Nia 18

Yecero olimo Moses

1Yecero, ma ajwaka pa jo Midian, won dako pa Moses, yam owinyo gin ducu ma Lubanga obedo katiyo pi Moses ki pi jo Icrael, kit ma Rwot okwanyo jo Icrael ki i Ejipt. 21Onongo Yecero, won dako pa Moses, ogamo Jipola dako pa Moses, ikare ma Moses odwoko en bote, 32kacel ki awobene aryo. Nying awobi acel Gercom, pien yam owaco ni, “Abedo labedo i lobo pa lurok.” 4Nying mukene Eliejer, pien yam owaco ni, “Lubanga pa wora aye okonya, ci olara ki i pala lucwan pa Parao.” 5Ka Yecero, won dako pa Moses, tye kabino ki awobene ki dakone bot Moses i tim, kama yam gin gugony iye ite got pa Lubanga, 6ci ngat acel mo otito bot Moses ni, “Nen, won dakoni Yecero obibino boti ki dakoni kacel ki awobeni.” 7Ci Moses okato ocito kajolo won dakone, ci okule inyime, onoto leme; ka gucako mote keken gi kun gipenyo kit bedogi, ka gudonyo i kema. 8Ci Moses otito ki won dakone gin ducu mayam Rwot otimo ikom Parao ki ikom jo Ejipt pi jo Icrael, ki peko ma gubedo kwede i yo, ki kit mayam Rwot olarogi kwede. 9Ci cwiny Yecero obedo yom pi gin ducu ma Rwot yam otiyo bot jo Icrael, ki kit ma olarogi kwede ki i cing jo Ejipt.

10Ci Yecero owaco ni, “Kipak Rwot ma olarowu ki i cing jo Ejipt ki i cing Parao. 11Kombedi dong angeyo ni, Rwot dit makato lubanga mukene ducu, pien olaro dano ki i cing jo Ejipt, mayam gubedo karonyogini.” 12Ci Yecero won dako pa Moses otyero gitum awanga, ki gitum mukene, bot Lubanga; ci Aron obino ki ludongo ducu pa jo Icrael kacamo cam ma kityeroni kacel ki won dako pa Moses inyim Lubanga.

Keto lungolkop

(Nwo 1:9-18)

13Orwone Moses obedo kangolo kop pa dano, ci dano gucung inyim Moses nia odiko con nio wa otyeno. 14Ka won dako pa Moses oneno gin ducu ma en obedo katimo pi dano, ci owaco ni, “Itiyo ki dano kuman pingo? Pingo ibedo keni, kun dano ducu gucung gurumi woko nia odiko nio wa otyeno?” 15Ci Moses owaco bot won dakone ni, “Pien dano gibino bota pi penyo dog Lubanga. 16Dok ka gin tye ki lok alara, ci gibino bota, an angolo kop ikin dano ki lawote, kun bene amiyo gingeyo cik pa Lubanga.” 17Won dako pa Moses owace ni, “Gin ma in itiyo ni pe kakare. 18In kacel ki lwak wubiol woko, pien tice pek obwoyo komi woko, in pe ibitwero tyekone keni. 19Dong iwiny doga; abimini ryeko, dok Lubanga obed kwedi! In i bibedo lakwena pa dano inyim Lubanga, ki pi tero lokgi bot Lubanga. 20Omyero ipwonygi cik ki pwony ducu pa Lubanga, kun imiyo gingeyo lubune ki kit ma myero gukwo kwede. 21Ento in iyer dano makwiri ki ikin lwak, jo manen ni gilworo Lubanga, jo ma kigenogi, ma gikwero lim ma kinongo i yo marac; ci iket jo meno gulo lwak, gubed lulo jo alip, ki jo miya, ki jo pyere abic, ki jo apar. 22Wek gungol kop ki dano kare ducu; gukel boti lok madito ne keken; ento lok ducu matinotino gungol ki kunu; ci dong gin biyweyo kori, dok gin binywako tingo peko meno kwedi. 23Ka itiyo kit man ma Lubanga bene ociki kwede ni, ci ibitwero cirone, ki lwak man ducu bene gin bidok ikabedogi ki kuc.”

24Moses owinyo dog won dakone, otimo gin ducu ma owace. 25Moses ocako yero jo makwiri ma ikin jo Icrael ducu, oketogi gudoko lutel wi lwak, lulo jo alip, ki jo miya, ki jo pyere abic, ki jo apar. 26Gubedo kangolo kop ikare ducu; pido matego aye gikelo bot Moses, ento lok ducu matinotino kingolo ki kunu. 27Ka Moses olwoko won dakone odok, ci Yecero omede anyim ki wote nio i lobo tugi.