Nia 19

Jo Icrael ite got Cinai

1Ikom por dwe me adeke nicake ma jo Icrael gua kwede ki Ejipt guo i tim Cinai ikom nino meno kikome. 2Ka gua woko ki i Repidim ci gubino i tim Cinai, gugony i tim kunu inyim got. 3Ka Moses oito malo bot Lubanga, ci Rwot olwonge ki igot, kun waco ni, “Ibiwaco ki jo me ot pa Yakobo kit man kun itito ki jo Icrael ni, Rwot owaco ni, 4‘Dong wutyeko neno gin ma atimo ikom jo Ejipt, kun atingowu macalo ocur tingo lutinone ibwome, ci akelowu bota. 512Pimeno ka wubiworo doga, kun wumako gicikena, ci wubibedo jona kikome ikin rok ducu; pien lobo ducu mera. 63Wubibedo luker, ajwaki pa Lubanga ma an aye aloyo, wubibedo rok maleng.’ Meno aye lok ma ibiloko bot jo Icrael.”

7Kitmeno Moses obino olwongo ludongo pa lwak, ci oketo lok meno ma Rwot owaco ni inyimgi. 8Ci lwak ducu gugamo lawangacel ni, “Gin ducu ma Rwot owaco, wabitiyo.” Ci Moses odwoko lok pa lwak bot Rwot. 9Rwot owaco ki Moses ni, “Nen, an abibino boti i pol mapek, wek lwak guwiny ka aloko kwedi, wek guye in matwal.”

Ka Moses otito lok pa lwak bot Rwot, 10ci Rwot owaco bot Moses ni, “Cit bot dano, ilonygi tin ki diki, gulwok bongigi, 11wek inino me adeke onong gin guyube; pien inino me adeke, an Rwot abilor piny ki iwi got Cinai inyim lwak ducu. 124In ibitongo wangco me poko kama lwak bicung iye, kun itito ki lwak ni, ‘Wugwoke, pe wuit malo iwi got, pe wugud wangacone bene; dok ka ngat mo ogudu kom got, kibineko woko. 13Pe cing mo bigudu kom dano onyo lee ma ongolo wangco, ento kibicelo ki got nyo ki atero; kadi bed lee nyo dano, pe bikwo. Ka dwon obute bikok nakanaka, ci lwak gibibino cok ite got’” 14Ci Moses olor piny nia ki iwi got ocito bot lwak ka olonyo lwak; ci gulwoko bongigi. 15Ka owaco bot lwak ni, “Wuyube pi nino me adeke; ikare meno pe wubut ki monwu.” 1656

Ikom nino me adeke i odiko piny obedo kamor ma nongo lutkot wil awila, pol mapek oumu wi got, ci obute okok malongo tutwal, omiyo jo ducu ma gubedo igony komgi omyel. 17Lacen Moses okelo lwak woko ki igony karwate ki Lubanga. Lwak gucung piny ite got. 18Yito oboyo kom got Cinai woko, pien onongo Lubanga olor piny ikom got ki mac; yitone oduny cito malo macalo yito mac lawang agulu, got ducu oyenge matek. 19Ka dwon obute mede ki koko malongo, Moses obedo kalok ki Lubanga ci Lubanga gamo doge ki mor kot. 20Lacen Rwot olor piny ikom got Cinai, iwi lacol got, ci olwongo Moses malo bote, ci Moses ocito malo kunu. 21Rwot owaco bot Moses ni, “Lor piny, ijuk lwak, wek pe gucere me neno Rwot, miyo lwak jo mapol gibito. 22Dok imii ajwaki ma gibino cok bot Rwot, gulonye keken gi, wek Rwot pe otuge ikomgi.” 23Ci Moses ogamo ni, “Lwak pe gibiito malo iwi got Cinai; pien in ki komi aye icikowa, kun iwaco ni, ‘Tong wangco orum got ci iket obed me kwer.’” 24Rwot owace ni, “Lor piny, ci ibin malo wun ki Aron; ento pe iwek ajwaki ki lwak gucere me bino bota, wek pe atuge ikomgi.” 25Kitmeno Moses olor piny bot lwak, ci otito botgi gin ma Rwot owaco.