Nia 17

Pii ma oa i pata got

(Wel 20:1-13)

1Lwak jo Icrael ducu gua woko ki i tim Cin kun giwoto gikobo macalo Rwot ociko, ci gugony Repidim; ento pii amata pa dano obedo pe. 2Ma omiyo dano gukeco ikom Moses, guwaco ni, “Mii ki wan pii me amata.” Moses ogamo doggi ni, “Pingo wukeco ikoma? Pingo wuomo i Rwot?” 3Ento orwo pii oneko dano, ci dano gubedo kangur ikom Moses kun gin waco ni, “Pingo yam ikwanyowa woko ki i Ejipt kanekowa ki lutinowa ki leewa ki orwo pii?” 4Omiyo Moses okok bot Rwot ni, “Abitimo jo man ningning? Gin dong gutyeko yube me cela woko ki got.” 5Ci Rwot owaco bot Moses ni, “Kat wa inyim lwak, kwany ludongo mogo pa jo Icrael, icit kwedgi; dok ikwany odo mayam igoyo ki Nail, mak i cingi, iwot kwede. 6Nen, abicung inyimi, ikom pata got ma i Koreb; ci ibigoyo pata got, ci pii bia ki iye, wek lwak gumati.” Moses otimo kitmeno inyim ludongo pa Icrael. 7Olwongo nying kabedo meno ni, Maca,1 ki Meriba2 pien jo Icrael gukeco ikome, dok pien guomo i Rwot kun giwaco ni, “Rwot mono tye ikinwa nyo pe?”

Lweny ki jo Amalek

8Jo Amalek gubino gulwenyo ki jo Icrael i Repidim. 9Ci Moses owaco bot Yocwa ni, “Yer co ma ikinwa, ci icit ilweny ki jo Amalek; diki abicung iwi got ki odo pa Lubanga i cinga.” 10Ci Yocwa otimo kit ma Moses otite, olwenyo ikom jo Amalek; ci Moses ki Aron ki Kur gucito malo iwi got. 11Ka Moses obedo katingo cinge malo, ci Icrael giloyo; ento ka obedo kadwoko cinge piny, jo Amalek giloyo. 12Ento ka cing Moses ojony woko, ci kikwanyo got kikelo, en obedo i wiye, ci Aron ki Kur gutingo cinge malo, ngat acel tungcel kit ngat acel tung mukene; kitmeno cinge obedo ma otinge malo nio ka ceng opoto. 13Ci Yocwa ojwero Amalek ki jone ki pala lucwan. 143

Rwot owaco bot Moses ni, “Co lok man i buk wek obed me lapowic, ci ikwan i it Yocwa matek ni: an abijwayo Amalek woko ki itam pa dano ducu ma gitye piny ite polo.” 15Ka Moses ocano keno tyer, olwongo ni, “Rwot aye benderana,” 16kun waco ni, “Cingwa omako bendera pa Rwot! Rwot bilweny ki Amalek kare ducu.”