Nia 16

Lubanga omiyo manna ki aluru

1Lwak pa jo Icrael ducu gua woko ki i Elim, ci gucore i tim Cin, matye ikin Elim ki Cinai, inino dwe apar wiye abic me dwe me aryone nia ma dong gua woko ki i Ejipt. 2Lwak jo Icrael ducu gungur ikom Moses ki Aron i tim, 3kun lwak ducu waco botgi ni, “Kono nene Rwot aye onekowa ki cinge i lobo Ejipt, kama yam wabedo inget agulu ringo, ma wacamo kwon yengowa; ento in ikelowa wa i tim kany kaneko lwak man ducu ki kec.” 41

Rwot dok owaco bot Moses ni, “Nen, abicwalo mugati cwer botwu nia ki i polo; ci dano gibikato woko ka cokone kun gicoko maromo pi nino acel acel, wek kong anen gi kwede, ka nyo gibilubu cika nyo pe. 5Inino me abicele gibicoko madwong bamo ma gicoko nino acelaceli kiryo.” 6Kitmeno Moses ki Aron guwaco bot jo Icrael ni, “Tin otyeno wubingeyo ni Rwot aye yam okwanyowu ki i lobo Ejipt, 7ki odiko bene wubineno deyo pa Rwot, pien otyeko winyo ka wungur ikome. Pien wan kono angagi ma wungur ikomwani?” 8Ci Moses owaco ni, “Ka Rwot omiyo ringo acamawu tin otyeno, ka dok omiyo mugati ma yengowu odiko, wan kono angagi? Pien Rwot otyeko winyo nguru ma wungur kwede ikomeni. Nguruwu pe tye ikomwa, ento ikom Rwot gire.”

9Ci Moses owaco bot Aron ni, “Wac ki lwak jo Icrael ducu ni, ‘Wubin cok inyim Rwot, pien otyeko winyo nguruwu.’” 10Ka yam Aron tye kalok ki lwak jo Icrael ducu guneno tung tim, ci nen, deyo pa Rwot onen i pol. 11Rwot owaco bot Moses ni, 12“Dong atyeko winyo nguru pa jo Icrael; wac botgi ni, ‘Tin wi otyeno wubicamo ringo, ki odiko wubicamo kwon ma yengowu: miyo wubingeyo ni An a Rwot Lubangawu.’”

13Ikare me otyeno aluru gubino gucore, guumu gony woko; dok i odiko toyo oluk oumu nget gony woko. 14Ka toyo dong oo woko, ci gin mo odong piny ma ongide matinotino macalo pok rec, kun ongide matinotino macalo bwoyo pee ma opune i lobo. 152Ka jo Icrael guneno, ci guloko keken gi ni, “Man gin ango?” Pien yam peya guniang kite. Ci Moses owaco botgi ni, “Man aye kwon ma Rwot omiyo botwu me acama. 16Man aye gin ma Rwot ociko: ngat acel acel ocok mere maromo acamane. Wujob maromo agwata moko kwon acel pi dano acel acel muporo wel dano ma ngat acel acel tye kwede i kemane.” 17Jo Icrael gutimo kitmeno; jo mogo gucoko madwong, jo mogo gucoko manok. 183Ento ka guporo ki agwata moko kwon, ci ngat ma ocoko madwong pe gin mo odong bote, ki ngat ma ocoko manok pe gin mo orem, pien ngat acel acel ocoko maromo acamane. 19Moses owaco botgi ni, “Pe ngat owek mo odong nio odiko.” 20Ento gin pe owinyo lok pa Moses; mukene guweko dule mogo odong nio wa odiko, ci ocako nywal kwidi, okwok mangwe, ci kiniga omako Moses ikomgi. 21Gubedo ka cokone i odiko odiko, kun ngat acel acel coko ma oromo acamane; ento ka ceng odoko lyet ci mee woko. 22Ikom nino me abicele gucoko kwon madwong ma dodo me nino acel acel ni tyen aryo, maromo agwata moko kwon aryoaryo. Ka lutel wi lwak ducu gubino gutito loke bot Moses, 234en owaco botgi ni, “Rwot yam ociko kit man ni, ‘Diki en aye nino me yweyo mot, en Cabit maleng pa Rwot. Wubul gin ma wumito bulune, ki wuted gin ma wumito tedone, ki ma wucamo odonge wukan, wugwok nio wa odiko.’” 24Kitmeno gukano, gugwoko nio wa odiko macalo Moses ocikogi pe omedo ki kwok mangwe, kwidi obedo peke iye bene. 25Moses owaco ni, “Wucam tin, pien tin aye Cabit pa Rwot. Tin pe wubinongo i bar. 26Wubicoko nino abicel; ento ikom nino me abirone, ma en aye Cabit, pe bibedo tye.” 27Ikom nino me abiro jo mukene gucito woko ka jobone, pe gunongo gin mo. 28Ci Rwot owaco bot Moses ni, “Wubikwero lubu lok ma aciko, ki cika ducu, nio wa awene? 29Nen ba! Rwot otyeko miyowu cabit, ma omiyo inino me abicel en omiyowu kwon maromo nino aryo. Myero dano acel acel obed mot ikabedone, wek dano mo pe owek kabedone ocit woko inino me abiro.” 30Kitmeno dano ducu guywe mot inino me abiro. 315

Ikare meno jo me ot pa Icrael gulwongo nyinge ni manna. Onongo nen macalo nyig ko matar, ma mit malim, macalo ki yubu ki moo kic. 32Moses owaco ni, “Rwot ociko kit man ni, ‘Wek gigwok maromo agwata moko kwon acel wa ikare pa likwayowu, wek gunen kit kwon mayam apitowu kwede i tim, ikare mayam akwanyowu iye woko ki lobo Ejipt.’” 336Moses owaco ki Aron ni, “Kwany abino, ci iony manna maromo agwata moko kwon acel, iket inyim Rwot, wek obed me agwoka wa ikare pa likwayowu.” 34Macalo Rwot ociko ki Moses, kitmeno Aron oketo manna inyim Canduk lok me Gicike, wek obed me agwoka. 357Jo Icrael gucamo manna gutyeko kwede mwaka pyere angwen kulu, nio ka guo i lobo ma giromo bedo iye; gucamo manna nio ka guo iwang lobo Kanaan. 36Agwata moko kwon mayam gipimo kwede ikare ca onongo romo lita aryo.