecane ki odo ce oto woko cut, ci kibimiye pwod. 21Ento ka opii meno obedo kwo pi nino acel nyo aryo pe kibimiye pwod; pien opii meno obedo gire jamine.

22Ka jo gitye kalweny, ci ngat acel cinge ocer ikom dako ma oyac, ce iye opoto woko, ma pe oketo ret mukene ikome, dano ma ogoyo dakoni biculu kwor kit ma cwar dakonu bingolone, kun culu malube ki kit ma langolkop ongolo. 23Ka ret mukene onen, ci kibiculu kwo pi kwo, 246wang pi wang, lak pi lak, cing pi cing tyen pi tyen, 25wango ki mac pi wango ki mac, ret pi ret, goco pi goco.

26Ka ngat mo ogoyo wang opiine nyo wang angecane, ce oloyo tong wange woko, ci bigonyo opii meno nyo angeca meno, weko cito gire pi wangeni. 27Ka otwomo omuku lak opiine nyo angecane ci bigonyo opii meno nyo angeca meno weko cito gire pi lakenu.”

Cik ma mako wegi lim

28“Ka twon mo ocobo laco nyo dako mo ki tunge, ce oneko woko, ci twon meno kibicelo woko ki got, dok ringone bene pe kibicamo; ento kop pe biloye rwode. 29Ento ka onongo twon meno yam cobo dano ki tunge, dok bene onongo dong kiciko rwode pire ci ento pe omedo ki gwokone, ce oneko laco mo nyo dako mo, ci twon meno kibicelo woko ki got, ki rwode bene kibineke woko. 30Ka kingole cul, ci biculu lim ducu me koko kwone ma kingole. 31Ka ocobo awobi pa dano mo, nyo nyare, ci kibitic kwede ikit cik acelu. 32Ka twon ocobo opii mo, nyo angeca mo, ci rwode bimiyo cekel me ryal pyere adek ki ladit pa opii meno, ki twon meno bene kibicelo woko ki got.

33Ka ngat mo oweko wi bur twolo nyo ka ngat mo okwinyo bur ci pe oumu wiye woko, ce twon nyo kana mo opoto iye, 34ci won bur biculune; en bimiyo lim bot rwode, ci ringone bibedo mere.

35Ka twon pa ngat mo otwomo twon lawote, ce oneko woko, ci kibicato makwoni woko, gipoko lime; ki twon ma kinekoni ringone bene kipoko woko. 36Nyo ka kite ongene ni yam en twon ma lacob luwote atata, rwode bene pe ogwoko, en biculu twon ki twon wadi, ki twon ma kinekoni bibedo mere.”