Nia 15:2

Wer pa Moses

11

Moses ki jo Icrael guwero wer man bot Rwot kun gin waco ni,

“Abiwero wer bot Rwot, pien oloyo loc me deyo;

en obolo aguragura ki lait i wiye woko i nam. 22

Rwot aye teka ma akoro ki wer,

en odoko Larna.

Man aye Lubangana, abipako en

Lubanga pa wora, abikoro nyinge.

3Rwot en oteka lweny;

nyinge Rwot.

4En obolo gadigadi pa Parao ki monye ducu i nam;

patwonine ma oyerogi gumwony piny i Nam Makwar.

5Pii matut oumu wigi woko;

gulwiny woko ite kut macalo got.

6Cingi ma lacuc, ai Rwot, won deyo tye ki tek,

cingi ma lacuc, ai Rwot, ngido lumeroki woko.

7Pi deyoni madit ireto lukwori piny;

icwalo akemoni owangogi woko macalo reng kal.

8Yweyo me umi otingo pii malo,

pii mamol otinge malo likung;

pii matut odile liking i cwiny nam.

9Lumerok guwaco ni, ‘Wabiryemo korgi ci wabimakogi;

wabipoko gin ma wayako, kit ma cwinywa mito;

wabiwoto pala lucwanwa, cingwa bityekogi woko.’

10Ento in ikutu yamoni ai Rwot, ci nam omwonyogi woko;

gumwony ite pii madwong macalo odo olek.

11Anga macalo in, ai Rwot, ki ikin lwak lubangani?

Anga macalo in, ma ladeyo ki maleng?

Anga ma tiyo ginaura ki me deyo macalo in?

12In yam iryeyo cingi ma lacuc,

ci lobo omwonyogi woko.

13Pi mari ma pe loke itelo wi jo mayam ikokogi,

pi teki igwokogi ci ikelogi ikabedoni maleng.

14Rok mukene dong guwinyo pire ci komgi omyel;

atiba opoto ikom Lupiliciti.

15Ikarenu cwiny rwodi me Edom ongabe angaba;

lworo oonyo koyo ikom ludito me Moab;

kom jo Kanaan ducu oto woko lirut.

16Lworo ki myelkom opoto ikomgi.

Pi tek ma meri omiyo gucung,

guling macalo got,

nio ka joni gukato ki kangetgi ai Rwot,

nio ka jo ma i wilogi gukato.

17Iterogi i ci iketogi ikom got meri,

ikabedo ma iyero me bedo kabedoni ai Rwot,

i Kabedo Maleng mayam in aye iyubu ki cingi ai Rwot.

18Ai Rwot in i bibedo laloc pi nakanaka.”

Wer pa Miriam

19Pien ka aguragura pa Parao ki gadigadine ki wegi aguragurane gucako donyo i nam, ci Rwot odwoko pii me nam cen ikomgi; ento jo Icrael guwoto i lobo mutwo i dye nam. 20Ci Miriam, lanebi ma dako, lamin Aron, okwanyo ajaa i cinge; ci mon ducu gukwanyo ajaa gumol kwede ikore ki myel. 21Miriam ocakogi wer ni:

“Wuwer bot Rwot, pien otuc ki loc me deyo;

en obolo aguragura ki luit i wiye woko i nam.”

Pii makec i Mara

22Moses dok otelo wi jo Icrael guwoto anyim nia ki i Nam Makwar gucito i tim me Cur; guwoto i tim wot me nino adek ci pe gunongo pii. 23Ka guo i Mara3, ci mato piine oloyogi, pien piine onongo kec; ma omiyo kilwongo ni Mara. 24Ci dano gubedo kangur ikom Moses, kun gin waco ni, “Wabimato ango?” 25Moses okok bot Rwot, ci Rwot onyute yat mo; ci en obolo i pii, ci pii odoko mamit.

Rwot oketogi cik kunu, ki lok ma en ongolo, otemo cwinygi kunu, 26kun waco ni, “Ka wubiworo dog Rwot Lubangawu ki cwinywu ducu, ma wutiyo gin manen atir i wange, dok wugwoko lok ma en ociko kun wumako cike ducu, ci pe abikelo two mo ikomwu mayam aketo ikom jo Ejipt; pien An a Rwot ma cangowu.”

27Ka dok gubino i Elim, kama yam tye iye wang it apar wiye aryo, ki otit pyere abiro; ci gugony inget pii meno.